Bai na kontenido

Bai na kontenido

 KAPÍTULO 139

Hesus Ta Hasi Tera un Paradeis i Ta Terminá Su Asignashon

Hesus Ta Hasi Tera un Paradeis i Ta Terminá Su Asignashon

1 KORINTIONAN 15:24-28

  • LOKE LO PASA KU E KARNÉNAN I E KABRITUNAN

  • HOPI HENDE LO DISFRUTÁ DI PARADEIS RIBA TERA

  • HESUS TA E KAMINDA, E BÈRDAT I E BIDA

Djis despues ku Hesus a batisá, el a hañ’é ku un enemigu ku tabata determiná pa pon’é frakasá asta promé ku el a kuminsá ku su sirbishi aki riba tera. Sí, Diabel a hasi vários intento pa kohe Hesus den trampa. Relashoná ku e malbado akí, Hesus a bisa despues: “E gobernante di mundu ta bini. E no tin poder riba mi.”—Huan 14:30.

Den un vishon, apòstel Huan a mira di antemano kiko lo a pasa ku “e dragon grandi, e kolebra original,” esun ku yama “Diabel i Satanas.” El a mira ku e enemigu kruel akí di humanidat lo a ser saká for di shelu i ku lo el a keda “yen di rabia, pasobra e sa ku a ked’é masha poko tempu.” (Revelashon 12:9, 12) Kristiannan berdadero tin bon motibu pa kere ku nos ta bibando den e “poko tempu” ei ku a keda “e dragon, e kolebra original,” i ku pronto lo e ser tirá den abismo, kaminda lo e keda inaktivo pa 1.000 aña. Durante e tempu ei, Hesus lo goberná den e Reino di Dios.—Revelashon 20:1, 2.

Kiko lo pasa ku nos planeta durante e tempu ei? Ken lo biba riba tera i kon e situashon lo ta? Hesus mes a kontestá e preguntanan ei. Den su ilustrashon tokante karné i kabritu, el a indiká kiko ta spera hende fiel manera karné, ku ta kooperá ku Hesus su rumannan i ta yuda nan. I el a indiká bon kla tambe kiko lo pasa ku hende ku ta hasi lo kontrario, esta, hende manera kabritu. Hesus a bisa: “Esakinan [e kabritunan] lo haña morto eterno, ma e hustunan [esta, e karnénan] lo haña bida eterno.”—Mateo 25:46.

Esaki ta yuda nos komprondé loke Hesus a primintí e kriminal ku tabata kologá na staka banda di dje. Hesus no a bisa e hòmber ei, ku a arepentí, ku lo e haña mesun rekompensa ku e apòstelnan fiel, esta, ku lo e forma parti di e Reino selestial. Nò, Hesus a primintié:  “Di bèrdat mi ta bisa bo awe: Lo bo ta ku mi den Paradeis.” (Lukas 23:43) Pues, Hesus a duna e hòmber ei e speransa di bida pa semper den un dushi ambiente: den Paradeis, ku ta manera un hardin bunita. P’esei, ta lógiko ku tur hende ku Hesus konsiderá komo karné “lo haña bida eterno” den Paradeis aki riba tera.

Apòstel Huan tambe a duna un deskripshon di e kondishonnan ku lo reina ora tera bira un paradeis. El a bisa: “E tènt di Dios lo ta ku humanidat, i lo e biba huntu ku nan, i nan lo ta su pueblo. I Dios mes lo ta huntu ku nan. I lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”—Revelashon 21:3, 4.

Pero pa e kriminal por disfrutá di bida den Paradeis, e mester ser lantá for di morto. I no ta e so lo ser resusitá, pasobra Hesus a bisa bon kla ku “lo yega e ora ku tur esnan ku ta den graf lo tende su stèm i lo sali afó: esnan ku hasi loke ta bon pa un resurekshon di bida i esnan ku praktiká maldat pa un resurekshon di huisio.”—Huan 5:28, 29.

Pero kiko di e apòstelnan fiel i e restu di e tou chikitu ku lo ta den shelu huntu ku Hesus? Beibel ta bisa: “Nan lo ta saserdote di Dios i di Kristu, i nan lo reina komo rei huntu kuné pa e 1.000 añanan.” (Revelashon 20:6) Tur e hende hòmbernan i e hende muhénan ku lo goberná huntu ku Kristu lo ta personanan ku a yega di biba riba tera. Pues, nos por tin sigur ku nan lo ta gobernantenan ku lo tin kompashon i ku lo mustra komprenshon pa hende riba tera.—Revelashon 5:10.

Hesus lo perkurá pa humanidat benefisiá plenamente di su sakrifisio di reskate, i lo e eliminá tur efekto di piká ku hende a heredá. E i su ko-gobernantenan lo sòru pa hende fiel bira perfekto. Sí, e ora ei, hende lo disfrutá di e bida ku Dios tabata ke pa nos tin for di prinsipio, for di tempu ku el a bisa Adam ku Eva pa nan multipliká i yena tera. Asta morto ku nos a heredá debí na Adam su desobedensia lo ser eliminá!

Pues, Hesus lo kumpli ku tur loke Yehova a mand’é hasi. I na final di e 1.000 añanan, Hesus lo entregá e Reino i tambe e famia humano perfekto na su Tata. Relashoná ku e bunita akto di humildat akí, apòstel Pablo a skirbi: “Ora ku tur kos keda someté na dje, e ora ei e Yu mes tambe lo someté su mes na Esun ku a someté tur kos na dje, pa Dios por ta tur kos pa tur hende.”—1 Korintionan 15:28.

Ta bisto anto ku Hesus ta hunga un papel masha importante den kumplimentu di Dios su glorioso propósito. I sea kual sea e propósito ku Yehova tin pa futuro, Hesus semper lo sigui kumpli ku e papel ku el a deskribí pa su mes. Hesus a bisa: “Ami ta e kaminda, e bèrdat i e bida.”—Huan 14:6.