Bai na kontenido

Bai na kontenido

 SEKSHON 4

Kon pa Anda ku Plaka

Kon pa Anda ku Plaka

“Bon konseho ta hasi un plan mas firme.”—Proverbionan 20:18, BPK

Pa nos por perkurá pa nos famia, nos mester di plaka. (Proverbionan 30:8) Al fin i al kabo, Beibel ta bisa ku ‘plaka ta un protekshon.’ (Eklesiástes 7:12) Kisas no ta fásil pa papia tokante plaka, pero no laga plaka trese problema den boso matrimonio. (Efesionan 4:32) Komo pareha, boso mester konfia otro i disidí huntu kon boso ta usa boso plaka.

 1 PLANIA BON

LOKE BEIBEL TA BISA: “Kua di boso ku ke traha un toren no ta sinta kalkulá e gastu promé pa wak si e tin sufisiente pa kab’é?” (Lukas 14:28) Ta masha importante pa boso plania huntu kon boso lo usa boso plaka. (Ámos 3:3) Disidí kiko ta e kosnan ku boso mester kumpra i kuantu plaka boso por gasta. (Proverbionan 31:16) No ta pasobra bo tin plaka pa kumpra un kos, bo mester kumpr’é. Evitá debe. Kumpra kos ora boso tin sèn.—Proverbionan 21:5; 22:7.

LOKE BOSO POR HASI:

  • Si boso sobra plaka fin di luna, disidí huntu kiko boso ta bai hasi kuné

  • Si fin di luna boso plaka no ta yega, plania spesífikamente kon boso ta bai baha gastu. Por ehèmpel, boso lo por kushiná na kas en bes di kome afó

 2 SEA HABRÍ I REALÍSTIKO

LOKE BEIBEL TA BISA: “Atendé tur kos onestamente, no solamente den bista di Yehova, sino tambe den bista di hende.” (2 Korintionan 8:21) Sea onesto ku bo kasá; lag’é sa kuantu bo ta gana i kuantu bo ta gasta.

Semper papia ku bo kasá promé ku bo tuma un desishon importante ku ta enbolbé plaka. (Proverbionan 13:10) Ora un pareha ta habrí ku otro tokante plaka, nan ta kontribuí na e pas den nan matrimonio. Mira e plaka ku bo ta gana komo plaka di e famia, i no komo bo plaka.—1 Timoteo 5:8.

LOKE BOSO POR HASI:

  • Disidí huntu kuantu plaka kada un di boso por gasta pa luna sin ku boso tin ku puntra otro promé

  • No warda te ora un problema presentá pa boso papia tokante plaka