Bai na kontenido

Bai na kontenido

 LÈS 13

Kiko Lo Pasa ku Religion?

Kiko Lo Pasa ku Religion?

1. Tur religion ta bon?

Den tur religion tin hende sinsero. Dios ta tuma nota di e hendenan akí i ta interesá den nan. Pero lamentablemente, hende ta hasi hopi maldat den nòmber di religion. (2 Korintionan 4:3, 4; 11:13-15) Segun informe di notisia, tin religion asta ta enbolbí den terorismo, genosidio, guera i tambe maltrato i abusu seksual di mucha. E kosnan akí ta hasi hende sinsero ku ta kere den Dios masha tristu.—Lesa Mateo 24:3-5, 11, 12.

Miéntras religion berdadero ta duna gloria na Dios, religion falsu ta desonrá Dios ku nan siñansanan. Por ehèmpel, loke nan ta siña hende tokante Dios i e kondishon di e mortonan no ta basá riba Beibel. Pero Yehova ke pa hende sa e bèrdat tokante dje.—Lesa Eklesiástes 9:5, 10; 1 Timoteo 2:3-5.

2. Kiko lo pasa ku religion?

Un kos ta sigur: E religionnan ku ta pretendé di ta stima Dios pero ku en realidat ta stima e mundu di Satanas no por gaña Dios. (Santiago 4:4) Segun e Palabra di Dios, tur religion falsu ta parti di “Babilonia e Grandi.” Babilonia tabata e stat di antigwedat kaminda religion falsu a kuminsá despues di e Diluvio di tempu di Noe. Pronto, Dios lo trese un fin repentino na tur religion ku ta gaña i oprimí hende.—Lesa Revelashon 17:1, 2, 5, 16, 17; 18:8.

Sinembargo, Yehova no a lubidá e hendenan sinsero ku awe ta plamá den religion falsu rònt mundu. E ta siña nan e bèrdat i ta uni nan.—Lesa Mikéas 4:2, 5.

 3. Kiko hende sinsero mester hasi?

Religion berdadero ta uni hende

Yehova ta interesá den hende ku ta stima loke ta bèrdat i loke ta bon. E ta urgi nan pa sali for di religion falsu. Hende ku ta stima Dios ta dispuesto pa hasi kambio den nan bida pa por agrad’é.—Lesa Revelashon 18:4.

Den promé siglo, ora hende sinsero a tende e bon notisia for di e apòstelnan, nan a alegrá mashá. Nan a siña di e kaminda di Yehova, sí, di un bida mas felis ku a duna nan speransa i un propósito den bida. Nan ta un bon ehèmpel pa nos awe, ya ku nan a aseptá e bon notisia i a pone Yehova na promé lugá den nan bida.—Lesa 1 Tesalonisensenan 1:8, 9; 2:13.

Yehova ta ekstendé un invitashon na hende ku ta sali for di religion falsu pa bira parti di su pueblo. Si bo aseptá e invitashon kaluroso ei, Yehova lo permití bo bira su amigu, forma parti di su famia di adoradónan amoroso i haña bida eterno.—Lesa Marko 10:29, 30; 2 Korintionan 6:17, 18.

4. Kon Dios lo bendishoná hende di tur nashon?

E huisio ku lo bini riba religion falsu ta un bon notisia. Rònt mundu, hende lo haña alivio for di opreshon. Nunka mas religion falsu lo gaña humanidat i kousa divishon. Na e tempu ei, tur hende lo ta uní den adorashon di e úniko Dios berdadero.—Lesa Revelashon 18:20, 21; 21:3, 4.