Bai na kontenido

Bai na kontenido

 KAPÍTULO 8

Nan A Skapa for di un Rei Malbado

Nan A Skapa for di un Rei Malbado

MATEO 2:13-23

  • HESUS SU FAMIA TA HUI BAI EGIPTO

  • HOSE KU SU FAMIA TA MUDA BAI NÁZARÈT

Hose a lanta Maria for di soño pa dun’é un notisia importante. Un angel di Yehova a kaba di aparesé na Hose den un soño i a bis’é: “Lanta ariba, kue e mucha ku su mama i hui bai Egipto, i keda ayanan te ora mi bisa bo pa bini bèk, pasobra Heródes tin idea di laga buska e mucha pa mat’é.”—Mateo 2:13.

E anochi ei mes, Hose a lanta bai Egipto ku e mucha i ku Maria. I nan a hui nèt na ora pasobra Heródes a haña sa ku e astrólogonan, kendenan el a pidi pa bin inform’é unda e mucha tabata, a nèk e. Nan a bandoná e pais sin bai bèk serka dje. Heródes a rabia masha pisá. I pa e por a mata Hesus, el a laga mata tur mucha hòmber di dos aña di edat bai abou ku tabata biba na Bètlehèm i den e áreanan ei banda. El a laga mata mucha di e edat ei pasobra, a base di e informashon ku e astrólogonan di Oriente a dun’é, el a kalkulá ku ta e edat ei Hesus lo tabatin e tempu ei.

E masakre akí tabata horibel! Nos no sa kuantu mucha hòmber a ser matá, pero, manera Yeremías a profetisá, tabatin un gran lamento di mamanan ku tabata yora nan yunan amargamente.—Yeremías 31:15.

Entretantu, Hose i su famia a yega Egipto i a keda biba einan. Un anochi, e angel di Yehova a bolbe aparesé den un soño na Hose i a bis’é: “Lanta ariba, kue e mucha ku su mama i bai e tera di Israel bèk, pasobra esnan ku tabata buska e mucha pa mata a muri.” (Mateo 2:20) Hose a komprondé ku é i su famia por a bai nan tera bèk; asina un otro profesia di Beibel a kumpli, esta, ku Dios lo a yama su Yu hòmber for di Egipto.—Oséas 11:1.

Aparentemente, Hose tabata ke bai biba na Hudea, kisas serka di Bètlehèm, kaminda nan  tabata biba promé ku nan a hui bai Egipto. Pero el a haña sa ku Heródes su yu malbado Arkelao tabata reina awor komo rei di Hudea. Ademas, Dios a spièrt’é den un soño di e peliger di bai einan. P’esei, Hose ku su famia a biaha bai mas nort, den e teritorio di Galilea, leu di Herúsalèm, e sentro di religion hudiu. I nan a bai biba na e stat ku yama Názarèt. Einan Hesus a lanta. Asina un otro profesia bíbliko a haña kumplimentu: “Lo e ser yamá nazareno.”—Mateo 2:23.