Bai na kontenido

Bai na kontenido

 SEKSHON 9

Adorá Yehova Komo Famia

Adorá Yehova Komo Famia

‘Adorá Esun ku a traha shelu i tera.’—Revelashon 14:7

Manera bo a siña den e foyeto akí, Beibel tin hopi prinsipio ku lo yuda tantu abo komo bo famia. Yehova ke pa boso ta felis. E ta primintí ku si boso pone boso adorashon na dje na promé lugá, ‘lo e duna boso tur otro kos.’ (Mateo 6:33) Di bèrdat e ke pa bo ta su amigu. P’esei, probechá di tur oportunidat pa fortalesé bo amistat kuné. Esei ta e privilegio di mas grandi ku un hende por tin.—Mateo 22:37, 38.

 1 FORTALESÉ BO RELASHON KU YEHOVA

LOKE BEIBEL TA BISA: “‘Lo mi ta un tata pa boso, i boso lo ta mi yu hòmbernan i mi yu muhénan,’ Yehova ta bisa.” (2 Korintionan 6:18) Dios ke pa bo bira su bon amigu. I un manera pa logra esei ta hasiendo orashon. P’esei, Yehova ta invitá bo pa “hasi orashon konstantemente.” (1 Tesalonisensenan 5:17) E ta ansioso pa skucha bo pensamentu- i preokupashonnan di mas profundo. (Filipensenan 4:6) Ora bo ta hasi orashon ku bo famia, nan ta mira kon real Dios ta pa bo.

Ademas di papia ku Dios, bo tin ku skuch’é tambe. Pero, kon bo por skuch’é? Studiando su Palabra i publikashonnan basá riba Beibel. (Salmo 1:1, 2) Meditá riba loke bo ta siña. (Salmo 77:11, 12) I ta importante tambe pa bo asistí regularmente na e reunionnan kristian.—Salmo 122:1-4.

Un otro manera importante pa fortalesé bo relashon ku Yehova ta papiando ku otro hende tokante dje. Mas bo papia di dje, mas fuerte bo relashon kuné lo bira.—Mateo 28:19, 20.

LOKE BO POR HASI:

  • Apartá tempu tur dia pa lesa Beibel i hasi orashon

  • Komo famia, duna aktividatnan spiritual prioridat riba entretenimentu i rekreo

2 DISFRUTÁ DI BOSO ADORASHON KOMO FAMIA

LOKE BEIBEL TA BISA: “Hala serka Dios, i lo e hala serka boso.” (Santiago 4:8) Bo tin ku traha un programa pa adorá Dios regularmente komo famia, anto tene bo na dje. (Génesis 18:19) Pero mas ta nesesario. Dios mester ta parti di bo bida diario. Yuda bo famia fortalesé nan relashon ku Dios. Kon? Papia ku nan tokante Dios “ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” (Deuteronomio 6:6, 7) Bo mester tin e mesun meta ku Hosue tabatin, kende a bisa: “Pa loke ta ami i mi kas, nos lo sirbi [Yehova].”—Hosue 24:15.

LOKE BO POR HASI:

  • Sigui un programa regular di formashon spiritual, ku ta tene kuenta ku nesesidat di kada miembro di bo famia