Bai na kontenido

Bai na kontenido

 KAPÍTULO 136

Na Laman di Galilea

Na Laman di Galilea

HUAN 21:1-25

  • HESUS TA APARESÉ NA LAMAN DI GALILEA

  • PEDRO I OTRO DISIPELNAN MESTER KUIDA E KARNÉNAN

Riba e último anochi ku Hesus a pasa ku su apòstelnan, el a bisa nan: “Despues ku mi lanta for di morto, lo mi bai Galilea i warda boso einan.” (Mateo 26:32; 28:7, 10) P’esei, hopi di su siguidónan a bai Galilea. Pero kiko nan mester a hasi einan?

Dado momento, Pedro a bisa seis di e apòstelnan: “Mi ta bai piska.” Nan a bis’é: “Nos tambe ta bai ku bo.” (Huan 21:3) Nan a piska henter anochi sin kue nada. Ora dia tabata habri, Hesus a aparesé na e laman, pero nan no a realisá ku tabata Hesus. Hesus a grita: “Muchanan, boso tin algu di kome?” Nan a kontest’é: “Nò!” Hesus a bisa nan: “Tira e reda na banda drechi di e boto, i boso lo haña algu.” (Huan 21:5, 6) Nan a hasi esei i a kue asina tantu piská ku nan no por a hala e reda aden.

Huan a bisa Pedro: “Ta nos Señor!” (Huan 21:7) Mesora, Pedro a bisti su paña djariba, ku el a kita ora e tabata piska, bula na awa i landa un 90 meter bai kantu. E otro apòstelnan a bini kantu den e boto, lastrando e reda ku tabata yen yen di piská.

Ora nan a yega kantu, nan a mira “un kandela di karbon, ku piská poné riba e karbonnan, i tambe pan.” Hesus a bisa nan: “Trese algun di e piskánan ku boso a kaba di kue.” Pedro a hala e reda trese, i esaki tabata kontené na tur 153 piská grandi. Hesus a bisa nan: “Bin desayuná.” Niun di e apòstelnan no tabatin kurashi pa puntra Hesus: “Ta ken bo ta?” Nan tabata sa ku tabata Hesus. (Huan 21:9-12) Tabata e di tres biaha ku el a aparesé na su disipelnan komo grupo.

Hesus a duna kada un di nan pan i piská pa nan kome. Anto probablemente mirando den direkshon di e piskánan ku nan a kue, Hesus a puntra Pedro: “Simon, yu di Huan, bo stima mi mas ku esakinan?” Akaso e negoshi di piskamentu tabata mas pegá na Pedro su kurason ku e trabou ku Hesus tabata ke pa e hasi? Pedro a kontest’é: “Sí, Señor, bo sa ku mi stima bo.” Hesus a bis’é: “Kuida mi lamchinan.”—Huan 21:15.

Anto Hesus a bolbe puntr’é: “Simon, yu di Huan, bo stima mi?” Pedro, kende kisas tabata un poko konfundí, a kontest’é onestamente: “Sí, Señor, bo sa ku mi stima bo.” Hesus a bolbe bis’é: “Kuida mi lamchinan.”—Huan 21:16.

Hesus a bolbe puntra Pedro pa di tres biaha: “Simon, yu di Huan, bo stima mi?” Pedro, kende lo a kuminsá pensa ku Hesus tabata duda den su lealtat, a kontestá enfátikamente: “Señor, bo sa tur kos; bo sa ku mi stima bo.” Hesus a bolbe enfatisá loke Pedro tabatin ku hasi. El a bis’é: “Kuida mi lamchinan.” (Huan 21:17) Sí, e rumannan ku ta dirigí e kongregashon kristian mester kuida e karnénan den Dios su kurá.

Manera nos a mira, Hesus a ser mará i ehekutá debí ku e tabata hasi e trabou ku Dios a mand’é hasi. Awor, Hesus a revelá ku Pedro lo a eksperensiá algu similar. Hesus a bisa Pedro: “Tempu bo tabata mas yòn, bo mes tabata bisti bo paña i kana bai unda ku bo tabata ke. Ma ora bo bira bieu, lo bo saka bo mannan i un otro hende lo bisti bo i hiba bo kaminda bo no ke bai.” Anto, el a urgi Pedro: “Keda sigui mi.”—Huan 21:18, 19.

Pedro a bira wak apòstel Huan i a puntra Hesus: “Señor, kiko di e hòmber akí?” Sí, kiko tabata spera e apòstel ku Hesus tabata stima mashá? Hesus a kontest’é: “Si mi ke pa e keda te ora ku mi bini, ta bo asuntu esei?” (Huan 21:21-23) Bon mirá, Pedro mester a sigui Hesus sin wòri kiko otro hende lo a hasi. No opstante, Hesus a duna di komprondé ku Huan lo a biba mas largu ku e otro apòstelnan i ku lo el a haña un vishon tokante Hesus su binida den poder di Reino.

Ta klaru ku tin hopi kos mas ku Hesus a hasi, pero lo tabatin mester di un kantidat inkontabel di ròl pa skirbi tur e kosnan akí.