Bai na kontenido

Bai na kontenido

 KAPÍTULO 93

E Yu di Hende Lo Ser Revelá

E Yu di Hende Lo Ser Revelá

LUKAS 17:20-37

  • E REINO DI DIOS TA MEIMEI DI NAN

  • KON LO TA ORA HESUS SER REVELÁ?

Probablemente, Hesus tabata na Samaria òf na Galilea. Awor, algun fariseo tabata ke sa na ki tempu e Reino di Dios lo a bini. Segun nan, e Reino akí lo a bini ku gran splendor i ku yen di seremonia. No opstante, Hesus a bisa nan: “E Reino di Dios no ta bini na un manera ku ta bisto pa tur hende; ni hende lo no bisa: ‘Wak, at’é akí!’ òf: ‘At’é ayanan!’ Pasobra e Reino di Dios ta meimei di boso.”—Lukas 17:20, 21.

Algun hende kisas ta pensa ku Hesus tabata ke men ku e Reino di Dios ta den kurason di hende ku ta adorá Dios. Pero esei no por tabata e kaso pasobra Hesus tabata papiando ku e fariseonan i e Reino no por tabata den nan kurason. E Reino tabata meimei di nan den e sentido ku e Rei di e Reino di Dios, esta, Hesus, tabata einan, meimei di nan.—Mateo 21:5.

Muy probablemente ora e fariseonan a bai, Hesus a duna su disipelnan mas splikashon tokante e Reino. Pa kuminsá, el a duna nan algun spièrtamentu relashoná ku su presensia den poder di Reino. El a bisa nan: “Lo yega un tempu ku boso lo tin gana di mira ún dia di e dianan di e Yu di hende, ma boso lo no mir’é.” (Lukas 17:22) Ku e palabranan ei, Hesus a indiká ku ta den futuro e Yu di hende lo a kuminsá goberná komo Rei di e Reino. Promé ku e tempu ei yega, algun disipel lo a spera e Reino ansiosamente pero nan lo mester a sigui warda te na e tempu ku Dios a stipulá pa e Yu di hende yega.

Hesus a sigui bisa: “Hende lo bisa boso: ‘Wak, at’é ayanan!’ òf: ‘Wak, at’é akinan!’ No bai einan ni kore nan tras. Pasobra meskos ku ora werlek kòrta, e ta bria di un parti di shelu te na e otro parti di shelu, asina lo ta tambe riba e dia di e Yu di hende.” (Lukas 17:23, 24) Awor, kon e disipelnan di Hesus lo a ser protehá pa no sigui mesíasnan falsu? Hesus a indiká ku e binida di e berdadero Mesías den poder di Reino lo tabata manera werlek ku por ser mirá na mes momento for di vários lugá. Pues, su presensia den poder di Reino ta visibel pa tur opservadó alerta.

Siguientemente, Hesus a usa susesonan di pasado pa mustra ki aktitut hende lo tin durante su presensia den futuro. El a bisa: “Meskos ku a sosodé den e dianan di Noe, asina lo ta tambe den e dianan di e Yu di hende . . . Asina tambe, meskos a sosodé den e dianan di Lòt: E hendenan tabata kome, bebe, kumpra, bende, planta, traha kas. Ma riba e dia ku Lòt a sali for di Sódoma, kandela i suafel a yobe for di shelu i a destruí nan tur. Asina lo ta riba e dia ku e Yu di hende keda revelá.”—Lukas 17:26-30.

Hesus no tabata ke men ku e hendenan den tempu di Noe i den tempu di Lòt a ser destruí djis pasobra nan tabata okupá ku kosnan di tur dia, manera komementu, bebementu, kumpramentu, bendementu, plantamentu i trahamentu di kas. Tantu Noe komo Lòt i nan famianan tabatin nan keasernan di tur dia. Pero e hendenan den nan  tempu tabata hasi e kosnan akí sin tene kuenta ku Dios su boluntat; nan no a mira e importansia di e tempu den kua nan tabata biba. P’esei Hesus a instruí su disipelnan pa nan sí presta atenshon na Dios su boluntat i kumpli ku esaki. Sí, asina Hesus a mustra bon kla kiko su disipelnan mester hasi pa nan por ser salbá ora Dios destruí e mundu malbado den futuro.

Pues, Hesus su disipelnan no mester laga kosnan di mundu—“e kosnan ku a keda atras”—distraí nan. Hesus a bisa: “Riba e dia ei, laga e hende ku ta riba dak, ma kende su kosnan ta den kas, no baha pa kue esakinan; meskos tambe, laga e hende ku ta den kunuku no bai bèk na e kosnan ku a keda atras. Kòrda e kasá di Lòt.” (Lukas 17:31, 32) El a bira un pilá di salu.

I siguiendo ku su deskripshon di e situashon durante e tempu ku e Yu di hende ta reina komo Rei, Hesus a bisa su disipelnan: “Riba e anochi ei lo tin dos hende riba ún kama; lo bai ku ún, ma lo laga e otro atras.” (Lukas 17:34) Pues, algun hende lo haña salbashon, miéntras ku otronan lo ser bandoná den e sentido ku nan lo pèrdè nan bida.

E disipelnan a puntra: “Na unda, Señor?” Hesus a kontestá nan: “Kaminda e kadaver ta, einan tambe e águilanan lo ta.” (Lukas 17:37) Sí, esnan ku lo haña salbashon ta manera águila ku bista skèrpi. Den ki sentido? Wèl, e disipelnan akí lo a reuní ku e Kristu berdadero, e Yu di hende. Anto Hesus lo a proveé su disipelnan ku e bèrdat ku ta salba bida di hende ku tin fe.