Bai na kontenido

Bai na kontenido

 KAPÍTULO 41

Ku Poder di Ken Hesus Tabata Hasi Milager?

Ku Poder di Ken Hesus Tabata Hasi Milager?

MATEO 12:22-32 MARKO 3:19-30 LUKAS 8:1-3

  • HESUS TA KUMINSÁ KU SU DI DOS GIRA DI PREDIKASHON

  • E TA SAKA DEMOÑO I TA SPIÈRTA HENDE PA NAN NO KOMETÉ PIKÁ IMPERDONABEL

Un poko promé, Hesus tabata na kas di Simon, e fariseo, i a papia di pordon. Awor, Hesus a kuminsá un otro gira pa prediká na Galilea. Tabata su di dos aña di sirbishi, i e no tabata biahando su so. E 12 apòstelnan i algun di e hende muhénan ku “el a libra di demoño i kura di malesa” tambe tabata huntu kuné. (Lukas 8:2) Entre nan tabatin Maria Magdalena, Susana i Huana kende su esposo tabata un ofisial di Rei Heródes Antipas.

Segun ku mas hende tabata haña sa di Hesus, mas kontroversia tabata lanta tokante su aktividatnan. Esei tabata bisto ora ku nan a trese un hòmber siegu i muda, kende tabata poseí pa demoño, serka Hesus i el a kur’é. Despues ku e hòmber a ser librá di demoño, e por a mira i papia. E hendenan a keda babuká i tabata puntra: “Ta esaki lo ta e Yu di David?”—Mateo 12:23.

Tabatin un multitut grandi di hende na e kas kaminda Hesus tabata. Tabatin asina tantu hende ku Hesus i su disipelnan no a haña ni chèns di kome. Pero no ta tur hende tabata kere ku Hesus tabata e ‘Yu primintí di David.’ Algun eskriba i fariseo a bini di leu, for di Herúsalèm—pero no pa siña di Hesus ni pa sosten’é. Nan tabata bisa e hendenan ku Hesus tin “Belzebub,” esta, ku e tabata hasi milager ku yudansa di “e gobernante di demoño.” (Marko 3:22) Ora Hesus su famianan a tende di e konmoshon ku tabata reina, nan a bin buska Hesus pa e bai ku nan. Dikon?

E tempu ei, ainda Hesus su propio rumannan no tabata kere ku e ta Yu di Dios. (Huan 7:5) E Hesus ku aparentemente a kousa e konmoshon ei no por tabata e Hesus ku nan tabata konosé i ku a lanta huntu ku nan na Názarèt. Nan a pensa ku Hesus mester tabatin un òf otro problema mental; nan a bisa: “El a bira di kabes.”—Marko 3:21.

 Pero kiko e pruebanan a mustra? Hesus a kaba di saka demoño for di un hòmber ku despues por a mira i papia. Ningun hende no por a nenga esaki. P’esei, e eskribanan i e fariseonan a usa akusashonnan falsu pa purba di desakreditá Hesus. Nan a bisa: “Ta ku yudansa di Belzebub, gobernante di demoño, e hòmber akí ta saka demoño.”—Mateo 12:24.

Komo ku Hesus tabata sa loke e eskriba- i e fariseonan tabata pensa, el a bisa: “Tur reino ku ta dividí ta kaba na nada, i ningun stat òf kas ku ta dividí lo keda para. Asina tambe, si Satanas ta saka Satanas, e ta dividí; anto ta kon su reino lo keda para?”—Mateo 12:25, 26.

Ki un manera lógiko di rasoná! E fariseonan tabata sa ku algun hudiu tambe tabata saka demoño. (Echonan 19:13) P’esei, Hesus a puntra nan: “Si ta ku yudansa di Belzebub mi ta saka demoño, ta ku yudansa di ken boso yunan ta saka nan anto?” Ku otro palabra, loke nan tabata akus’é di dje lo a konta pa nan tambe. El a sigui rasoná ku nan: “Ma si ta ku yudansa di e spiritu di Dios mi ta saka demoño, anto e Reino di Dios realmente a kue boso di sorpresa.”—Mateo 12:27, 28.

Pa ilustrá ku e echo ku e por saka demoño ta un prueba ku e tin mas poder ku Satanas, Hesus a bisa: “Kon un hende por drenta kas di un hòmber fuerte i hòrta su kosnan? E tin ku mara e hòmber fuerte promé. E ora ei numa lo e por plùnder e kas. Esun ku no ta na mi banda ta kontra mi, i esun ku no ta traha huntu ku mi pa yuda hende bini serka mi ta kore ku hende.” (Mateo 12:29, 30) No tin duda ku e eskribanan i e fariseonan tabata kontra Hesus; esei a duna prueba ku nan tabata representante di Satanas. Nan tabata kore ku hende for di e Yu di Dios, kende tabata hasi su trabou ku yudansa di Yehova.

Pa spièrta su opositornan ku tabata bou di influensia di Satanas, Hesus a bisa: “Hende por haña pordon pa tur kos, sin importá ki piká nan kometé i ki blasfemia nan papia. Ma esun ku blasfemá kontra spiritu santu hamas lo haña pordon; lo e ta kulpabel di piká pa semper.” (Marko 3:28, 29) Bo por imaginá bo e konsekuensianan horibel ku un hende por hañ’é kuné si e ta atribuí na Satanas loke klaramente ta obra di Dios su spiritu santu?