Bai na kontenido

Bai na kontenido

 LÈS 4

Ken Hesukristu Ta?

Ken Hesukristu Ta?

1. Kon Hesus su bida a kuminsá?

Kiko a hasi Hesus un hende fásil pa aserká?—MATEO 11:29; MARKO 10:13-16.

Distinto for di otro hende, Hesus a biba den shelu komo un kriatura spiritual promé ku el a bini na tera. (Huan 8:23) E tabata e promé kreashon di Dios, i el a yuda den e kreashon di tur otro kos. E ta e úniko yu ku Yehova a krea direktamente i p’esei Beibel ta yam’é e Yu “unigénito” di Dios. (Huan 1:14) Tambe Beibel ta yama Hesus “e Palabra,” ya ku el a sirbi komo bosero di Dios.—Lesa Proverbionan 8:22, 23, 30; Kolosensenan 1:15, 16.

2. Dikon Hesus a bini na tera?

Pa Hesus por a nase komo hende riba tera, Dios a transferí su bida for di shelu pa e matris di un bírgen hudiu ku yama Maria. Pues, Hesus no tabatin un tata humano. (Lukas 1:30-35) Hesus a bini na tera (1) pa siña hende e bèrdat tokante Dios, (2) pa pone un ehèmpel kon nos por hasi e boluntat di Dios asta ora nos haña nos ku difikultat i (3) pa duna su bida perfekto komo un “reskate.”—Lesa Mateo 20:28.

3. Dikon nos mester di un reskate?

Un reskate ta e preis ku ta ser pagá pa libra un persona for di peliger di morto. (Éksodo 21:29, 30) Originalmente, Dios no a krea hende pa bira bieu i muri. Kon nos por sa esei? Dios a bisa e promé hòmber, Adam, ku si el a kometé loke Beibel ta yama “piká,” lo el a muri. Pues si Adam no a peka, lo e no a muri nunka. (Génesis 2:16, 17; 5:5) Segun Beibel, morto a “drenta” e mundu di humanidat pa medio di Adam.  Asina, Adam a pasa piká i pena di morto pa tur su desendientenan. Nos tin mester di un reskate pa libra nos for di e pena di morto ku nos a heredá for di Adam.—Lesa Romanonan 5:12; 6:23.

Ken por a paga e reskate pa libra nos for di morto? Ora nos muri, nos ta paga pa solamente nos pikánan. Hende imperfekto no por paga pa piká di otro hende.—Lesa Salmo 49:7-9.

4. Dikon Hesus mester a muri?

Distinto for di nos, Hesus tabata un hòmber perfekto. Pues e no tabatin nodi di muri pa su pikánan—nunka e no a hasi piká tampoko. Mas bien, Hesus a muri pa e pikánan di otro hende. Dios a demostrá un amor ekstraordinario pa humanidat ora el a manda su Yu bin muri pa nos. Hesus tambe a demostrá su amor pa nos ora el a obedesé su Tata i duna su bida pa nos pikánan.—Lesa Huan 3:16; Romanonan 5:18, 19.

Wak e vidio Dikon Hesus A Muri?

5. Kiko Hesus ta hasiendo aktualmente?

Tempu ku Hesus tabata riba tera, el a kura hende enfermo, el a libra hende di nan sufrimentu i a lanta hende for di morto. Ku esei el a demostrá kiko lo e hasi den futuro pa tur hende obediente. (Mateo 15:30, 31; Huan 5:28) Despues ku Hesus a muri, Dios a resusit’é komo un ser spiritual. (1 Pedro 3:18) Anto el a sinta na man drechi di Yehova te ora Dios a dun’é poder pa reina komo Rei riba tera kompleto. (Hebreonan 10:12, 13) Aktualmente Hesus ta reina komo Rei den shelu, i su siguidónan ta anunsiando e bon notisia ei rònt mundu.—Lesa Daniel 7:13, 14; Mateo 24:14.

Pronto Hesus lo usa su poder komo Rei pa pone fin na tur sufrimentu i na esnan ku ta kous’é. Ken ku pone fe den Hesus i obedes’é lo haña bida den un paradeis riba tera.—Lesa Salmo 37:9-11.