MATEO 2:1-12

  • ALGUN ASTRÓLOGO TA SIGUI UN “STREA” KU TA GUIA NAN NA HERÚSALÈM I DESPUES NA HESUS

Un grupo di hòmber, kendenan tabata astrólogo, a bini di Oriente. Un astrólogo ta un persona ku ta studia posishon di strea i ta pretendé di pronostiká futuro i interpretá susesonan den bida di hende. (Isaías 47:13) Ora e astrólogonan akí tabata na Oriente, kaminda nan tabata biba, nan a mira un “strea” i a disidí di sigui esaki pa sientos di kilometer. E strea a hiba nan Herúsalèm i no Bètlehèm.

Ora nan a yega Herúsalèm, nan a puntra: “Na unda esun ku a nase komo rei di e hudiunan ta? Pasobra nos a mira su strea ora nos tabata na Oriente, i nos a bini pa rindi homenage na dje.”—Mateo 2:1, 2.

Ora Rei Heródes a tende esaki, el a bira aribabou. El a manda yama e saserdotenan prinsipal i otro lidernan religioso hudiu i a puntra nan unda e Kristu lo mester a nase. Refiriendo na e Skritura, nan a bis’é: “Na Bètlehèm.” (Mateo 2:5; Mikéas 5:2) E ora ei, Heródes a manda yama e astrólogonan den sekreto i a bisa nan: “Bai i buska e mucha tur kaminda, i ora boso hañ’é, bini bèk serka mi pa laga mi sa unda e ta, ya asina mi tambe por bai rindi homenage na dje.” (Mateo 2:8) Pero bon mirá, Heródes tabata ke haña e mucha pa e laga mat’é.

Despues ku e astrólogonan a sigui nan kaminda, algu asombroso a sosodé. E “strea” ku nan a mira ora nan tabata na Oriente a bai nan dilanti. Ta opvio ku e strea akí no tabata un strea komun i koriente, ma un strea ku a ser proveé spesialmente pa guia nan. E astrólogonan a sigui e strea ku a bai para nèt riba e kas kaminda Hose ku Maria i e mucha chikitu tabata.

Ora e astrólogonan a drenta e kas, nan a mira e mucha, esta, Hesus, huntu ku su mama, Maria. Nan a kai na rudia i rindi homenage na e mucha. I nan a dun’é diferente regalo: oro, sensia blanku i mira. Ora nan tabata preparando pa bai bèk serka Heródes, Dios a spièrta nan den un soño pa no hasi esei. P’esei, nan a bai nan pais bèk via un otro ruta.

Ken bo ta kere tabata tras di e “strea” ku a guia e astrólogonan? Kòrda, e strea akí no a dirigí e astrólogonan direktamente na Bètlehèm, kaminda Hesus tabata. El a hiba nan Herúsalèm, unda nan a bini den kontakto ku Rei Heródes, kende tabata ke mata Hesus. I lo el a logra esei si Dios no a intervení i atvertí e astrólogonan pa no bisa Heródes unda Hesus tabata. Pues, no tin duda ku ta Satanas, Dios su enemigu, tabata esun tras di e asuntu. É tabata esun ku kier a mata Hesus.