SI BO muri, kon bo mama lo sintié si bo bolbe biba? E lo keda masha kontentu! Pero hende ku muri por bolbe biba? Esei a yega di sosodé?

Wak e hòmber ei, i e señora ku e mucha hòmber. E hòmber ta profeta Elias. E señora ta un biuda di e stat Sarepta, i e mucha hòmber ta su yu. Wèl, un dia e mucha a bira malu. El a bira mas malu te ku finalmente el a muri. Anto Elias a bisa su mama: ‘Duna mi e mucha.’

Elias huntu ku un biuda i su yu hòmber resusitá

Elias a hiba e mucha morto na e piso ariba i a pon’é riba kama. Anto el a pidi: ‘O Yehova, laga e mucha bolbe biba.’ I e mucha a kuminsá hala rosea! E ora ei Elias a baha kuné bèk i a bisa su mama: ‘Mira, bo yu ta na bida!’ P’esei e mama ta asina kontentu.

Un otro profeta importante di Yehova ta Eliseo. El a traha komo ayudante di Elias. Pero ku tempu Yehova a usa Eliseo tambe pa hasi milager. Un dia Eliseo a bai na e stat Sunem, unda un señora a trat’é ku bondat. Despues, un dia e señora a haña un yu hòmber.

Un mainta, ora e mucha tabata mas grandi, el a bai serka su tata ku tabata traha den kunuku. Diripiente e mucha a grita: ‘Mi kabes ta hasi doló!’ Despues ku nan a hib’é kas, e mucha a muri. Ki tristu su mama a bira! Umbes el a bai buska Eliseo.

Ora Eliseo a yega, el a bai den kamber serka e mucha morto. El a hasi orashon na Yehova, i a pone su kurpa riba esun di e mucha. Pronto e kurpa di e mucha a bira kayente, i el a nister shete biaha. Ki felis su mama a bira ora el a drenta i haña su yu na bida!

Masha hopi hende a muri. Esei a hasi nan famia- i amigunan masha tristu. Nos no tin poder pa lanta hende morto. Pero Yehova sí. Despues nos lo siña kon Yehova lo trese miónes di hende bèk na bida.

1 Reinan 17:8-24; 2 Reinan 4:8-37.


Pregunta

  • Ken e tres hendenan riba e plachi ta, i kiko a pasa ku e mucha hòmber?
  • Kiko Elias a pidi den orashon tokante e mucha, i kiko a sosodé e ora ei?
  • Kon yama e ayudante di Elias?
  • Pakiko nan a manda yama Eliseo pa e bai kas di un hende muhé na Sunem?
  • Kiko Eliseo a hasi, i kiko a pasa ku e mucha morto?
  • Kiko Yehova tin poder pa hasi, manera nos por mira den kaso di Elias i Eliseo?

Preguntanan adishonal

  • Lesa 1 Reinan 17:8-24.

    Kon e obedensia i fe di Elias a ser poné na prueba? (1 Rei. 17:9; 19:1-4, 10)

    Pakiko nos por bisa ku e fe di e biuda di Sarepta tabata remarkabel? (1 Rei. 17:12-16; Luk. 4:25, 26)

    Kon e eksperensia di e biuda di Sarepta ta mustra ku loke Hesus a bisa na Mateo 10:41 i 42 ta bèrdat? (1 Rei. 17:10-12, 17, 23, 24)

  • Lesa 2 Reinan 4:8-37.

    Kiko e señora di Sunem ta siña nos tokante hospitalidat? (2 Rei. 4:8; Luk. 6:38; Rom. 12:13; 1 Juan 3:17)

    Den ki maneranan nos por mustra bondat na Dios su sirbidónan awe? (Echo. 20:35; 28:1, 2; Gal. 6:9, 10; Heb. 6:10)