HUAN 5:17-47

  • DIOS TA TATA DI HESUS

  • E SPERANSA DI RESUREKSHON

Ora algun hudiu a akusá Hesus di a kibra lei di sabat kurando un hòmber, Hesus a bisa nan: “Mi Tata ta traha te ainda, i ami tambe ta sigui traha.”—Huan 5:17.

E lei di Dios tokante sabat no a prohibí loke Hesus tabata hasiendo. Bon mirá, ora e tabata prediká e bon notisia i kura hende, e tabata imitá e bon obranan di Dios. P’esei, Hesus a sigui hasi bon obra tur dia. E kontesta ku el a duna a pone e hendenan ku a akus’é rabia mas, i nan a kuminsá buska manera pa mat’é. Dikon nan a reakshoná asina?

Wèl, nan tabata kere eróneamente ku Hesus tabata kibra lei kurando hende riba sabat. Ademas, nan tabata kunsumí ku Hesus tabata bisa ku e ta Yu di Dios. Pa nan, Hesus tabata blasfemando. Segun nan, e echo ku Hesus tabata bisa ku Dios ta su Tata tabata komo si fuera e tabata bisa ku e ta igual ku Dios. Ma Hesus no tabatin miedu di nan. El a sigui papia ku nan tokante e relashon spesial ku e tin ku Dios. El a bisa nan: “E Tata tin kariño pa e Yu i ta mustr’é tur loke e ta hasi.”—Huan 5:20.

E Tata ta e Dunador di Bida, i el a demostrá esaki den pasado ora el a duna hende poder pa lanta morto. Hesus a sigui bisa: “Meskos ku e Tata ta lanta e mortonan i duna nan bida, asina e Yu tambe ta duna esnan ku e ke bida.” (Huan 5:21) E palabranan akí sigur ta duna hende speransa pa futuro! Pero for di e tempu ei kaba e Yu tabata lanta hende for di morto, ma den sentido spiritual. P’esei, el a bisa: “Esun ku tende mi palabra i kere Esun ku a manda mi lo haña bida eterno, i lo e no ser husgá, ma lo e ta manera un hende ku a pasa di morto pa bida.”—Huan 5:24.

Aunke e Skritura no ta mustra ku pa e tempu ei Hesus a yega di lanta hende literalmente for di morto, Hesus a bisa su akusadónan ku esaki lo sosodé sigur. El a bisa: “Lo yega e ora ku tur esnan ku ta den graf lo tende su stèm i lo sali afó.”—Huan 5:28, 29.

Ta pa promé bes Hesus a splika públikamente su papel importante den e propósito di Dios, esta, ku lo e fungi komo hues pa Dios i lanta hende for di morto. Apesar di e papel di sumo importansia ei, Hesus a mustra bon kla ku e ta ménos ku Dios. El a bisa: “Mi no por hasi nada riba mi propio inisiativa. . . . Mi no ta buska pa hasi mi mes boluntat, ma di Esun ku a manda mi.” (Huan 5:30) Awor, ta Hesus so a duna testimonio ku e ta Yu di Dios? No tabatin otro testimonio ku por a konvensé e personanan ku tabata akus’é falsamente? Hesus mes a rekordá nan: “Boso a manda hende serka Huan [Boutista], i el a duna testimonio di e bèrdat.”—Huan 5:33.

Sí, un dos aña promé, e personanan akí lo mester a tende kiko Huan Boutista a bisa e lidernan religioso hudiu tokante e Persona ku lo a bini despues di dje, kende e hendenan lo a yama “e Profeta” i e “Kristu.” (Huan 1:20-25) Pa kòrda su akusadónan kuantu apresio nan tabatin pa Huan, kende e tempu ei tabata prezu, el a bisa: “Pa un tempu kòrtiku boso tabata dispuesto pa alegrá den su lus.” (Huan 5:35) Pero Hesus su testimonio a surpasá esun di Huan Boutista.

Hesus a bisa nan ku ‘e obranan ku e ta hasi [inkluso e kurashon ku el a kaba di hasi] ta duna testimonio ku ta e Tata a mand’é.’ Es mas, Hesus a bisa: “E Tata ku a manda mi, ta e mes a duna testimonio di mi.” (Huan 5:36, 37) Un okashon ku Dios a hasi esaki ta na Hesus su boutismo.—Mateo 3:17.

Pues no tin duda, Hesus su akusadónan no tabatin ningun motibu pa rechas’é. Asta e Palabra di Dios ku nan tabata pretendé di ta analisá ta duna testimonio di Hesus. Por último Hesus a bisa nan: “Si boso a kere Moises, boso lo a kere mi, pasobra el a skirbi tokante mi. Ma si boso no ta kere ni loke é a skirbi, kon boso lo kere loke ami ta bisa?”—Huan 5:46, 47.