Bai na kontenido

Bai na kontenido

Relato 17: Ohochi Ku Tabata Distinto

Relato 17: Ohochi Ku Tabata Distinto
Esau

E DOS mucha hòmbernan aki ta masha diferente, no ta bèrdat? Bo sa nan nòmber? E yagdó ta Esau, i e mucha hòmber ku ta kuida karné ta Jakòb.

Esau ku Jakòb tabata e yu hòmbernan ohochi di Isaak ku Rebeka. Nan tata Isaak a gusta Esau hopi, pasobra e tabata un bon yagdó i tabata trese kuminda kas pa e famia kome. Pero Rebeka a stima Jakòb mas, pasobra e tabata un mucha ketu i trankil.

Nan tawela Abraham tabata na bida ainda, i nos por imaginá nos mes kon Jakòb tabata gusta skucha Abraham papia tokante Yehova. Finalmente Abraham a muri na edat di 175 aña, ora e ohochinan tabatin 15 aña di edat.

Ora Esau tabatin 40 aña di edat el a kasa ku dos muhé di e tera di Kánaan. Esei a hasi Isaak ku Rebeka masha tristu, pasobra e dos muhénan ei no tabata adorá Yehova.

Anto un dia algu a sosodé ku a hasi Esau rabiá mashá ku su ruman Jakòb. E tempu a yega pa Isaak duna su bendishon na su yu hòmber mayó. Siendo ku Esau tabata mas grandi ku Jakòb, Esau a spera di risibí e bendishon. Pero mas promé Esau a bende Jakòb su derecho di risibí e bendishon. Tambe, ora e dos muchanan a nase, Dios a bisa ku Jakòb lo risibí e bendishon. I esei ta loke a sosodé. Isaak a duna e bendishon na su yu Jakòb.

Jakòb

Despues, ora Esau a tende esei, el a bira masha rabiá ku Jakòb. El a rabia asina tantu ku e kier a mata Jakòb. Ora Rebeka a tende di esei, el a keda masha preokupá. P’esei el a bisa su esposo Isaak: ‘Lo ta teribel si Jakòb tambe kasa ku un di e muhénan di Kánaan.’

E ora ei Isaak a yama su yu Jakòb i a bis’é: ‘No kasa ku un muhé di Kánaan. Mas bien, bai na e kas di bo tawela Bètuel na Haran, i kasa ku un yu muhé di Laban, yu di Bètuel.’

Jakòb a skucha di su tata, i umbes el a kuminsá su biahe largu pa bai kaminda su famia tabata biba na Haran.

Génesis 25:5-11, 20-34; 26:34, 35; 27:1-46; 28:1-5; Hebreonan 12:16, 17.



Pregunta

  • Ken Esau ku Jakòb tabata, i kon asina nan tabata diferente?
  • Ki edat Esau ku Jakòb tabatin ora nan tawela Abraham a muri?
  • Kiko Esau a hasi ku a pone su mama i su tata bira hopi tristu?
  • Pakiko Esau a bira masha rabiá ku su ruman Jakòb?
  • Ki instrukshon Isaak a duna su yu Jakòb?

Preguntanan adishonal

  • Lesa Génesis 25:5-11 i 20-34.

    Kiko Yehova a profetisá tokante e dos yu hòmbernan di Rebeka? (Gén. 25:23)

    Ki diferensia tabatin entre e aktitut di Jakòb i esun di Esau tokante e derecho di primogénito? (Gén. 25:31-34)

  • Lesa Génesis 26:34 i 35; 27:1-46; i 28:1-5.

    Kon Esau su falta di apresio pa kosnan spiritual a keda bisto? (Gén. 26:34, 35; 27:46)

    Pa Jakòb por a risibí Dios su bendishon, kiko Isaak a mand’é hasi? (Gén. 28:1-4)

  • Lesa Hebreonan 12:16 i 17.

    Manera e ehèmpel di Esau ta mustra, kiko lo sosodé ku hende ku despresiá kosnan sagrado?