MATEO 4:1-11 MARKO 1:12, 13 LUKAS 4:1-13

  • SATANAS TA PURBA DI HINKA HESUS DEN TENTASHON

Djis despues ku Hesus a batisá, Dios su spiritu a hib’é den desierto di Hudea. Hesus tabatin hopi kos di pensa riba dje. Dikon? Pasobra ora “shelu a habri” p’e, e por a kòrda algun di e kosnan ku el a siña i hasi den shelu. (Mateo 3:16) No tin duda ku e tabatin hopi kos pa meditá riba dje!

Hesus a pasa 40 dia i 40 anochi den e desierto, sin kome nada. Satanas e Diabel tabata sa ku Hesus tabatin hamber i a bini serka dje pa purba di koh’é den trampa. El a bisa Hesus: “Si bo ta yu di Dios, bisa e piedranan akí bira pan.” (Mateo 4:3) Hesus a rechas’é mesora pasobra e tabata sa ku ta malu pa usa e poder ku el a haña di Dios pa satisfasé su mes.

Pero Diabel no a entregá. El a bini ku un otro trampa: El a reta Hesus pa e bula for di e muraya di tèmpel. Pero Hesus no a kai den su trampa i pone un show. Mas bien, el a usa e Skritura pa mustra Satanas ku ta inkorekto pa pone Dios na prueba di e manera ei.

E ora ei, Satanas a bini ku un di tres trampa: El a mustra Hesus “tur e reinonan di mundu i nan gloria” i a bis’é: “Tur esaki lo mi duna bo si bo hinka rudia i adorá mi.” Hesus a bolbe rechas’é. Ku un bos firme i na un manera determiná, Hesus a bis’é: “Bai for di aki, Satanas!” (Mateo 4:8-10) Hesus no a kai den tentashon pa hasi maldat, pasobra e tabata sa ku ta na Yehova so mester rindi sirbishi sagrado. E tabata determiná pa keda fiel na Dios.

Nos por siña algun lès balioso for di e manera ku Hesus a reakshoná ora el a hañ’é ku tentashon. E tentashonnan ku el a hañ’é kuné ta proba bon kla ku Diabel no ta e malu ku tin den hende, manera algun hende sa bisa. Satanas ta un persona real, un persona invisibel ku ta eksistí di bèrdat. E relato ta indiká tambe ku tur gobernashon di mundu ta bou di kontrol di Satanas. Si no tabata asina, su oferta lo no tabata un tentashon.

Ademas, Diabel tabata ke duna Hesus tur e reinonan di mundu a kambio di ún akto di adorashon. Kisas Satanas ta purba di pone nos kai den trampa similar: E por ofresé nos oportunidatnan atraktivo pa bira riku, pa haña poder òf pa haña puesto. Pero si nos ta sabí, nos ta sigui ehèmpel di Hesus i keda fiel na Dios apesar di kualke tentashon. Kòrda tambe ku Satanas a bai laga Hesus “te na un otro momento oportuno.” (Lukas 4:13) E por hasi esei den nos kaso tambe, p’esei semper nos mester keda alerta!