Bai na kontenido

Bai na kontenido

 PARTI 4

Sintimentu di Kulpa—“Purifiká Mi di Mi Piká”

Sintimentu di Kulpa—“Purifiká Mi di Mi Piká”

“Mi trabou nobo a hisa e nivel di bida di mi famia, pero tambe el a pone ku m’a kuminsá partisipá den tur tipo di aktividat inapropiá pa un sirbidó di Yehova. M’a kuminsá selebrá dianan di fiesta di mundu, partisipá den eventonan polítiko i asta bai misa. Mi tabata un Testigu di Yehova inaktivo pa 40 aña. Mas tempu a pasa, mas mi tabata pensa ku mi no a meresé Yehova su pordon. M’a sinti ku ni mi mes lo no por a pordoná mi mes, ya ku mi tabata konosé e bèrdat i tòg m’a kue mal kaminda.”—Martha.

SINTIMENTU di kulpa por ta un karga aplastante. Rei David a pasa den e eksperensia ei, p’esei el a skirbi: “Mi kulpa a subi pasa riba mi kabes, manera un peso fuera di mi forsa.” (Salmo 38:4, BPK) Algun ruman a bira deprimí pasobra nan ta pensa ku Yehova hamas lo por pordoná nan. (2 Korintionan 2:7) Pero e pensamentu ei ta korekto? Bo ta kere ku bo pikánan ta asina grave ku lo e no por pordoná bo? Keda trankil, Yehova ke yuda bo.

“Laga Nos Rektifiká Asuntunan Entre Nos”

Yehova no ta rechasá hende ku kometé piká pero ku ta arepentí. Al kontrario! E ta tuma e inisiativa pa yuda nan. Den e komparashon di e yu pèrdí, Hesus a konta di un yu hòmber ku a bai for di kas pa hiba un bida parotin. Ku tempu, e yu hòmber ta disidí di bai kas bèk. Kiko a pasa ora el a bolbe? “Miéntras ku e [yu] tabata leu ainda, su tata a mir’é ta bini i a haña duele di dje. E tata a kore bai serka dje, bras’é i sunch’e tiernamente.” (Lukas 15:11-20) Yehova ta manera e tata amoroso i yen di kompashon ei. Abo ta deseá di hala mas serka di Yehova pero ta sinti ku bo ta muchu “leu ainda” for di dje? Meskos ku e tata den e komparashon di Hesus, Yehova tin duele di bo i su tierno kariño ta pone ku e ta kla pa risibí bo ku brasa habrí.

Bo ta pensa ku bo pikánan ta muchu serio òf muchu hopi pa Yehova pordoná? Si ta asina, meditá riba e siguiente invitashon ku bo ta haña na Isaías 1:18 (NW): “‘Boso bini awor, i laga nos rektifiká asuntunan entre nos,’ Yehova ta bisa. ‘Aunke boso pikánan ta [kòrá] manera skarlata, lo hasi nan blanku manera sneu.’” Pues, bon mirá, Yehova por pordoná asta pikánan ku ta parse permanente i ku ta manera mancha di dai kòrá riba paña blanku.

Yehova no ke pa bo keda sufri ku remordimentu di konsenshi. Ora bo haña e pordon di Dios i bo tin un konsenshi limpi, lo bo sinti un gran alivio. Kon bo por logra esei? Bo tin ku hasi dos kos ku Rei David a hasi. Di promé, el a bisa: “Lo mi konfesá mi transgreshonnan na SEÑOR.” (Salmo 32:5) Kòrda ku Yehova a invitá bo kaba pa akudí na dje den orashon i pa ‘rektifiká asuntu’ kuné. Aseptá e invitashon ei. Konfesá bo pikánan na Yehova, i bis’é kon bo ta sinti bo. Di eksperensia personal, David por a pidi ku konfiansa den orashon: “Purifiká mi di mi piká.” Anto el a agregá: “Un kurason arepentí i kibrá, o Dios, bo no ta despresiá.”—Salmo 51:2, 17.

Di dos, David a aseptá yudansa di un representante nombrá pa Dios, profeta Natan. (2 Samuel 12:13) Awe, Yehova a nombra ansianonan den  kongregashon. E rumannan akí a ser entrená pa yuda hende ku a kometé piká pero ku a arepentí pa drecha nan amistat ku Yehova. Ora bo papia ku e ansianonan, nan lo usa e Skritura pa yuda bo rekuperá den sentido spiritual. Tambe nan lo hasi orashon ku bo pa yuda bo trankilisá bo kurason i libra bo di sintimentunan negativo.—Santiago 5:14-16.

Yehova ke pa abo tambe sinti e alivio di por tin un konsenshi limpi

“Felis T’Esun Ku Su Eror Ta Pordoná”

Awor bon, kisas bo ta sinti ku e idea di konfesá bo pikánan na Yehova Dios i bai serka e ansianonan sigur no ta nada fásil. David tambe lo mester a sinti asina. Beibel ta mustra ku pa un tempu el a “keda ketu” tokante su pikánan. (Salmo 32:3) Ma despues el a mira e benefisio di konfesá su pikánan i korigí su kaminda.

Un di e benefisionan mas grandi tabata ku David a haña su goso bèk. El a skirbi: “Felis t’esun ku su eror ta pordoná, kende su piká ta tapá.” (Salmo 32:1, BPK) Tambe el a pidi Yehova den orashon: “O Señor, habri mi lepnan, pa mi boka por deklará bo alabansa.” (Salmo 51:15) David a sintié asina aliviá i gradisidu ku Dios a pordon’é ku esaki a motiv’é pa papia ku otro hende tokante Yehova.

Yehova ke pa abo tambe sinti e alivio di por tin un konsenshi limpi. I e ke pa ora bo ta papia ku otro hende tokante dje i tokante su propósito, bo hasi esei ku goso i ku un kurason sinsero, no ku un sintimentu di kulpa. (Salmo 65:1-4) No lubidá riba su invitashon: “Arepentí, i bira bèk for di boso kaminda pa Yehova por pordoná boso pikánan [i] refreská boso.”—Echonan 3:19.

Esei ta loke a pasa ku Martha, menshoná na kuminsamentu. El a konta: “Mi yu hòmber a keda manda e revistanan Toren di Vigilansia ¡Despertad! pa mi. Pokopoko, m’a rekuperá mi amistat ku Yehova. E parti mas duru di bolbe serka Yehova tabata pa pidié pordon pa tur e pikánan ku m’a kometé. Pero finalmente, m’a akudí na Dios den orashon i a pidié pordoná mi. Ta inkreibel ku 40 aña a pasa promé ku m’a bolbe serka Yehova. Pero mi historia ta un prueba palpabel ku aunke un hende por tin hopi aña alehá for di Yehova, e por dun’é e chèns di bolbe sinti su amor i sirbié.”