Bai na kontenido

Bai na kontenido

 KAPÍTULO 45

Hesus Tin Poder Riba Demoño

Hesus Tin Poder Riba Demoño

MATEO 8:28-34 MARKO 5:1-20 LUKAS 8:26-39

  • HESUS TA SAKA DEMOÑO I TA LAGA NAN DRENTA PORKO

Ora Hesus su disipelnan a yega na otro banda di Laman di Galilea, despues di a pasa den un situashon angustioso riba laman, nan a haña nan ku un otro problema. Dos hòmber masha feros, poseí pa demoño, a sali for di un santana den bisindario i kore bini den direkshon di Hesus. E relato ta enfoká riba ún di e hòmbernan akí so, kisas pasobra e tabata esun di mas violento i esun ku tabatin mas tempu den gara di demoño.

E pober hòmber akí tabatin hopi tempu ta kana sin paña na su kurpa. Di dia i anochi, e tabata “grita meimei di e grafnan i den seru i tabata kòrta su kurpa ku piedra.” (Marko 5:5) E tabata asina violento ku hende tabatin miedu di pasa kaminda e tabata. Algun hende a asta purba di mar’é na kadena, pero e tabata ranka e kadenanan na su man i pia kibra. Niun hende no tabatin forsa pa domin’é.

Ora el a yega serka Hesus i kai na su pia, e demoñonan ku tabata domin’é a pon’é grita: “Kiko mi tin di haber ku bo, Hesus, Yu di e Dios Haltísimo? Mi ke pa bo hura den nòmber di Dios ku lo bo no kastigá mi.” Hesus a demostrá ku e tin poder riba demoño i a duna e òrdu: “Sali for di e hòmber, spiritu impuru!”—Marko 5:7, 8.

En realidat, e hòmber tabata poseí pa hopi demoño. Ora Hesus a puntra “Kon yama bo?,” el a haña komo kontesta: “Mi yama Legion, pasobra nos ta hopi.” (Marko 5:9) Den ehérsito romano, un legion tabata konsistí di míles di sòldá. Pues, e hòmber akí tabata den gara di hopi demoño i nan tabata gosa inmensamente di mir’é sufri. Nan tabata roga Hesus “pa e no manda nan bai den abismo.” Aparentemente, nan tabata bon na altura kiko ta spera nan i nan lider, Satanas.—Lukas 8:31.

Awor, den bisindario tabatin un trupa di mas o ménos 2.000 porko ta kome. Segun e Lei, porko tabata bestia impuru i e hudiunan no tabatin mag di tin e bestianan akí. E demoñonan a supliká Hesus: “Manda nos den e porkonan pa nos por drenta den nan!” (Marko 5:12) Hesus a bisa nan: “Bai!” I nan a drenta e porkonan.  Henter e trupa di mas o ménos 2.000 porko a saka un kareda, bula for di baranka, kai den laman i hoga.

Ora e hendenan ku tabata kuida e porkonan a mira esaki, nan a kore limpi bai i a konta e hendenan den stat i den kunuku loke a sosodé. Anto e hendenan a sali bin wak kiko a pasa. Ora nan a yega, nan a mira e hòmber ku anteriormente tabata poseí pa demoño bon di salú i na su sano huisio. E tabatin paña na su kurpa i tabata sintá na pia di Hesus.

E hendenan ku a tende ku e hòmber a kura òf ku a mir’é a haña miedu, pasobra nan no tabata sa kiko lo a spera nan. P’esei, nan a supliká Hesus pa e bai for di nan region. Ora Hesus tabata subi boto pa bandoná e lugá, e hòmber ku anteriormente tabata poseí pa demoño a rog’é pa e bai kuné. Pero Hesus a bis’é: “Bai kas serka bo famianan, i konta nan tur loke Yehova a hasi pa bo i kon el a tene miserikòrdia di bo.”—Marko 5:19.

Normalmente, Hesus tabata bisa e hendenan ku el a kura pa nan no konta niun hende pasobra e no tabata ke pa hende pone fe den dje debí na sensashonalismo. Pero den e kaso akí, e hòmber ku a ser librá di demoño i kende tabata prueba palpabel ku Hesus tin poder por a duna testimonio na hende ku Hesus lo no a alkansá. Ademas, e hòmber su testimonio lo por a sirbi pa refutá kualke notisia robes enkuanto desaparishon di e porkonan. Pues, e hòmber a bai i a kuminsá proklamá den henter Dekápolis loke Hesus a hasi p’e.