MIRA ki tristu i sin speransa e mucha hòmber ta. Esei ta Hosé. Su rumannan a kaba di bend’é ku e hòmbernan ku ta riba kaminda pa Egipto. Aya nan lo hasi Hosé esklabo. Pakiko su mitar rumannan a hasi tal kos malu? Pa motibu ku nan tabata yalurs riba Hosé.

Hosé su rumannan a bend’é

Nan tata Jakòb a gusta Hosé masha hopi mes. El a demostrá esei dor di regalá Hosé un bunita mantel largu. Ora su dies rumannan mas grandi a mira kuantu Jakòb a stima Hosé, nan a kuminsá bira yalurs riba Hosé i odi’é. Pero, tabatin un otro motibu mas pakiko nan a odi’é.

Hosé tabatin dos soño. Den e dos soñonan di Hosé, su rumannan a bùig p’e. Ora Hosé a konta e dos soñonan na su rumannan, nan odio a oumentá asta mas.

Riba un dia ora e rumannan di Hosé tabata kuida karné di nan tata, Jakòb a pidi Hosé pa e bai mira kon ta bai ku nan. Ora e rumannan di Hosé a mir’é ta bini, algun di nan a bisa: ‘Ban mat’é!’ Pero Ruben, e ruman mayó, a bisa: ‘Nò, no hasi esei!’ En bes di mat’é, nan a kohe Hosé i a tir’é den un pos seku sin awa. Anto nan a sinta pa disidí kiko pa hasi kuné.

Na dado momentu algun hòmber di Ismael a pasa. Huda a bisa su mitar rumannan: ‘Ban bend’é ku e ismaelitanan.’ I esei ta loke nan a hasi. Nan a bende Hosé pa binti pida plata. Ki un kos malisioso i sin bondat nan a hasi!

Kiko e rumannan lo a bisa nan tata? Nan a mata un kabritu i bes tras bes nan a hinka e mantel bunita di Hosé den sanger di e kabritu. Anto nan a hiba e mantel kas pa nan tata Jakòb i a bis’é: ‘Nos a haña esaki. Wak e i mira si no ta e mantel di Hosé.’

Jakòb a mira ku ta Hosé su mantel. El a sklama: ‘Un bestia salbahe mester a mata Hosé.’ I esei ta nèt loke e rumannan di Hosé tabata ke pa nan tata kere. Jakòb a keda masha tristu mes. El a yora pa hopi dia. Pero Hosé no tabata morto. Laga nos mira kiko a sosodé kuné kaminda nan a hib’é.

Génesis 37:1-35.



Pregunta

  • Pakiko Hosé su rumannan tabata yalurs riba dje, i kiko nan a hasi?
  • Kiko Hosé su rumannan kier a hasi kuné, pero kiko Ruben a bisa?
  • Kiko a sosodé ora algun komersiante ismaelita a pasa eibanda?
  • Kiko e rumannan di Hosé a hasi pa pone nan tata kere ku Hosé a muri?

Preguntanan adishonal

  • Lesa Génesis 37:1-35.

    Kon kristiannan por imitá e ehèmpel di Hosé, informando ora malecho sosodé den kongregashon? (Gén. 37:2; Lev. 5:1; 1 Kor. 1:11)

    Kiko a pone Hosé su rumannan trat’é na un manera asina traishonero? (Gén. 37:11, 18; Pro. 27:4; Sant. 3:14-16)

    Kiko Jakòb a hasi ku ta normal pa hende hasi ora nan ta hopi tristu? (Gén. 37:35)