Na Nos Rumannan Stimá,

Pa algun aña kaba hopi idioma rònt mundu tabatin den nan edishon públiko di E Toren di Vigilansia un seri di artíkulo titulá “Imitá Nan Fe.” E propósito di e artíkulonan akí tabata pa hasi e personahenan di e relatonan di Beibel mas bibu pa nos djawe. Esaki ta yuda nos haña un idea kiko e hòmber- i muhénan di e tempu ei a pasa aden pa demostrá nan fe ora nan a konfrontá sierto reto i situashon difísil. Kiko tabata e reakshon riba e seri di artíkulo akí?

Despues ku un lektor a lesa e artíkulo tokante Marta, el a skirbi: “M’a hari mashá ora m’a les’é, pasobra mi ta meskos ku Marta! Semper mi ke trata mi invitadonan lo mihó posibel, pero tin biaha mi ta lubidá ku mi mester para ketu un ratu i disfrutá di nan kompania.” Un mucha muhé tiner a saka e konklushon interesante akí for di e relato di Èster: “M’a rekonosé e sintimentu di ta opseshoná ku bistimentu i último moda. Ta bèrdat ku nos mester ta bon bistí i na òrdu, pero nos no mester eksagerá sí.” I el a agregá: “Pa Yehova, loke ta konta ta e persona ku nos ta di paden.” Relashoná ku e artíkulo ku a trata apòstel Pedro, un ruman muhé a skirbi entusiasmá: “M’a biba ku e relato. E tabata asina real! M’a usa tur mi sentidonan pa sinti loke no tabata aparesé direktamente den e pasashinan di Beibel.”

Masha hopi lektor a ekspresá nan apresio pa e seri. Nan kartanan ta konfirmá e palabranan di apòstel Pablo: “Tur loke a ser skirbí anteriormente a ser skirbí pa nos instrukshon.” (Rom. 15:4) Pues, Yehova a inkluí e relatonan akí den Beibel pa siña nos lèsnan balioso. No ta importá kuantu aña nos konosé e bèrdat; nos tur por siña for di nan.

E artíkulonan akí no tabata disponibel na papiamentu. P’esei pa nos ta un plaser di por kompartí nan ku boso awor den e publikashon akí. Nos ke animá boso pa lesa e buki akí mas pronto posibel. Inkluyé den boso programa di Adorashon Komo Famia; boso yunan lo bai gust’é un mundu. No pèrdè niun siman ora ta analisá e informashon durante e Estudio di Beibel di Kongregashon. Tuma boso tempu pa les’é ku atenshon; disfrutá di dje. Usa boso imaginashon; usa tur boso sentidonan. Trata di sinti loke e personahenan ei a sinti, di mira loke nan a mira. Kompará e manera ku nan a reakshoná den sierto situashon ku e manera ku boso lo a reakshoná.

Nos ta spera ku e publikashon akí lo ta un bendishon pa boso i boso famia. Nos ta stima boso i ta deseá boso tur kos bon,

Kuerpo Gobernante Testigunan di Yehova