Bo ta kere ku bida tin un propósito? Evolushonista William B. Provine a bisa: “Loke nos a siña tokante e proseso di evolushon tin konsekuensia serio pa nos, pasobra esei tin influensia riba nos propósito den bida.” Kiko ta su konklushon? “Mi no ta mira ku ni hende ni e universo tin berdadero propósito.”32

Pensa un ratu riba kiko e palabranan ei ta nifiká. Si bida no tin propósito, e ora ei no ta keda bo nada otro ku hasi algun bon obra den bida i kisas pasa bo genenan pa e siguiente generashon. Ora bo muri, bo ta stòp di eksistí pa semper. Bo selebro ku su kapasidat di pensa, rasoná i meditá riba e propósito di bida lo ta un produkto di puru kasualidat.

Esei no ta tur kos. Hopi hende ku ta kere den evolushon ta bisa ku Dios no ta eksistí òf ku e no ta intervení den asuntunan humano. Den ámbos kaso, nos futuro lo ta den man di lidernan polítiko, akadémiko i religioso. Si bo husga a base di loke e tipo di hendenan ei a hasi den pasado, lo bo por konkluí ku e káos, konflikto i korupshon ku ta afektá humanidat lo sigui tuma lugá. Si e teoria di evolushon realmente ta bèrdat, hende lo tin tur motibu pa biba segun e lema fatalista: “Laga nos kome i bebe, pasobra mañan nos ta muri.”—1 Korintionan 15:32.

En kambio, Beibel ta siña: “Serka [Dios] e fuente di bida ta.” (Salmo 36:9) E palabranan ei tin nifikashon profundo.

Si loke Beibel ta bisa ta bèrdat, esei ta nifiká ku bida tin propósito. Nos Kreador tin un propósito amoroso pa tur hende ku skohe pa biba na armonia ku su boluntat. (Eklesiastés 12:13) E propósito ei ta enserá entre otro e promesa di por biba den un mundu kaminda no tin káos, konflikto i korupshon, ni morto.—Salmo 37:10, 11; Isaias 25:6-8.

Ku rason, miónes di hende rònt mundu ta kere ku no tin nada otro ku por duna hende un mihó propósito den bida ku siña tokante Dios i obedes’é. (Juan 17:3) E kreensia akí no ta simplemente un soño. E pruebanan ta konvinsente: Bida ta obra di un Kreador.