Bai na kontenido

Bai na kontenido

 KAPÍTULO BINTIUN

El A Lucha Kontra Miedu i Duda

El A Lucha Kontra Miedu i Duda

1-3. Kiko tabata tur e kosnan ku Pedro a mira e dia ei, i den ki situashon e tabata e anochi ei?

PEDRO tabata rema ku tur su forsa den e skuridat di mardugá. Diripiente el a mira un poko klaridat na horizonte. Mainta tabata bai habri por fin? Bientu tabata supla duru i Laman di Galilea a bira masha brutu. Olanan grandi tabata bati parti dilanti di e boto di piskadó, i Pedro a keda papa muhá. Su skouder ku su lomba tabata hasi doló di rema tantu ora asina. Tòg el a sigui rema sin stòp.

2 Ora Pedro ku su kompañeronan a subi laman, nan a laga Hesus su so na kantu. Mas trempan riba e dia ei, nan a mira kon Hesus a alimentá míles di hende ku djis un par di pan i algun piská. E hendenan a keda asina impreshoná ku nan a trata di hasi Hesus rei, pero e no tabata ke tin nada di hasi ku polítika. Ademas, e kier a siña su disipelnan tambe pa no mete den polítika. Pa skapa di e multitut, Hesus a bisa su disipelnan pa subi den e boto i krusa bai na e otro banda di laman. Mientrastantu, e so a bai den seru pa hasi orashon.—Mar. 6:35-45; lesa Huan 6:14-17.

3 Ora e disipelnan a subi e boto bai, luna—ku tabata kasi yen—tabata haltu den shelu. Ma awor luna tabata baha pokopoko na horizonte. Sinembargo, nan no a yega masha leu den e mal tempu ei. E esfuerso pa rema den e laman brutu, huntu ku e zonido duru di bientu i ola, tabata stroba nan di kòmbersá ku otro. Pues, Pedro lo a sinta pensa segun ku el a rema.

Den dos aña, Pedro a siña hopi kos for di Hesus, pero ainda e tabatin mas pa siña

4. Dikon Pedro ta un magnífiko ehèmpel pa nos imitá?

4 Anto ta kantidat di kos tabatin pa Pedro pensa ariba! A hasi dos aña kaba ku e tabata kompañá Hesus di Názarèt, i hopi kos a pasa den e dos añanan ei. El a siña hopi kos for di Hesus, pero ainda e tabatin mas pa siña. I ta e deseo ei di Pedro—di bira un mihó  disipel di Hesus i di superá opstákulo, manera duda i miedu—ta hasié un magnífiko ehèmpel pa nos. Laga nos wak dikon.

“Nos A Haña e Mesías!”

5, 6. Ki sorto di bida Pedro a hiba?

Pedro hamas lo lubidá e dia ku el a konosé Hesus. Su ruman hòmber, Andres, a bin dun’é e notisia asombroso akí: “Nos a haña e Mesías!” Ku e palabranan ei, Pedro su bida a kuminsá kambia i no a bira meskos nunka mas.—Huan 1:41.

Pedro tabata biba na Kapernaum, un stat na kosta nort di un lago grandi di awa dushi ku tabata yama Laman di Galilea. E ku Andres tabatin un negoshi di piskamentu huntu ku Santiago ku Huan, e yunan di Zebedeo. Pedro tabata biba den kas huntu ku su kasá i tambe ku su suegra i Andres. Pa piskadónan por a mantené nan famia, nan mester tabata hòmbernan trahadó, fuerte i ingenioso. Manera nos por imaginá, nan tabata traha hopi biaha henter anochi sin sosegá. Nan tabata baha nan redanan entre dos boto i despues a hala aden loke e redanan a kue, sea tiki òf hopi. Mainta, nan trabou pisá tabata sigui, pasobra e ora ei nan mester a surti i bende e piskánan, i tambe limpia i drecha nan redanan.

7. Kiko Pedro a tende tokante Hesus, i dikon esei tabata un notisia emoshonante?

7 Beibel ta bisa nos ku Andres tabata un disipel di Huan Boutista. Kasi sigur Pedro tabata skucha Andres ku masha interes ora esaki tabata papia kuné tokante e mensahe di Huan. Anto un dia, Andres tabata testigu di algu importante. Huan a mustra riba Hesus di Názarèt i a bisa: “Ata e Lamchi di Dios!” Mesora Andres a bira un siguidó di Hesus i, entusiasmá, el a bai konta Pedro e notisia emoshonante ei: E Mesías a yega! (Huan 1:35-41) Un 4.000 aña promé, despues di e rebelion den Edén, Yehova Dios a primintí di manda un persona spesial ku lo a duna humanidat e speransa di haña salbashon. (Gén. 3:15) I tabata e Salbador ei ku Andres a kaba di konosé, e Mesías primintí! Manera Pedro a tende esei, el a bai kuné p’e tambe topa Hesus.

8. Kiko e nòmber ku Hesus a duna Pedro a nifiká, i dikon awe tin hende ku ta kuestioná e nòmber ei?

8 Te ku e dia ei, Pedro tabata konosí komo Simon, òf Simeon. Pero ora Hesus a mir’é, el a bis’é: “‘Abo ta Simon, yu di Huan; lo bo ser yamá Sefas’ (ku tradusí ta nifiká: ‘Pedro’).” (Huan 1:42) E nòmber “Sefas” a nifiká “piedra” òf “baranka.” Aparentemente e palabranan di Hesus tabata profétiko. El a mira di antemano ku ­Pedro lo a bira manera un baranka: un hòmber firme i konfiabel ku lo a yuda stabilisá e kongregashon kristian. Pero Pedro tambe a mira su mes asina? Probablemente ku nò. De echo, awe tin hende ku, despues di  lesa e Evangelionan, ta haña ku Pedro no tabata un persona stabil i konfiabel manera un baranka. Tin ta asta bisa ku loke Beibel ta revelá di su karakter ta duna e impreshon di un persona instabil, insigur i indesiso.

9. Riba kiko Yehova ku su Yu ta konsentrá, i dikon bo ta pensa ku nos mester konfia nan punto di bista?

Klaru ku Hesus tabata bon na altura di Pedro su defektonan. Pero Hesus, meskos ku su Tata, Yehova, semper a konsentrá riba e bon ku tin den hende. Hesus a mira ku Pedro tabatin hopi potensial, i el a trata di yud’é sigui desaroyá e bon kualidatnan ei. Awe tambe Yehova ku su Yu ta konsentrá riba e bon ku tin den nos. Kisas nos mes ta duda ku nan lo haña algu bon den nos. Ma nos tin ku konfia nan punto di bista i demostrá, meskos ku Pedro, ku nos ta dispuesto pa laga nan siña nos i forma nos.—Lesa 1 Huan 3:19, 20.

“No Tene Miedu Mas”

10. Pedro tabata probablemente testigu di kiko, pero tòg el a bai bèk na kiko?

10 Despues di a topa Hesus, Pedro probablemente a kompañ’é durante un parti di su kampaña di prediká. Pues, kisas el a mira Hesus hasi su promé milager: el a kambia awa den biña na un fiesta di kasamentu na Kana. Pero mas importante ainda, Pedro a tende for di boka di Hesus e maravioso mensahe tokante e Reino di Dios. Apesar di tur e kosnan maravioso akí ku el a tende i mira, Pedro no a sigui biaha ku Hesus ma a bai bèk na su negoshi di piskamentu. Pero algun luna despues, Pedro a bolbe topa Hesus, i e biaha akí Hesus a duna Pedro un invitashon spesial: dediká su mes fultaim na e predikashon.

11, 12. (a) Kon a bai ku Pedro su piskamentu e anochi ei? (b) Kiko Pedro probablemente tabata pensa segun ku el a skucha Hesus?

11 Pedro a kaba di pasa un mal anochi di trabou. E ku e otro piskadónan a pasa henter anochi ta baha nan redanan, pero kada biaha ku nan a hala nan aden, e redanan tabata blo bashí. Ku tur e eksperensia ku Pedro tabatin, siguramente el a usa tur su kreatividat pa haña sa unda e piskánan tabata kome, i probablemente el a purba vários zona di e lago. Sin duda, meskos ku otro piskadó, lo tabatin biaha ku el a deseá di por a wak dor di e awa trubel pa haña sa unda e skolnan di piská tabata òf di un manera òf otro, obligá e piskánan di drenta den su reda. Klaru ku e tipo di pensamentunan ei lo a desanim’é mas. Pedro no tabata piska pa plaser; e tabatin un famia pa kria. Al final, el a bai kantu bèk man bashí. Pero tòg e mester a limpia e redanan. Hesus a bini nèt ora e tabata hasi esei.

Pedro no a kansa di tende Hesus papia tokante e tema prinsipal di su predikashon: e Reino di Dios

12 Tabatin un multitut di hende rònt di Hesus, i nan tabata ansioso pa tende tur loke e tabatin di bisa. Komo ku e hendenan tabata  pèrta riba Hesus, el a subi den e boto di Pedro i pidié pa hala un poko for di kantu. Hesus a siña e multitut for di den e boto, ya ku su stèm tabata zona mas kla riba awa. Pedro a skucha ku atenshon, meskos ku e hendenan na kantu. E no tabata kansa di tende Hesus papia tokante e tema prinsipal di su predikashon: e Reino di Dios. Mare e por a yuda Kristu plama e mensahe di speransa akí den henter e pais. Ki un gran privilegio esei lo tabata! Pero esei tabata realístiko? Di kiko su famia lo a biba? Kisas Pedro a bolbe kòrda riba e anochi ku el a kaba di pasa sin kue nada.—Luk. 5:1-3.

13, 14. Ki milager Hesus a hasi pa Pedro, i kon Pedro a reakshoná?

13 Ora Hesus a kaba di papia, el a bisa Pedro: “Hala bai afó kaminda ta hundu i tira boso redanan pa kue poko piská.” Pedro tabatin su dudanan i a kontest’é: “Maestro, henter anochi nos a traha duru sin kue nada, ma komo ku bo ta pidi mi, lo mi tira e redanan.” Pedro a kaba di laba su redanan. Sin duda, e último kos ku lo e kier a hasi tabata di bolbe baha e redanan na awa, anto foral e ora ei ku no tabata ora ku piská ta kome! Di tur manera, el a hasi loke Hesus a bis’é i probablemente a hasi seña ku su kompañeronan den e otro boto pa nan siguié.—Luk. 5:4, 5.

14 Ora Pedro a kuminsá hala e redanan aden, el a sinti un peso inesperá. Sorprendí, el a hala mas duru i a mira masha hopi piská mes ta sapatiá den e redanan! Mesora el a hasi seña ku e piskadónan den e otro boto pa bin yuda nan. Esakinan a bini, i nan a ripará ku un boto so no por a karga tur e piskánan. Nan a yena tur e dos botonan, pero tabatin asina tantu piská, ku e peso a pone e botonan kuminsá senk. Pedro no por a kere su bista. El a yega di mira na okashonnan anterior kuantu poder Kristu tabatin, pero e milager akí a benefisiá é personalmente. At’akí un hòmber ku por a asta pone e piskánan drenta den reda! Miedu a poderá di Pedro. El a kai na rudia dilanti di Hesus i a bis’é: “Bai for di mi, Señor, pasobra mi ta un hòmber pekadó.” Ta bisto ku Pedro no a konsiderá su mes digno di ta huntu ku e persona ku tabatin outoridat pa usa e poder di Dios na un manera asina maravioso.Lesa Lukas 5:6-9.

Señor, mi ta un pekadó’

15. Kon Hesus a siña Pedro ku e no tabatin motibu pa duda ni sinti miedu?

15 Ma Hesus a bis’é bondadosamente: “No tene miedu mas. Di awor padilanti lo bo piska hende.” (Luk. 5:10) Esaki no tabata momento pa e duda ni sinti miedu, pasobra Hesus tabata invitand’e pa partisipá den un obra úniko, un sirbishi ku lo a kambia futuro di  humanidat. Pedro no tabatin motibu pa duda si e por a kria su famia òf si e tabata sufisiente kapas pa prediká. E tabata sirbi un Dios ku ta “pordoná abundantemente.” (Isa. 55:7) Yehova lo a satisfasé Pedro su nesesidatnan, tantu den sentido físiko komo spiritual.—Mat. 6:33.

16. Kon Pedro, Santiago ku Huan a reakshoná riba e invitashon di Hesus, i dikon esei tabata e mihó desishon ku nan por a tuma?

16 Pedro a aseptá e invitashon mesora, i Santiago ku Huan tambe a hasi meskos. “Nan a trese nan botonan bèk na tera, i nan a laga tur kos i siguié.” (Luk. 5:11) Di e manera ei Pedro a demostrá ku e tabatin fe den Hesus i den Esun ku a mand’é. Esei tabata e mihó desishon ku e por a tuma. Den nos tempu, e kristiannan ku ta superá nan duda i miedu pa sirbi Dios ta demostrá e mesun tipo di fe. Nan por tin sigur ku nunka Yehova lo no laga nan na kaya.—Sal. 22:4, 5.

 “Pakiko Bo A Kuminsá Duda?”

17. Menshoná algun kos ku Pedro a pasa aden durante e dos añanan ku el a kompañá Hesus.

17 Tabata un dos aña despues ku Pedro a konosé Hesus ku el a hañ’é den e situashon menshoná na prinsipio di e kapítulo akí. Tabata anochi, i bientu tabata supla masha duru riba Laman di Galilea. Pedro tabata rema ku tur su forsa. Naturalmente nos no sa riba kiko presis e tabata pensa, ya ku el a pasa den asina tantu kos ku Hesus. Por ehèmpel, Hesus a kura su suegra. El a duna e Sermon Riba Seru. El a demostrá bes tras bes pa medio di su siñansa i obranan poderoso ku e tabata e Skohí di Yehova, e Mesías. Durante e periodo ku a pasa, Pedro a traha riba algun aspekto di su personalidat i a mehorá; el a siña dominá su tendensia di entregá na duda i miedu. Hesus a asta skoh’é pa ta un di e 12 apòstelnan! Pero manera nos lo bai mira awor, ainda Pedro no a gana e lucha kontra miedu i duda.

18, 19. (a) Deskribí kiko Pedro a mira riba Laman di Galilea. (b) Kon Hesus a kumpli ku Pedro su petishon?

18 Diripiente, Pedro a stòp di rema durante e di kuater warda djanochi (di 3 or di mardugá pa 6 or di mainta). El a mira algu move leu ayá riba e olanan. El a stòp di rema i a sinta stret. Lo tabata e refleho di luna riba e skuma di e olanan? Nò, el a parse mas bien algu sólido i règt ku tabata move na un manera konstante. Tabata un hende! Figurá bo, un hende tabata kana riba laman! Ora e figura a yega serka, el a hasi komo si fuera e tabata bai pasa nan forbei. E disipelnan tabata morto spantá i a kere ku tabata un sorto di vishon. Ma e hende a bisa nan: “Keda trankil! Ta ami; no tene miedu.” Tabata Hesus!—Mat. 14:25-27.

19 Anto Pedro a kontest’é: “Señor, si ta abo, laga mi kana riba awa bini serka bo.” (Mat. 14:28) Su promé reakshon a demostrá kurashi. Entusiasmá ku e milager úniko akí, Pedro mes kier a eksperensiá Hesus su poder milagroso pa asina fortalesé su fe mas ainda. Bondadosamente, Hesus a bis’é bini. Pedro a baha for di e boto i para riba e laman agitá. Purba imaginá bo kon el a sintié. Pará riba awa, el a sinti suela firme bou di su pia miéntras ku el a kana bai den ­direkshon di Hesus. Na promé instante, lo e mester a keda babuká, pero djis despues un otro sintimentu a poderá di dje.—Lesa Mateo 14:29.

“Ora el a wak e tormenta, el a haña miedu”

20. (a) Kiko a kita Pedro su tinu, i ku ki konsekuensia? (b) Ki lès Hesus a enfatisá pa Pedro?

20 Hesus a reakshoná riba e fe ku Pedro tabatin den dje i a usa e poder di Yehova pa laga Pedro kana riba e olanan agitá. Pero Pedro tabatin ku mantené su bista fihá riba Hesus; ma su tinu a kita.  Beibel ta bisa: “Ora el a wak e tormenta, el a haña miedu.” Pedro a kuminsá wak e laman agitá i e olanan ku tabata bati kontra e boto, i el a drenta pániko. Probablemente el a imaginá kon e ta senk den e lago i hoga. Den un fregá di wowo, miedu a hoga su fe. E hòmber ku Hesus a yama Baranka, pasobra e tabatin e potensial di ta un persona stabil, a kuminsá senk manera un baranka pa motibu ku su fe a tambaliá. Pedro por a landa bon, pero tòg el a kuminsá grita: “Señor, salba mi!” Mesora Hesus a kue Pedro tene na su man i a sak’é pon’é para riba awa. Anto einan pará, riba e superfisie di laman, el a enfatisá e lès importante akí pa Pedro: “Hòmber di poko fe, pakiko bo a kuminsá duda?”—Mat. 14:30, 31.

21. Dikon duda ta peligroso, i kon nos por lucha kontra dje?

21 Ki un lès balioso! “Kuminsá duda” ta masha peligroso, pasobra duda por tin un influensia potente i destruktivo. E por debilitá nos fe gradualmente i pone nos senk òf hoga den sentido ­spiritual. P’esei nos mester ta determiná pa lucha kontra miedu i duda. Kon? Nos tin ku keda konsentrá riba e kosnan korekto, kosnan positivo. Si nos ta konsentrá riba loke ta duna nos miedu, loke ta desanimá nos òf loke ta hala nos for di Yehova ku su Yu, nos dudanan lo krese. Si nos ta mantené nos bista fihá riba Yehova ku su Yu—es desir, riba loke nan a hasi, ta hasiendo i lo hasi pa hende ku ta stima nan—nos lo siña dominá kualke duda ku lo por debilitá nos fe.

22. Dikon ta bale la pena imitá e fe di Pedro?

22 Ora Pedro a subi den e boto tras di Hesus, el a ripará ku e tormenta a baha. Un silensio a reina riba Laman di Galilea. Tantu Pedro komo e otro disipelnan a deklará: “Di bèrdat bo ta Yu di Dios.” (Mat. 14:33) Segun ku e promé rayonan di solo tabata sali riba e lago despues di e eksperensia impaktante akí, Pedro lo mester tabata hopi gradisidu. El a siña konfia mas den Yehova i Hesus i a pone su duda- i miedunan un banda. Ta bèrdat ku ainda e tabata falta hopi p’e bira e baranka ku Hesus a papia di dje. Pero e tabata determiná pa sigui hasi su bèst, pa sigui krese. Abo awor? Bo ta determiná pa sigui e ehèmpel di Pedro i lucha kontra bo duda- i miedunan? Lo bo ripará ku ta bale la pena imitá e fe di Pedro.