Bai na kontenido

Bai na kontenido

 KAPÍTULO 66

Na Herúsalèm pa e Fiesta di Tabernakel

Na Herúsalèm pa e Fiesta di Tabernakel

HUAN 7:11-32

  • HESUS TA SIÑA HENDE NA E TÈMPEL

Despues ku Hesus a batisá, el a bira masha konosí. Míles di hudiu a mir’é hasi milager, i informe tokante su obranan a plama den henter e pais. P’esei, hopi hende a kuminsá buska Hesus na e Fiesta di Tabernakel, òf Ramada, ku tabata tumando lugá na Herúsalèm.

E hendenan tabatin diferente opinion tokante Hesus. Algun tabata bisa: “E ta un bon hende.” Otronan tabata bisa: “Nò, ta gaña e ta gaña e hendenan.” (Huan 7:12) Tabatin hopi di e tipo di komentarionan akí durante e promé dianan di e fiesta. Pero niun hende no tabatin e kurashi di defendé Hesus públikamente, pasobra nan tabatin miedu di e reakshon di e lidernan hudiu.

Despues di un par di dia ku e fiesta tabata andando kaba, Hesus a presentá na e tèmpel. E manera asombroso ku e tabata siña hende a laga hopi di e hendenan keda babuká. E hudiunan tabata puntra: “Kon bini e hòmber akí tin asina tantu konosementu i siñansa, siendo ku e no a studia na e skolnan religioso [esta, e skolnan rabíniko]?”—Huan 7:15.

Hesus a bisa nan: “Loke mi ta siña hende no ta di mi, ma di Esun ku a manda mi. Si un hende ta deseá di hasi Su boluntat, lo e sa si ta di Dios e siñansa ta òf si ta di mi mes ideanan mi ta papia.” (Huan 7:16, 17) Sí, loke Hesus tabata siña hende tabata na armonia ku Dios su Lei. Bon mirá, mester tabata bisto ku Hesus no tabata buska su mes gloria ma tabata ke pa hende duna gloria na Dios.

Hesus a puntra nan: “Moises no a duna boso e Lei? Ma ningun di boso no ta obedesé e Lei. Pakiko boso ta buska mi pa mata?” Tabatin hende den e multitut—ku probablemente a bini di otro stat—ku no tabata sa ku tabatin hende ta buska Hesus pa mata. Nan no por a imaginá nan mes ku por tabatin hende ta buska un bon maestro manera Hesus pa mata. P’esei, nan a pensa ku mester tabatin algu malu ku Hesus pa e por a bisa un kos asina. Nan a bisa Hesus: “Bo tin un demoño! Ta ken ta buska bo pa mata?”—Huan 7:19, 20.

Wèl, ta e lidernan hudiu tabata ke mata Hesus un aña i mei promé despues ku el a kura un hòmber riba sabat. Awor bon, pa mustra kon irasonabel su oyentenan tabata, Hesus a kuminsá rasoná ku nan na un manera ku lo a pone nan pensa profundamente. Hesus a hala nan atenshon na e echo ku, bou di e Lei, un yu hòmber mester a ser sirkunsidá riba e di ocho dia despues ku e nase, asta si e dia ei tabata sabat. El a puntra nan: “Si boso ta sirkunsidá un hende riba sabat pa no kibra ku Lei di Moises, kon bini boso ta bira razu riba mi pasobra mi a hasi un hende kompletamente salú riba sabat? Stòp di husga segun aparensia, ma husga na un manera hustu.”—Huan 7:23, 24.

Algun di e habitantenan di Herúsalèm, kendenan tabata sa di e asuntu, a kuminsá bisa: “Ma no ta e hòmber akí nan [e lidernan] ta buska pa mata? At’é ta papia públikamente, i nan no ta bis’é nada. Akaso nos lidernan a haña sa sigur ku ta esaki ta Kristu?” Wèl, si tabata asina, dikon anto e pueblo no tabata kere ku Hesus tabata e Kristu? Pasobra e pueblo tabata bisa: “Nos sí sa di unda e hòmber akí ta bini; ma ora Kristu yega, ningun hende lo no sa di unda e ta bini.”—Huan 7:25-27.

Ei mes na e tèmpel, Hesus a kontestá nan: “Boso konosé mi i boso sa tambe di unda mi ta bini. Ademas, mi no a bini riba mi propio inisiativa, ma Esun ku a manda mi ta eksistí di bèrdat, i boso no konos’é. Ami konos’é, pasobra mi ta su representante i ta É a manda mi.” (Huan 7:28, 29) Ora e hendenan a tende e palabranan ei, nan a kuminsá buska moda di gara Hesus,  sea pa enkarsel’é òf pa mat’é. Pero nan no a logra pasobra ainda no tabata su tempu pa muri.

No opstante, hopi hende a pone fe den Hesus, i ku bon motibu. Hesus a kana riba awa, kalma bientu, alimentá míles di hende ku djis un par di pan i piská, kura hende enfermo, pone hende koho kana, laga hende siegu mira, kura hende ku tabatin lepra i a asta lanta hende for di morto. Sí, e hendenan tabatin bon motibu pa puntra: “Akaso ora Kristu yega, lo e hasi mas milager ku e hòmber akí?”—Huan 7:31.

Ora e fariseonan a tende e multitut ta bisa e kosnan akí, nan i e saserdotenan prinsipal a manda algun ofisial pa bai arestá Hesus.