Bai na kontenido

Bai na kontenido

 KAPÍTULO 27

“Ki Grandi Ta Bo Bondat!”

“Ki Grandi Ta Bo Bondat!”

1, 2. Kon amplio e bondat di Dios ta, i kon Beibel ta enfatisá e kualidat aki?

BOU di e bunita rayonan di un solo ku ta baha, un grupo di amigu di hopi tempu ta disfrutá di un piknik. Nan ta hari i papia ku otro segun ku nan ta atmirá e bista. Leu for di einan, un kunukero ta wak su kunuku i ta smail, satisfecho di mira ku nubia skur a forma i e promé gotanan di awa a kai kaba riba e tera seku di su plantashi. Otro kaminda, un pareha ta bira loko di kontentu ora nan ta mira nan yu totobiá i dal su promé pasonan.

2 Sea ku e hendenan ei sa òf nò, nan tur ta benefisiando di e mesun kos: e bondat di Yehova Dios. Hopi bes bo por tende hende religioso bisa: “Dios ta bon.” Beibel ta bis’é ku hopi mas énfasis. E ta bisa: “Ki grandi ta bo bondat!” (Salmo 31:19) Pero ta parse ku masha poko hende awendia sa kiko e palabranan ei ta nifiká. Kiko e bondat di Yehova Dios ta enserá eksaktamente, i ki efekto e kualidat di Dios aki tin riba kada un di nos?

Un Aspekto Importante di e Amor di Dios

3, 4. Kiko ta bondat, i dikon e mihó manera di deskribí bondat ta komo un muestra di Dios su amor?

3 Den hopi idioma moderno, “bondat” ta un palabra un tiki vago. Pero Beibel sí no ta splika bondat komo algu vago. Bondat ta enserá prinsipalmente birtut i ekselensia moral. P’esei, den e sentido ei nos por bisa ku bondat ta bisto den tur faseta di Yehova su personalidat. Tur su kualidatnan, inkluso su poder, hustisia i sabiduria, ta kompletamente bon. Ma probablemente nos por deskribí bondat mihó komo un di e maneranan ku Yehova su amor ta sali na kla. Dikon?

 4 Bondat ta un kualidat ku ta ser demostrá ku akshon. Apòstel Pablo a mustra ku un hende bondadoso ta asta mas deseabel ku un hende hustu. (Romanonan 5:7) Bo por konta ku un hende hustu lo pega fielmente na loke lei ta eksigí, pero un hende bon ta bai asta mas leu. E ta tuma inisiativa; e mes ta buska maneranan pa hasi bon pa otro. Manera nos ta bai mira, sin duda Yehova ta bon den e sentido ei. I klaramente, su bondat ta produkto di su amor infinito.

5-7. Dikon Hesus a nenga pa nan yam’é “Bon Maestro,” i ki bèrdat profundo el a reafirmá asina?

5 Yehova ta inkomparabel den su bondat tambe. Poko promé ku Hesus a muri, un hòmber a aserk’é pa puntr’é algu, i a dirigí su mes na dje komo “Bon Maestro.” Hesus a respondé: “Pakiko bo ta yama mi bon? Ni un hende no ta bon, sino Dios so.” (Marko 10:17, 18) Ma loke el a respondé por zona straño. Dikon Hesus mester a korigí e hòmber? Akaso Hesus no tabata un “Bon Maestro”?

6 Evidentemente, e hòmber a usa e ekspreshon “Bon Maestro” komo un título pa labia Hesus. Ku modestia, Hesus a dirigí e gloria na su Tata den shelu, esun ku ta supremamente bon. (Proverbionan 11:2) Ademas, e kontesta di Hesus a hala atenshon na un bèrdat profundo. Ta Yehova so ta sirbi komo e kriterio di loke ta bon. Ta e so tin e derecho soberano di disidí kiko ta bon i kiko ta malu. Adam ku Eva a purba tuma e derecho ei pa nan mes dor di rebeldiá i kome for di e palu di konosementu di bon i malu. Hesus ta kompletamente diferente. Humildemente e ta laga su Tata so fiha e normanan di loke ta bon i malu.

7 Ademas, Hesus tabata sa ku ta Yehova ta e fuente di tur loke ta berdaderamente bon. E ta e Dunadó di “tur bon regalo i tur don perfekto.” (Santiago 1:17) Ban wak kon Yehova su bondat ta bira bisto dor di su generosidat.

 Evidensia di Yehova Su Bondat Abundante

8. Kon Yehova a mustra bondat na henter humanidat?

8 Tur hende ku a yega di biba a benefisiá di Yehova su bondat. Salmo 145:9 ta bisa ku Yehova ta “bon pa tur.” Kiko ta algun ehèmpel di e bondat aki? Beibel ta bisa: “E no a laga su mes sin testimonio, dor ku el a hasi bon i a manda áwaseru for di shelu i tempu di bon kosecha pa boso, i a satisfasé boso kurason ku kuminda i alegria.” (Echonan 14:17) Bo a yega di sinta kome un bon kuminda, anto sinti ku el a lanta bo ánimo? Wèl, si no ta pasobra Yehova den su bondat a diseñá e tera aki di tal manera ku e ta keda resiklá awa konstantemente pa nos tin awa fresku, i pa tin ‘tempunan di bon kosecha’ pa duna nos kuminda na abundansia, lo no tabatin kuminda mes. I no ta na hende ku ta stim’é so Yehova ta dirigí tal bondat, sino na tur  hende. Hesus a bisa: “E ta hasi su solo sali riba mal hende i riba bon hende, i ta laga awa yobe riba hende hustu i riba hende inhustu.”—Mateo 5:45.

Yehova ta “manda áwaseru for di shelu i tempu di bon kosecha pa boso”

9. Kon apel ta ilustrá Yehova su bondat?

9 Hopi hende no ta para ketu i apresiá tur e generosidat abundante ku humanidat ta disfrutá di dje debí na e akshon konstante di solo, áwaseru i tempu di kosecha. Tuma por ehèmpel un apel. E ta un fruta komun den mayoria zona templá di mundu. Pero e ta bunita, dushi pa kome i yen di awa refreskante i nutriente vital. Bo tabata sa ku tin mas ku 7.500 tipo di apel na mundu? Tin apel kòrá, oraño, hel, bèrdè, i nan tamaño ta varia di un poko mas grandi ku  un chèri te grandura di un grapefruit. Si bo tene un simia di apel den bo man, e por parse insignifikante. Pero ta for di dje un di e palunan di mas bunita ta krese. (Kantika di Salomon 2:3) Tur lènte palunan di apel ta haña un korona presioso di flor, i tur hèrfst nan ta produsí fruta. Komo promedio, un palu di apel ta keda produsí sufisiente fruta pa yena 20 kaha di 19 kilo, i e ta hasi esaki tur aña, tin biaha pa 75 aña largu!

E simia chikitu aki ta produsí un palu ku por alimentá i deleitá hende pa dékadanan largu

10, 11. Kon nos sentidonan ta demostrá e bondat di Dios?

10 Den su bondat infinito, Yehova a duna nos un kurpa “maravioso,” ku sentidonan ku ta permití nos kontemplá su obranan i disfrutá di nan. (Salmo 139:14) Kòrda bèk riba e esenanan deskribí na kuminsamentu di e kapítulo aki. Kiko ta deleitá nos bista na momentunan asina? E kara kontentu di un mucha. Un kortina di áwaseru ku ta baha riba un kunuku. E kolónan kòrá, oraño i lila den shelu ora solo ta baha. Hende su wowo ta diseñá pa kapta mas ku 300.000 diferente koló! I nos sentido di oido por kapta variashonnan di tono masha leve den stèm di un hende ku nos ta stima, bientu ku ta supla suave dor di palunan, i un beibi ku ta hari, loko di kontentu. Kon bin nos ta kapas pa disfrutá di imágen- i zonidunan asina? Beibel ta bisa: “Orea ku ta tende i wowo ku ta mira, SEÑOR a traha tur dos.” (Proverbionan 20:12) Pero esakinan ta apénas dos di nos sentidonan.

11 Nos sentido di olfato ta otro evidensia di Yehova su bondat. Hende su nanishi por distinguí komo 10.000 holó diferente. Pensa riba djis un par di nan: e holo di bo kuminda faborito riba kandela, di áwaseru, flor òf laman. I bo sentido di takto ta permití bo sinti bientu karisiá bo kara, e abraso tierno di un hende ku bo ta stima, i e suavedat di un fruta. Ora bo dal un hap den dje, bo sentido di smak ta drenta den wega. Un variedat di sabor ta deleitá bo paladar  segun ku bo lenga ta detektá e variashonnan leve di smak formá dor di e komposishon kímiko kompliká di e fruta. Sí, nos tin tur motibu pa sklama asin’aki tokante Yehova: “Ki grandi ta bo bondat, ku bo a warda pa esnan ku tin temor di bo!” (Salmo 31:19) Pero, ta den ki sentido Yehova a “warda” bondat pa hende ku ta tem’é?

Bondat ku Benefisionan Eterno

12. Ki tipo di perkurashon di Yehova ta mas importante, i dikon?

12 Hesus a bisa: “Ta pará skirbí: ‘Hende lo no biba di pan so, ma di tur palabra ku ta sali for di boka di Dios.’” (Mateo 4:4) Sí, loke Yehova ta perkurá pa nos den sentido spiritual por yuda nos asta mas ku perkurashonnan material, pasobra nan por dura pa semper. Na Kapítulo 8 di e buki aki nos a mira ku den e último dianan aki Yehova a usa su poder pa restorá pa krea un paradeis spiritual. Un parti prinsipal di e paradeis ei ta e abundansia di alimento spiritual ku tin disponibel awor.

13, 14. (a) Kiko profeta Ezekiel a mira den un vishon, i kiko e ta nifiká pa nos awe? (b) Ki perkurashonnan Yehova ta hasi disponibel pa su sirbidónan fiel por haña bida?

13 Den un di e gran profesianan di restorashon den Beibel, profeta Ezekiel a risibí un vishon di un tèmpel restorá i glorioso. Tabatin awa ta kore sali for di dje. E awa aki tabata bira mas i mas hanchu, i mas i mas profundo, te bira un “riu.” Unda ku e riu a pasa el a trese bendishon. Na kantu di dje tabatin palu ta krese ku tabata duna alimento i kurashon. I e riu a asta debolbé bida i produktividat na Laman Morto, ku su awanan salu i sin bida! (Ezekiel 47:1-12) Pero, kiko tur esei ta nifiká?

14 E vishon a nifiká ku Yehova tabata bai restorá su areglo pa adorashon puru, loke e tèmpel di Ezekiel a simbolisá. Meskos ku e riu den e vishon, Dios su perkurashonnan pa nos haña bida ta basha sali na un manera kada bes  mas abundante. For di momentu ku adorashon puru a ser restorá na 1919, Yehova a bendishoná su pueblo ku perkurashonnan ku ta duna bida. Kon? Wèl, miónes di hende a siña konosé bèrdatnan vital pa medio di Beibel, literatura bíbliko, reunion i asamblea. Yehova ta usa tal medionan pa siña hende tokante e perkurashon di mas importante ku el a hasi pa nos haña bida—e sakrifisio di reskate di Kristu, ku ta hasi posibel pa ken ku ta stima i teme Dios di bèrdat, por haña un posishon limpi dilanti Yehova, i e speransa di biba pa semper. * P’esei, atraves di e último dianan aki, maske mundu ta sufri hamber spiritual, Yehova su pueblo sí ta disfrutando di un bankete spiritual.—Isaias 65:13.

15. Kon hende fiel ta bai sinti Yehova su bondat durante e Reinado di Mil Aña di Kristu?

15 Pero e riu ku Ezekiel a mira den e vishon no ta stòp di kore ora e sistema mundial bieu aki yega su fin. Al kontrario, durante e Reinado di Mil Aña di Kristu e ta bai kore na un manera asta mas abundante. E ora ei, pa medio di e Reino Mesiániko, Yehova ta bai usa e balor kompletu di e sakrifisio di Hesus pa pokopoko humanidat por yega na perfekshon. Esta felis nos lo ta n’e tempu ei den Yehova su bondat!

Mas Faseta di Yehova Su Bondat

16. Kon Beibel ta mustra ku Yehova su bondat ta enserá otro kualidatnan, i kua ta algun di nan?

16 Yehova su bondat ta enserá mas ku generosidat so. Dios a bisa Moisés: “Ami mes lo laga tur mi bondat pasa bo dilanti, i lo proklamá e nòmber di SEÑOR bo dilanti.” Despues e relato ta konta: “SEÑOR a pasa su dilanti i a proklamá: ‘SEÑOR, SEÑOR Dios, yen di kompashon i grasia, kende no ta  rabia lihé i kende ta abundá den miserikòrdia i bèrdat.’” (Eksodo 33:19; 34:6) Pues, e bondat di Yehova ta enserá vários otro kualidat ekselente. Laga nos papia riba djis dos di nan.

17. Kiko ta grasia, i kon Yehova ta trata simpel hende imperfekto ku grasia?

17 “Grasia.” E kualidat aki ta bisa nos hopi tokante Yehova su manera di trata ku su kriaturanan. Na lugá di ta brutu, friu òf tirániko, manera sa ta e kaso hopi bes ku hende poderoso, Yehova ta suave i bondadoso. Por ehèmpel, Yehova a bisa Abram: “Awor hisa bo kara [“por fabor,” NW] i, for di e lugá kaminda bo ta, mira panort, pasùit, pariba i pabou.” (Génesis 13:14) Hopi tradukshon ta laga e ekspreshon “por fabor” afó. Pero ekspertonan di Beibel ta remarká ku den e teksto original na hebreo tin un variashon chikitu di un di e palabranan, ku ta kambia e deklarashon aki di manera ku e no ta un òrdu, sino un petishon kortes. I tin mas lugá den Beibel kaminda esei ta e kaso. (Génesis 31:12, NW; Ezekiel 8:5, NW) Imaginá bo, e Soberano di Universo ta usa “por fabor” papiando ku simpel ser humano! Den e mundu aki, yen di hende brutu, agresivo i ku mal manera, no ta dushi pa mira kon nos Dios Yehova ta trata hende ku grasia?

18. Den ki sentido Yehova ta “abundá den . . . bèrdat,” i ki siguransa e palabranan ei ta duna nos?

18 “Abundá den . . . bèrdat.” Desonrades a bira un kos normal den mundu awendia. Pero Beibel ta rekordá nos: “Dios no ta hende, ku e lo gaña.” (Numbernan 23:19) Tito 1:2 ta asta bisa ku “Dios . . . no por gaña.” E ta muchu bon p’e hasi un kos asina. P’esei, Yehova su promesanan ta kompletamente konfiabel; su palabranan ta kumpli sigur. Yehova ta asta ser yamá e “Dios di bèrdat.” (Salmo 31:5, BPK) I Dios no ta djis keda sin papia falsedat so; e ta komuniká bèrdat na abundansia tambe. E no ta un persona ku gusta tene tur kos sekreto. Generosamente e ta iluminá su sirbidónan  fiel ku su suministro interminabel di sabiduria. * Asta e ta siña nan kon pa biba di akuerdo ku e bèrdat ku e ta hasi disponibel, pa asina nan por sigui ‘kana den bèrdat.’ (3 Juan 3) Awor, en general, ki efekto Yehova su bondat tin riba kada un di nos individualmente?

“Radiante pa Motibu di e Bondat” di Yehova

19, 20. (a) Kon Satanas a purba suak e konfiansa ku Eva tabatin den Yehova su bondat, i ku ki resultado? (b) E echo ku Yehova ta bon mester tin ki sorto di efekto riba nos, i dikon?

19 Ora Satanas a tenta Eva den Hòfi di Edén, el a kuminsá na suak Eva su konfiansa den Yehova su bondat na un manera sutil. Yehova a bisa Adam: “Di tur palu di e hòfi bo mag kome libremente.” Di tur e míles di palunan ku lo tabata dòrna e hòfi, ta for di unu so Yehova a nenga Adam di kome. Pero wak kon Satanas a formulá su promé pregunta na Eva: “Di bèrdat Dios a bisa: ‘Bo no mag kome di [“tur,” NW] palu di e hòfi?’” (Génesis 2:9, 16; 3:1) Satanas a trose Yehova su palabranan pa pone Eva pensa ku Yehova tabata neng’é algu ku lo tabata bon p’e. Lamentablemente, su táktika a duna resultado. Eva, meskos ku asina tantu otro hende hòmber i muhé despues, a kuminsá duda den Dios su bondat, siendo ku ta é a duna Eva tur loke Eva tabatin.

20 Nos sa bon kuantu tristesa i miseria e tipo di pensamentunan ei ta trese ku nan. P’esei, laga nos tuma na pechu loke Jeremias 31:12 ta bisa: “Nan . . . lo ta radiante pa motibu di e bondat di SEÑOR.” En bèrdat, Yehova su bondat mester hasi nos radiante di goso. Nunka nos no tin motibu pa duda kiko ta motivá nos Dios, pasobra e ta abundá den bondat. Nos por konfia kompletamente den dje, pasobra ta kos bon so e kier pa esnan ku ta stim’é, i nada malu.

21, 22. (a) Di ki manera asina bo tin gana di demostrá bo apresio pa Yehova su bondat? (b)  Kua kualidat nos ta bai trata den e siguiente kapítulo, i den ki sentido e ta diferente for di bondat?

 21 Ademas, ora nos haña chèns pa papia ku otro hende tokante Dios su bondat, nos ta hasié ku goso. Wak kiko Salmo 145:7 ta bisa tokante Yehova su pueblo: “Ku ánimo nan lo papia di e rekuerdo di bo gran bondat.” Tur dia di nos bida nos ta saka benefisio di un manera òf otro di Yehova su bondat. Pakiko nos no ta forma un kustumber di gradisí Yehova tur dia pa su bondat, siendo mas spesífiko posibel? Si nos pensa riba e kualidat ei, gradisí Yehova tur dia p’e, i konta hende tokante dje, esei lo yuda nos imitá nos bon Dios. I segun ku nos ta buska manera pa hasi bon meskos ku Yehova, nos lo hala mas serka dje. Tempu ku apòstel Juan tabata bieu kaba, el a skirbi: “Ruman stimá, no imitá loke ta malu, sino loke ta bon. Esun ku hasi bon ta di Dios.”—3 Juan 11.

22 Yehova su bondat tin di haber ku otro kualidatnan tambe. Por ehèmpel, Dios ta “abundante den bondat amoroso,” òf, amor leal. (Eksodo 34:6, NW) E kualidat aki ta mas spesífiko ku bondat, pasobra Yehova ta demostrá e kualidat aki partikularmente ku su sirbidónan fiel. Den e siguiente kapítulo nos lo mira di ki manera e ta hasié.

^ par. 14 No por tin un ehèmpel mas grandi di Yehova su bondat ku e reskate. Di tur e miónes di kriaturanan spiritual ku Yehova por a skohe, el a skohe su Yu unigénito stimá pa muri na nos fabor.

^ par. 18 Beibel ta konektá bèrdat ku lus, i ku bon motibu. Un salmista a kanta: “Manda bo lus i bo bèrdat.” (Salmo 43:3) Yehova ta manda lus spiritual na abundansia riba hende ku ta dispuesto di lag’é iluminá nan, esta, siña nan.—2 Korintionan 4:6; 1 Juan 1:5.