JOSIAS tabatin ocho aña di edat so ora el a bira rei di e dos tribunan di zùit di Israel. E tabata muchu hóben pa ta rei. P’esei, na prinsipio hende di mas edat tabatin ku yud’é goberná e nashon.

Despues ku Josias tabata rei pa shete aña, el a kuminsá buska Yehova. El a sigui ehèmpel di bon reinan tal komo David, Josafat i Ezekias. Anto, siendo un tiner ainda, Josias a hasi un kos ku a eksigí hopi kurashi.

Rei Josias i su hòmbernan kibrando imágennan

Pa hopi tempu mayoria di e israelitanan tabata masha mal hende. Nan tabata adorá dios falsu. Nan tabata bùig pa imágen. P’esei Josias a sali ku su hòmbernan i a kuminsá kita adorashon falsu for di e tera. Esei tabata un trabou grandi, pasobra masha hopi hende tabata adorá dios falsu. Aki bo ta mira Josias i su hòmbernan kibrando e imágennan.

Despues, Josias a enkargá tres hòmber ku e trabou pa drecha e tèmpel di Yehova. Plaka a wòrdu kolektá for di e pueblo i entregá na e hòmbernan aki pa nan paga pa e trabou ku mester a hasi. Miéntras nan tabata traha riba e tèmpel, Sumo Saserdote Hilkías a haña algu masha importante ei. Esei ta e buki di lei original ku Yehova a manda Moisés skirbí hopi tempu pasá. E tabata pèrdí pa hopi aña.

Nan a hiba e buki pa Josias, i el a pidi nan les’é p’e. Segun ku e tabata skucha, Josias a ripará ku e pueblo no tabata warda e lei di Yehova. Esei a pon’é sinti masha tristu i p’esei el a kibra su paña, manera bo ta mira ei. E di: ‘Yehova ta rabiá ku nos, pasobra nos tatanan no a warda e lei skirbí den e buki aki.’

Hilkías i Rei Josias

Josias a manda Sumo Saserdote Hilkías informá kiko Yehova lo bai hasi ku nan. Hilkías a bai serka e profetisa Hulda i a puntr’é. El a dun’é e mensahe aki di Yehova pa hiba pa Josias: ‘Yerusalèm i tur e pueblo ta bai haña kastigu pasobra nan ta adorá dios falsu i ta yena e tera ku maldat. Pero dor ku abo, Josias, a hasi loke ta bon, e kastigu lo yega te despues di bo morto.’

2 Krónikanan 34:1-28.



Pregunta

  • Kuantu aña Josias tabatin ora el a bira rei, i kiko el a kuminsá hasi ora e tabatin shete aña komo rei?
  • Kiko bo ta mira Josias hasi riba e promé plachi?
  • Kiko e sumo saserdote a haña ora e hòmbernan tabata drechando e tèmpel?
  • Pakiko Josias a kibra su paña?
  • Ki mensahe di Yehova e profeta Hulda a duna Josias?

Preguntanan adishonal

  • Lesa 2 Krónikanan 34:1-28.

    Kon Josias ta un ehèmpel pa esnan ku tabatin un infansia difísil? (2 Kró. 33:21-25; 34:1, 2; Sal. 27:10)

    Ki pasonan importante Josias a dal pa adelanto di adorashon berdadero durante e di 8, di 12 i di 18 aña di su reinado? (2 Kró. 34:3, 8)

    Kiko nos por siña relashoná ku mantenshon di nos lugá di adorashon for di e ehèmpel di Rei Josias i Sumo Saserdote Hilkías? (2 Kró. 34:9-13; Pro. 11:14; 1 Kor. 10:31)