“Esun ku a krea hende na prinsipio a traha nan hòmber i muhé.”—Mateo 19:4

Ta Yehova * Dios a uni e promé hòmber i muhé den matrimonio. Beibel ta bisa ku el a traha e promé muhé i a “hib’é pa e hòmber.” Adam a keda masha kontentu. El a bisa: “Esaki ta awor wesu di mi wesunan, i karni di mi karni.” (Génesis 2:22, 23) Awe tambe Yehova ke pa parehanan kasá ta felis.

Hopi hende ta pensa ku ora nan kasa, nan bida lo ta perfekto. Pero den bida real, asta parehanan kasá ku ta stima otro un mundu tin problema de bes en kuando. (1 Korintionan 7:28) Den e foyeto akí, lo bo haña vários prinsipio bíbliko (konseho, mandamentu, norma òf siñansa di Beibel) ku por yuda boso. Si boso biba di akuerdo ku nan, boso por tin un matrimonio i famia felis.—Salmo 19:8-11.

 1 KUMPLI KU E PAPEL KU YEHOVA A DUNA BOSO KADA UN

LOKE BEIBEL TA BISA: Esposo ta kabes di famia.—Efesionan 5:23.

Esposo, Yehova ta ferwagt ku bo ta kuida bo esposa ku kariño. (1 Pedro 3:7) Dios a trah’é pa e ta bo ayudante i E ke pa bo trat’é ku dignidat i amor. (Génesis 2:18) Bo mester stima bo kasá asina tantu ku bo ta laga su bienestar bai promé ku esun di bo.—Efesionan 5:25-29.

Esposa, Yehova ta ferwagt ku bo ta respetá bo esposo profundamente i ta yud’é kumpli ku su papel. (1 Korintionan 11:3; Efesionan 5:33) Ora bo esposo tuma un desishon, apoy’é i kooperá kuné di henter bo kurason. (Kolosensenan 3:18) Si bo ta hasi esei, lo bo ta di gran balor pa bo esposo i tambe den bista di Yehova.—1 Pedro 3:1-6.

LOKE BO POR HASI:

  • Puntra bo kasá kiko bo por hasi pa bo ta un mihó esposo òf esposa. Skuch’é ku atenshon, i hasi bo bèst pa drecha tur loke bo por drecha

  • Tene pasenshi. No ta di un dia pa otro boso ta siña kon pa hasi otro felis

2 TENE KUENTA KU SINTIMENTU DI BO KASÁ

LOKE BEIBEL TA BISA: Ta importante pa bo tene kuenta ku interes, esta deseo- òf nesesidatnan, di bo kasá. (Filipensenan 2:3, 4) Kòrda ku Yehova ke pa su sirbidónan ta “amabel ku tur hende.” P’esei, trata bo kasá bon. (2 Timoteo 2:24) “Tin hende ta papia sin pensa, manera hinká di spada, ma lenga di hende sabí ta trese kuramentu.” Pues, bo mester wak bon kon bo ta papia ku bo kasá. (Proverbionan 12:18) Yehova su spiritu santu lo yuda bo papia ku bondat i amor.—Galationan 5:22, 23; Kolosensenan 4:6.

LOKE BO POR HASI:

  • Promé ku bo papia tokante un asuntu importante ku bo kasá, resa pidi Dios yuda bo keda kalmu i ku mente habrí

  • Pensa bon kiko bo ta bai bisa i kon lo bo bis’é

 3 KÒRDA KU BOSO DOS TA UN TIM

LOKE BEIBEL TA BISA: Ora bo kasa, abo ku bo kasá ta bira “ún karni.” (Mateo 19:5) Apesar di esei, boso ta keda dos persona ku tin biaha no tin mesun opinion. Pues, ta importante pa boso siña pensa i sinti meskos ku otro. (Filipensenan 2:2) Union ta esensial ora di tuma desishon. Beibel ta bisa: “Traha plan dor di buska konseho.” (Proverbionan 20:18) Ora boso tin ku tuma desishon importante, hasié huntu i laga e prinsipionan di Beibel sirbi komo boso guia.—Proverbionan 8:32, 33.

LOKE BO POR HASI:

  • Ora bo ta papia ku bo kasá, lag’é sa kon bo ta sinti i no djis dun’é informashon òf bis’é bo opinion

  • Promé ku bo komprometé bo mes pa hasi algu, papia ku bo kasá

^ par. 4 Beibel ta bisa ku Dios su nòmber ta Yehova.