Bai na kontenido

Bai na kontenido

 KAPÍTULO DIES

Kon Kriaturanan Spiritual Ta Influensiá Nos

Kon Kriaturanan Spiritual Ta Influensiá Nos
  • Angel ta yuda hende?

  • Kon spiritunan malbado a influensiá hende?

  • Nos mester tin miedu di spiritunan malbado?

1. Dikon nos lo ke siña tokante angel?

SIÑA konosé un persona por lo general ta enserá haña sa un poko tokante su famia. Asina tambe, konosé Yehova Dios ta enserá siña konosé su famia angelikal mas mihó. Beibel ta yama e angelnan “yu hòmbernan di Dios.” (Jòb 38:7) Pues, ki papel nan ta hunga den Dios su propósito? Akaso nan a hunga un papel den historia di humanidat? Angelnan ta influensiá bo bida? Si ta asina, kon?

2. Di unda angel a bin, i kuantu tin?

2 Beibel ta referí sientos di biaha na angel. Laga nos konsiderá un par di e referensianan aki pa siña mas tokante angel. Di unda angel a bin? Kolosensenan 1:16 ta bisa: “Pa medio di dje [Hesukristu] tur kos a wòrdu kreá, tantu den e shelunan komo riba tera.” Pues anto, pa medio di su Yu primogénito Yehova Dios a krea un pa un tur e kriaturanan spiritual yamá angel. Kuantu angel tin? Beibel ta indiká ku Dios a krea sientos di miónes di angel, i nan tur ta poderoso.—Salmo 103:20; Revelashon 5:11.

3. Kiko Jòb 38:4-7 ta konta nos di e angelnan?

3 Dios su Palabra, Beibel, ta konta nos ku ora tera a keda fundá, “tur e yu hòmbernan di Dios tabata grita di alegria.” (Jòb 38:4-7) Pues angelnan tabata eksistí hopi promé ku Dios a krea hende, asta promé ku el a krea tera. E pasashi  di Beibel aki ta mustra ademas ku angel tin sintimentu, pasobra e ta bisa ku nan a “grita di alegria.” Tuma nota tambe ku “tur e yu hòmbernan di Dios” a kanta huntu. E tempu ei tur angel tabata forma parti di un famia uní sirbiendo Yehova Dios.

SOSTEN I PROTEKSHON DI ANGEL

4. Kon Beibel ta mustra ku angelnan fiel ta interesá den aktividat humano?

4 For di tempu ku e fiel kriaturanan spiritual tabata testigu di e kreashon di e promé hendenan, nan a demostrá un interes profundo den e famia humano ku tabata krese i den e realisashon di Dios su propósito. (Proverbionan 8:30, 31; 1 Pedro 1:11, 12) Sin embargo, ku pasamentu di tempu e angelnan a mira kon mayoria di e famia humano a stòp di sirbi nan Kreadó amoroso. Esaki sin duda a hasi e angelnan fiel tristu. Di otro banda, ki ora ku maske ta ún hende bolbe na Yehova, “tin goso den presensia di e angelnan.” (Lukas 15:⁠10) Ya ku e angelnan ta asina interesá den e bienestar di hende ku ta sirbi Dios, nos por komprondé dikon Yehova bes tras bes a usa angel pa fortalesé i protehá su sirbidónan fiel riba tera. (Hebreonan 1:7, 14) Konsiderá algun ehèmpel.

“Mi Dios a manda su angel i a sera boka di e leonnan.” —Daniel 6:22

5. Menshoná algun ehèmpel di sosten di angel ku nos ta haña den Beibel.

5 Dos angel a yuda e hòmber hustu Lòt i su yu muhénan sobrebibí destrukshon di e statnan malbado di Sodoma i Gomora dor di saka nan for di e área ei. (Génesis 19:15, 16) Siglonan despues, enemigunan di profeta Daniel a laga bent’é den un kueba di leon, pero e no a sufri daño i a bisa: “Mi Dios a manda su angel i a sera boka di e leonnan.” (Daniel 6:22) Den e promé siglo di nos era, un angel a libra apòstel Pedro for di prizon. (Echonan 12:6-11) Ademas, angelnan a sostené Hesus na komienso di su ministerio riba  tera. (Marko 1:13) I poko promé ku Hesus su morto, un angel a aparesé na dje i a “fortales’é.” (Lukas 22:43) Sosten di e angelnan na e momentunan hopi importante ei di Hesus su bida lo mester tabata un gran konsuelo p’e!

6. (a) Kon angel ta protehá Dios su pueblo awe? (b) Ki preguntanan nos lo konsiderá awor?

6 Awe, angelnan no ta aparesé visiblemente mas na Dios su pueblo riba tera. Ounke hende no por mira Dios su angelnan poderoso, te ainda nan ta protehá su pueblo, spesialmente kontra kualke daño spiritual. Beibel ta bisa: “E angel di SEÑOR ta kampa rònt di esnan ku ta tem’é, i ta reskatá nan.” (Salmo 34:7) Dikon e palabranan ei mester ta un gran konsuelo pa nos? Pasobra tin kriaturanan spiritual malbado peligroso ku ke destruí nos! Ken nan ta? Di unda nan ta bin? Kon nan ta purba perhudiká nos? Pa haña kontesta riba e preguntanan aki, laga nos konsiderá brevemente algu ku a pasa na komienso di historia humano.

KRIATURANAN SPIRITUAL KU TA NOS ENEMIGU

7. Te na ki grado Satanas a logra apartá hende for di Dios?

7 Manera nos a siña den Kapítulo 3 di e buki aki, un di e angelnan a desaroyá un deseo pa goberná riba otro persona i p’esei el a bira kontra Dios. Mas despues e angel aki a bira konosí komo Satanas e Diabel. (Revelashon 12:9) Durante e 16 siglonan ku a sigui despues ku el a gaña Eva, Satanas a logra apartá kasi tur hende for di Dios ku eksepshon di un par di persona fiel, manera Abel, Enok i Noe.—Hebreonan 11:4, 5, 7.

8. (a) Kon algun angel a bira demoño? (b) Pa sobrebibí e Diluvio di tempu di Noe, kiko e demoñonan mester a hasi?

8 Den tempu di Noe, otro angelnan a rebeldiá kontra Yehova. Nan a bandoná nan lugá den Dios su famia selestial, baha bin na tera i bisti kurpa di karni. Pakiko? Nos ta lesa na Génesis 6:2: “E yu hòmbernan di Dios a mira ku e  yu muhénan di hende tabata bunita; i nan a tuma esposanan pa nan mes, esun ku nan tabata kier a skohe.” Pero Yehova Dios no a permití pa e akshon di e angelnan aki sigui ni e korupshon ku esei a trese riba humanidat. El a trese un diluvio mundial riba tera ku a destruí tur hende malbado i a konserbá solamente su sirbidónan fiel. (Génesis 7:17, 23) Pues, e angelnan rebelde (òf demoñonan) a haña nan fòrsá ta bandoná nan kurpa karnal i bolbe na shelu komo kriaturanan spiritual. Nan akshon a pone nan na banda di Diabel, kende e ora ei a bira e gobernante òf “prens di demoñonan.”—Mateo 9:34.

9. (a) Kiko a pasa ku e demoñonan ora ku nan a bolbe na shelu? (b) Kiko nos lo konsiderá relashoná ku e demoñonan?

 9 Ora ku e angelnan desobediente a bolbe na shelu, nan—meskos ku nan gobernante Satanas—no por a forma parti mas di Dios su famia di angel. (2 Pedro 2:4, NW) Ounke awor nan no por bisti kurpa humano mas, tòg ainda nan ta ehersé hopi mal influensia riba hende. De echo, ku yudansa di e demoñonan aki, Satanas “ta gaña henter mundu.” (Revelashon 12:9; 1 Juan 5:19) Kon? E demoñonan ta usa prinsipalmente métodonan diseñá pa gaña hende. (2 Korintionan 2:11) Laga nos konsiderá algun di e métodonan aki.

KON DEMOÑO TA GAÑA HENDE

10. Kiko ta spiritismo?

10 Pa gaña hende, e demoñonan ta usa spiritismo. E práktika di spiritismo ta metementu ku demoño, sea ku un persona ta tuma kontakto direkto ku e demoñonan òf ku e ta usa un intermediario òf medio humano pa esei. Beibel ta kondená spiritismo i ta spièrta nos pa keda liber di tur kos konektá kuné. (Galationan 5:19-21) E demoñonan ta usa spiritismo meskos ku piskadó ta usa as. Un piskadó ta usa vários tipo di as pa kue diferente tipo di piská. Asina tambe spiritunan malbado ta usa diferente forma di spiritismo pa trese tur tipo di hende bou di nan influensia.

11. Kiko ta adivinashon, i dikon nos mester evit’é?

11 Un tipo di as ku demoñonan ta usa ta adivinashon. Kiko ta adivinashon? Esei ta miramentu di destino, un intento pa haña sa tokante futuro òf algu deskonosí. Algun forma di adivinashon ta astrologia, uso di bará di karta tarot, wakmentu den bola di kristal, lesamentu di plant’i man i buskamentu di señalnan misterioso den soño. Ounke hopi hende ta pensa ku praktikamentu di adivinashon ta inofensivo, Beibel ta mustra ku miradónan di destino i spiritunan malbado ta traha huntu. Por ehèmpel, Echonan  16:​16-18 ta menshoná “un spiritu di adivinashon” ku a duna un mucha muhé e abilidat pa praktiká “miramentu di destino.” Pero e mucha muhé a pèrdè e abilidat aki ora ku a saka e demoño for di dje.

E demoñonan ta usa vários método pa gaña hende

12. Dikon ta peligroso pa purba komuniká ku e mortonan?

12 Un otro manera ku e demoñonan ta gaña hende ta dor di animá nan pa konsultá e mortonan. Hende ku ta pena pa e morto di un ser kerí hopi bes ta ser gañá dor di ideanan robes relashoná ku e defuntunan. Un medio spiritista kisas ta duna informashon spesial òf ta papia ku un stèm ku ta parse esun di un defuntu. Komo resultado, hopi hende ta keda konvensí ku e mortonan realmente ta na bida i ku dor di tuma kontakto ku nan, esnan na bida por soportá nan pena. Pero tal “konsuelo” en realidat ta falsu i tambe peligroso. Dikon? Pasobra e demoñonan por imitá stèm di un defuntu i duna un medio spiritista informashon tokante e defuntu. (1 Samuel 28:3-19) Ademas, manera nos a siña den Kapítulo 6, e mortonan a stòp di eksistí. (Salmo  115:17) Pues anto, ken “ku ta konsultá ku e mortonan” a ser gañá dor di spiritunan malbado i ta aktua kontrario na e boluntat di Dios. (Deuteronomio 18:10, 11; Isaias 8:19) P’esei tene kuidou, i rechasá e as peligroso aki ku e demoñonan ta usa.

13. Kiko hopi hende ku un tempu tabatin miedu di demoño a logra hasi?

13 Spiritunan malbado no solamente ta gaña hende sino ta spanta nan tambe. Awe, Satanas i su demoñonan sa ku nan tin “solamente un poko tempu mas” promé ku saka nan for di akshon, i awor nan ta mas feros ku nunka. (Revelashon 12:12, 17) Apesar di esei, míles di hende ku un tempu tabata biba tur dia ku miedu di e spiritunan malbado ei a logra libra nan mes di e miedu ei. Kon nan a hasi esaki? Kiko un persona por hasi asta si e ta enbolbí kaba ku spiritismo?

KON PA RESISTÍ SPIRITUNAN MALBADO

14. Meskos ku e kristiannan di promé siglo na Efeso, kon nos por libra for di spiritunan malbado?

14 Beibel ta konta nos tantu kon pa resistí spiritunan malbado komo kon pa libra for di nan. Konsiderá e ehèmpel di e kristiannan di promé siglo den e stat di Efeso. Algun di nan a praktiká spiritismo promé ku nan a bira kristian. Ora ku nan a disidí di legumai spiritismo, kiko nan a hasi? Beibel ta bisa: “Hopi di esnan ku tabata praktiká magia a trese nan bukinan huntu i a kima nan dilanti di tur.” (Echonan 19:19) Dor di destruí nan bukinan di magia, e kristiannan nobo ei a pone un ehèmpel pa esnan ku ta deseá di resistí spiritunan malbado awe. Hende ku ke sirbi Yehova tin ku deshasí di tur kos konektá ku spiritismo. Esei ta enserá buki, revista, pelíkula, poster i grabashonnan musikal ku ta stimulá e práktika di spiritismo i ku ta lag’é parse un kos atraktivo i eksitante. Tambe nan tin ku deshasí di  amuleto òf otro artíkulonan ku hende ta bisti komo protekshon kontra kos malu.—1 Korintionan 10:21.

15. Kiko nos tin ku hasi pa resistí forsanan spiritual malbado?

15 Algun aña despues ku e kristiannan na Efeso a destruí nan bukinan di magia, apòstel Pablo a skirbi nan: “Nos lucha . . . [ta] kontra e forsanan spiritual di maldat.” (Efesionan 6:12) E demoñonan no a entregá. Ainda nan tabata purba haña un gara riba e kristiannan. Pues kiko mas e kristiannan ei tabatin ku hasi? Pablo a bisa: “Riba tur kos, [tuma] e eskudo di fe, ku kual boso lo por paga tur e flechanan sendí di e malbado [Satanas].” (Efesionan 6:16) Mas fuerte nos eskudo di fe ta, mas grandi nos resistensia kontra forsanan spiritual malbado lo ta.—Mateo 17:20.

16. Kon nos por fortalesé nos fe?

16 Kon anto nos por fortalesé nos fe? Dor di studia Beibel. Por ehèmpel, pa un muraya ta firme, su fundeshi mester ta fuerte. Asina tambe e firmesa di nos fe ta dependé pa gran parti di kon fuerte su fundeshi—ku ta e konosementu eksakto di Dios su Palabra, Beibel—ta. Si nos ta lesa i studia Beibel tur dia, nos fe lo bira fuerte. Meskos ku un muraya fuerte, un fe asina lo protehá nos di e influensia di spiritunan malbado.—1 Juan 5:5.

17. Ki paso ta nesesario pa nos por resistí spiritunan malbado?

17 Ki otro paso e kristiannan na Efeso tabatin ku tuma? Nan tabatin mester di mas protekshon pasobra nan tabata biba den un stat yen di demonismo. P’esei Pablo a bisa nan: “Ku tur orashon i súplika pidi tur ora bai den spiritu.” (Efesionan 6:18) Siendo ku nos tambe ta biba den un mundu yen di demonismo, ta esensial pa nos hasi orashon sinsero na Yehova pa pidié su protekshon pa resistí spiritunan malbado. Klaru ku nos tin ku usa e nòmber di Yehova den nos orashonnan. “E nòmber di Yehova ta un toren fuerte. Den dje e hustu ta kore drenta i ta ser duná protekshon.” (Proverbionan 18:10, NW) Pues anto, nos tin  ku sigui pidi Dios “libra nos for di e malbado,” Satanas e Diabel. (Mateo 6:13) Yehova lo kontestá tal orashon sinsero.—Salmo 145:19.

18, 19. (a) Dikon nos por tin sigur ku nos lo sali viktorioso den nos lucha kontra kriaturanan spiritual malbado? (b) Kua pregunta lo haña kontesta den e siguiente kapítulo?

18 Spiritunan malbado ta peligroso, pero si nos ta oponé e Diabel i hala serka Dios dor di hasi Su boluntat, nos no tin nodi biba ku miedu di nan. (Santiago 4:7, 8) E poder di spiritunan malbado ta limitá. Nan a haña kastigu den tempu di Noe, i nan ta konfrontá nan huisio final den futuro. (Hudas 6) Kòrda tambe ku nos tin e protekshon di Yehova su angelnan poderoso. (2 Reinan 6:15-17) E angelnan ei ta profundamente interesá pa mira nos logra resistí spiritunan malbado. E angelnan hustu na moda di papia ta enkurashá nos pa sigui padilanti den nos lucha. P’esei laga nos keda serka di Yehova i di su famia di fiel kriaturanan spiritual. Laga nos evitá tambe tur tipo di spiritismo i semper apliká e konseho di e Palabra di Dios. (1 Pedro 5:6, 7; 2 Pedro 2:9) E ora ei nos por tin sigur ku nos lo sali viktorioso den nos lucha kontra kriaturanan spiritual malbado.

19 Pero dikon Dios a tolerá spiritunan malbado i e maldat ku a pone hende sufri asina tantu? Den e siguiente kapítulo nos ta haña e kontesta.