AYAYAI! Parse ku Daniel ta den peliger. Pero e leonnan no ta hasié nada! Bo sa pakiko? Ken a hinka Daniel eiden huntu ku tantu leon asina? Ban mira.

Awor e rei di Babilonia ta un hòmber ku yama Darío. E gusta Daniel masha hopi pasobra Daniel ta bondadoso i sabí. Darío a skohe Daniel pa ser un di e gobernantenan prinsipal di su reino. Esei a hasi algun otro hòmber den e reino envidiá Daniel. P’esei, esaki ta loke nan a hasi:

Darío

Nan a bai serka Darío i a bis’é: ‘Nos tur ke pa Rei pone na vigor un lei ku ta eksigí ku pa 30 dia ningun hende no mag hasi orashon na otro dios ku no ta abo, o Rei. Ken ku desobedesé mester ser tirá den kueba di leon.’ Darío no tabata sa pakiko e hòmbernan ei tabata ke un lei asina. Pero el a haña ku ta un bon idea, i p’esei el a skirbi e lei. Awor e lei no por a ser kambiá.

Ora Daniel a tende di e lei, el a bai kas i a hasi orashon, manera el a hasi semper. E mal hòmbernan tabata sa ku Daniel lo sigui resa na Yehova. Nan a keda kontentu pasobra a parse ku nan plan pa kaba ku Daniel a logra.

Ora Rei Darío a komprondé pakiko e hòmbernan tabata ke traha e lei, el a bira masha tristu. Pero e no por a kambia e lei, i p’esei e tabatin ku duna òrdu pa tira Daniel den kueba di leon. Pero e rei a bisa Daniel: ‘Mi ta spera ku e Dios ku bo ta sirbi lo salba bo.’

Darío a keda asina preokupá ku e no por a drumi e anochi ei. Su manisé el a kore bai na e kueba di leon. Bo por mir’é ei. E ta grita: ‘Daniel, sirbidó di e Dios bibu! E Dios ku bo ta sirbi por a salba bo di e leonnan?’

Daniel den kueba di leon

Daniel a kontestá: ‘Dios a manda su angel i a sera boka di e leonnan di manera ku nan no a hasi mi daño.’

E rei a keda masha kontentu. El a duna òrdu pa saka Daniel for di e kueba. Anto el a manda pa e mal hòmbernan ku a purba kaba ku Daniel ser tirá pa e leonnan. Asta promé ku nan a yega te abou den e kueba, e leonnan a gara nan i a kibra tur nan wesunan.

Anto Rei Darío a skirbi tur hende den su reino: ‘Mi ta manda pa tur hende respetá e Dios di Daniel. E ta hasi milager grandi. El a skapa Daniel pa leon no kom’é.’

Daniel 6:1-28.



Pregunta

  • Ken ta Darío, i ki punto di bista e tabatin di Daniel?
  • Kiko algun hòmber yalurs a pone Darío hasi?
  • Kiko Daniel a hasi ora el a tende di e lei nobo?
  • Pakiko Darío a preokupá asina tantu ku e no por a drumi, i kiko el a hasi su manisé?
  • Kiko Daniel a kontestá Darío?
  • Kiko a pasa ku e hòmbernan malbado ku kier a mata Daniel, i kiko Darío a skirbi tur hende den su reino?

Preguntanan adishonal

  • Lesa Daniel 6:1-28.

    Kon e konspirashon kontra Daniel ta hasi nos kòrda loke opositornan a yega di hasi pa purba stroba e trabou di Testigunan di Yehova den nos tempu? (Dan. 6:7; Sal. 94:20; Isa. 10:1; Rom. 8:31)

    Kon sirbidónan di Dios awe por imitá e manera ku Daniel a keda sumiso na “outoridatnan superior”? (Dan. 6:5, 10; Rom. 13:1; Echo. 5:29)

    Kon nos por imitá Daniel su ehèmpel di sirbi Yehova “ku konstansia”? (Dan. 6:16, 20; Fil. 3:16; Rev. 7:15)