E BUNITA mucha muhé aki yama Maria. E ta un israelita i ta biba den e pueblo di Názarèt. Dios sa ku e ta masha bon hende. P’esei el a manda su angel Gabriel pa papia kuné. Bo sa kiko Gabriel a bini pa bisa Maria? Ban mira.

Gabriel a bisa Maria: ‘Bon dia, abo ku ta altamente faboresí. Yehova ta ku bo.’ Maria no tabata konosé Gabriel. El a keda preokupá pasobra e no a komprondé ta kiko e angel kier men. Pero Gabriel a trankilisá Maria umbes.

Maria

E di: ‘No tene miedu, Maria, Yehova ta masha kontentu ku bo. P’esei e ta bai hasi un kos maravioso pa bo. Pronto lo bo haña un yu. I bo tin ku yam’é Hesus.’

Gabriel a sigui splika: ‘E yu aki lo ta grandi i lo ta yamá Yu di e Dios Haltísimo. Yehova lo hasié rei, meskos ku David. Pero Hesus lo ta rei pa semper, i su reino lo no kaba nunka!’

Maria a puntra: ‘Kon tur esei por ta posibel? Mi no ta kasá i nunka mi no a biba ku un hòmber, pues kon mi por haña un yu?’

Gabriel a kontestá: ‘E poder di Dios lo baha riba bo. P’esei e yu lo ser yamá Yu di Dios.’ Anto el a bisa Maria: ‘Kòrda bo pariente Elisabèt. Hende a bisa ku e ta muchu bieu pa haña yu. Pero pronto lo e haña un yu hòmber. Asina lo bo mira ku no tin nada ku Dios no por hasi.’

Maria a kontestá umbes: ‘Mi ta esklabo di Yehova. Laga sosodé ku mi nèt manera bo a bisa.’ Anto e angel a bai.

Maria a bai lihé pa bishitá Elisabèt. Ora Elisabèt a tende e bos di Maria, e yu den Elisabèt su barika a salta di goso. Elisabèt a yena ku spiritu di Dios i el a bisa Maria: ‘Bo ta spesialmente bendishoná entre hende muhé.’ Maria a keda serka Elisabèt rònt di tres luna, i despues el a bai bèk su kas na Názarèt.

Maria tabata kla pa kasa ku un hòmber yamá Hosé. Pero ora Hosé a tende ku Maria lo haña yu, e no kier a kasa kuné. Anto e angel di Dios a bis’é: ‘No tene miedu di tuma Maria komo bo esposa. Pasobra Dios ta esun ku a dun’é un yu hòmber.’ P’esei Hosé i Maria a kasa, i nan a spera nasementu di Hesus.

Lukas 1:26-56; Mateo 1:18-25.



Pregunta

  • Ken e hende muhé riba e plachi ta?
  • Kiko Gabriel ta bisa Maria?
  • Kon Gabriel ta splika Maria ku e lo haña un yu maske nunka el a yega di biba ku hende hòmber?
  • Kiko a sosodé ora Maria a bishitá su pariente Elisabèt?
  • Kiko Hosé a pensa ora el a haña sa ku Maria tabata bai haña yu, pero kiko a pon’é kambia di pensamentu?

Preguntanan adishonal

  • Lesa Lukas 1:26-56.

    Kiko Lukas 1:35 ta indiká enkuanto kualke imperfekshon adámiko den e eisèl, òf óvulo di Maria ora e bida di e Yu di Dios a ser transferí for di e region di spiritu? (Hag. 2:11-13; Juan 6:69; Heb. 7:26; 10:5)

    Kon Hesus a risibí onor asta promé ku el a nase? (Luk. 1:41-43)

    Ki ehèmpel ekselente Maria a pone pa kristiannan awe ku ta risibí privilegionan spesial di sirbishi? (Luk. 1:38, 46-49; 17:10; Pro. 11:2)

  • Lesa Mateo 1:18-25.

    Maske Hesus no a haña e nòmber personal Emanuel, kon e papel ku el a hunga komo ser humano a kumpli ku e nifikashon di e nòmber? (Mat. 1:22, 23; Juan 14:8-10; Heb. 1:1-3)