Bai na kontenido

Bai na kontenido

 KAPÍTULO TRES

Kiko Ta Dios Su Propósito pa e Tera?

Kiko Ta Dios Su Propósito pa e Tera?
  • Kiko ta Dios su propósito pa humanidat?

  • Kon Dios a ser oponé?

  • Kon bida riba tera lo ta den futuro?

1. Kiko ta Dios su propósito pa e tera?

DIOS su propósito pa e tera ta realmente maravioso. Yehova ke pa e tera yena ku hende felis i salú. Beibel ta bisa ku ‘Dios a planta un hòfi na Edén’ i ku el a laga “nase tur palu ku ta agradabel pa bista i bon pa kuminda.” Despues ku Dios a krea e promé hòmber i muhé, Adam ku Eva, El a pone nan den e kas bunita ei i a bisa nan: “Sea fruktífero i multipliká, i yena e tera i hasi esaki someté na bo.” (Génesis 1:28; 2:8, 9, 15) Pues Dios su propósito tabata pa hende haña yu, transformá henter e tera den un paradeis i kuida e bestianan.

2. (a) Kon nos por sa ku Dios su propósito pa e tera lo kumpli? (b) Segun Beibel, ki klase di hende lo biba pa semper?

2 Bo ta kere ku Yehova Dios su propósito pa hende biba den un paradeis riba tera lo keda realisá un dia? Dios ta deklará: “Di bèrdat mi a papia . . . siguramente lo mi hasié.” (Isaias 46:9-11; 55:11) Sí, Dios sigur lo kumpli ku su propósito! E ta bisa ku e “no a krea [e tera] pa e keda bashí,” ma “a form’é pa e wòrdu habitá.” (Isaias 45:18) Ki klase di hende Dios ke pa biba riba tera? I pa kuantu tempu e ke pa nan biba riba dje? Beibel ta kontestá: “E hustunan lo heredá e tera, i lo biba den dje pa semper.”Salmo 37:29; Revelashon 21:3, 4.

3. Ki kondishonnan tristu tin awe riba tera, i ki preguntanan esei ta lanta?

 3 Ta bisto ku esaki no a tuma lugá ainda. Awendia hende ta bira malu i ta muri; nan ta asta bringa i mata otro. Un kos a bai robes. Pero sigur no tabata Dios su propósito pa mundu ta manera nos ta mir’é awe! Kiko a pasa? Dikon Dios su propósito no a kumpli? Ningun buki di historia ku hende a skirbi no por bisa nos pasobra e problema a kuminsá den shelu.

E ORÍGEN DI UN ENEMIGU

4, 5. (a) Ken realmente a papia ku Eva pa medio di e kolebra? (b) Kon un persona ku un tempu tabata desente i onesto lo por para bira un ladron?

4 E promé buki di Beibel ta konta nos ku den hòfi di Edén a presentá un opositor, un persona ku a bai kontra Dios. Beibel ta deskribié komo “e kolebra,” pero e no tabata djis un bestia. E último buki di Beibel ta identifik’é komo esun “kende ta wòrdu yamá Diabel i Satanas, kende ta gaña henter mundu.” Tambe Beibel ta yam’é “e kolebra di antigwedat.” (Génesis 3:1; Revelashon 12:9) E angel poderoso aki, òf kriatura spiritual invisibel, a usa un kolebra pa papia ku Eva, meskos ku un persona ábil por usa su stèm pa laga parse ku ta un pòpchi banda di dje ta papia. E persona spiritual ei sin duda tabata presente ora ku Dios a prepará e tera pa hende.—Jòb 38:4, 7.

5 Sin embargo, siendo ku tur loke Yehova a krea ta perfekto, ta ken a traha e “Diabel,” e “Satanas,” aki? Simplemente bisá, un di e yunan spiritual poderoso di Dios a kombertí su mes den Diabel. Kon esaki tabata posibel? Wèl, awe un persona ku un tempu tabata desente i onesto por para bira un ladron. Kon esei ta sosodé? Kisas e persona ta permití un mal deseo desaroyá den su kurason.  Si e keda pensa riba dje, e mal deseo ei por bira hopi fuerte. Anto si e oportunidat presentá, lo e por aktua di akuerdo ku e mal deseo ku e tabata pensa riba dje.—Santiago 1:13-15.

6. Kon un yu spiritual poderoso di Dios a bira Satanas e Diabel?

6 Esaki a sosodé den kaso di Satanas e Diabel. Aparentemente el a tende Dios bisa Adam ku Eva pa nan haña yu i yena e tera ku nan yunan. (Génesis 1:27, 28) Satanas a pensa evidentemente: ‘Hei, tur e hendenan aki lo por adorá ami en bes di Dios!’ Pues un mal deseo a desaroyá den su kurason. Ku tempu, el a dal paso pa gaña Eva dor di kont’é mentira tokante Dios. (Génesis 3:1-5) Asina el a bira un “Diabel,” lokual ta nifiká “Kalumniadó.” A la bes el a bira “Satanas,” lokual ta nifiká “Opositor.”

7. (a) Dikon Adam ku Eva a muri? (b) Dikon tur yu di Adam ta bira bieu i ta muri?

7 Dor di usa mentira i triki, Satanas e Diabel a pone Adam ku Eva desobedesé Dios. (Génesis 2:17; 3:6) Komo resultado, nan a muri despues di tempu, manera Dios a bisa lo a pasa si nan desobedesé. (Génesis 3:17-19) Komo ku Adam a bira imperfekto ora el a peka, tur su yunan a heredá piká for di dje. (Romanonan 5:12) Nos lo por kompará e situashon aki ku un forma pa traha pan òf bolo. Si e forma tin un deuk aden, kiko ta pasa ku tur pan òf bolo ku bo traha den dje? Tur lo sali ku un deuk òf imperfekshon. Di mesun manera, tur hende a heredá un “deuk” di imperfekshon for di Adam. Ta p’esei tur hende ta bira bieu i ta muri.—Romanonan 3:23.

8, 9. (a) Ki desafio Satanas evidentemente a presentá? (b) Dikon Dios no a destruí e rebeldenan mesora?

8 Ora ku Satanas a pone Adam ku Eva peka kontra Dios, Satanas eigenlijk a enkabesá un rebelion. El a desafiá òf reta Yehova su manera di goberná. Bon mirá,  Satanas a bisa: ‘Dios ta un mal gobernante. E ta papia mentira i ta skonde kos bon for di su súpditonan. Hende no tin mester di Dios pa goberná riba nan. Nan por disidí pa nan mes loke ta bon i loke ta malu. I lo bai nan mas mihó bou di mi gobernashon.’ Kon Dios lo a atendé un akusashon ofensivo asina? Tin hende ta pensa ku Dios simplemente mester a mata e rebeldenan ei. Pero esei lo  a kontestá Satanas su desafio? Esei lo a proba ku Dios su manera di goberná ta korekto?

9 Yehova su sentido perfekto di hustisia no a permitié mata e rebeldenan mesora. El a disidí ku mester di tempu pa kontestá Satanas su desafio na un manera satisfaktorio i pa demostrá ku Diabel ta un mentiroso. Pues, Dios a disidí ku lo e permití hende goberná nan mes pa un tempu bou di e influensia di Satanas. Den Kapítulo 11 di e buki aki nos lo konsiderá dikon Yehova a hasi esei i dikon el a permití asina tantu tempu pasa promé ku e resolvé e kuestionnan aki. Pero ta bon pa nos pensa awor riba esaki: Adam ku Eva tabatin rason pa kere Satanas, kende nunka no a hasi nada bon pa nan? Tabata korekto pa nan kere ku Yehova—kende a duna nan tur kos ku nan tabatin—ta un mentiroso kruel? Kiko abo lo a hasi?

10. Kon bo por apoyá e banda di Yehova komo kontesta riba e desafio di Satanas?

10 Ta bon pa pensa riba e preguntanan aki pasobra kada un di nos ta konfrontá kuestionnan similar awe. Sí, abo tin e oportunidat di apoyá e banda di Yehova komo kontesta riba e desafio di Satanas. Bo por aseptá Yehova komo bo Gobernante i yuda mustra ku Satanas ta un mentiroso. (Salmo 73:28; Proverbionan 27:11) Lamentablemente, ta masha poko hende entre e míles di miónes di hendenan ku tin riba e mundu aki ta skohe pa hasi esei. Esaki ta lanta un pregunta importante: Beibel realmente ta siña ku ta Satanas ta goberná e mundu aki?

KEN TA GOBERNÁ E MUNDU AKI?

Kon Satanas por a ofresé Hesus tur e reinonan di mundu si nan no tabata di dje?

11, 12. (a) Kon un tentashon ku Hesus a haña ta revelá ku ta Satanas ta e gobernante di e mundu aki? (b) Kiko mas ta duna prueba ku Satanas ta e gobernante di e mundu aki?

11 Hesus nunka a duda ku ta Satanas ta gobernante di e  mundu aki. Den un manera milagroso, Satanas un biaha a mustra Hesus “tur e reinonan di mundu i nan gloria.” Anto Satanas a primintí Hesus: “Tur e kosnan aki lo mi duna bo, si bo tira bo kurpa abou i adorá mi.” (Mateo 4:8, 9; Lukas 4:5, 6) Pensa un ratu riba esaki. E oferta ei lo tabata un tentashon pa Hesus si Satanas no tabata e gobernante di e reinonan aki? Hesus no a nenga ku tur e gobièrnunan aki di mundu tabata di Satanas. Hesus sigur lo a hasi esei si Satanas no tabata e poder ku a dirigí nan.

12 Naturalmente, Yehova ta e Dios Todopoderoso, Kreadó di e maravioso universo. (Revelashon 4:11) Sin embargo, ningun kaminda Beibel ta bisa ku sea Yehova Dios òf Hesukristu ta gobernante di e mundu aki. De echo, Hesus spesífikamente a referí na Satanas komo e gobernante òf “e prens di e mundu aki.” (Juan 12:31; 14:30; 16:11) Beibel ta asta referí na Satanas e Diabel komo “e dios di e mundu aki.” (2 Korintionan 4:3, 4) Apòstel kristian Juan a skirbi tokante e opositor, òf Satanas, aki: “Henter mundu ta bou di kontròl di e malbado.”—1 Juan 5:19.

KON LO ELIMINÁ E MUNDU DI SATANAS

13. Dikon nos tin mester di un mundu nobo?

13 Kada aña ku pasa, mundu ta bira mas i mas peligroso. E ta pèstá ku ehérsitonan den guera, polítikonan desonesto, lidernan religioso hipókrita i kriminalnan sin heful. Ta imposibel pa reformá henter mundu. Beibel ta revelá ku e tempu pa Dios eliminá e mundu malbado aki durante su guera di Armagedón ta serka. Esaki lo habri kaminda pa un hustu mundu nobo.—Revelashon 16:14-16.

14. Ken Dios a skohe pa ta Gobernante di Su Reino, i kon Beibel a predisí esaki?

 14 Yehova Dios a skohe Hesukristu pa ta Gobernante di Yehova su gobièrnu òf Reino selestial. Hopi tempu pasá Beibel a predisí: “Un yu a nase pa nos, un yu hòmber ta duná na nos, i e gobernashon lo ta riba su skouder. Su nòmber lo ta . . . Prens di Pas. Lo no tin fin na e oumento di su gobernashon i di pas.” (Isaias 9:6, 7) Relashoná ku e gobièrnu aki, Hesus a siña su siguidónan pa pidi den orashon: “Ku bo reino bin. Ku bo boluntat sosodé na tera meskos ku den shelu.” (Mateo 6:⁠10) Manera nos lo mira mas despues den e buki aki, e Reino di Dios pronto lo kita tur e gobièrnunan di e mundu aki, i e mes lo tuma nan lugá. (Daniel 2:44) E ora ei e Reino di Dios lo trese un paradeis riba tera.

UN MUNDU NOBO TA SERKA!

15. Kiko e “tera nobo” ta?

15 Beibel ta sigurá nos: “Segun [Dios] su promesa nos ta sperando shelunan nobo i un tera nobo, den kual ta biba hustisia.” (2 Pedro 3:13; Isaias 65:17) Tin biaha ora Beibel ta papia di e “tera,” e ke men e hendenan ku ta biba riba tera. (Génesis 11:1) Pues, e hustu “tera nobo” ta un sosiedat di hende ku ta haña Dios su aprobashon.

16. Menshoná un regalo masha presioso ku Dios lo duna e hendenan ku e ta aprobá, i kiko nos tin ku hasi pa hañ’é?

16 Hesus a primintí ku den e binidero mundu nobo, e hendenan aprobá pa Dios lo haña e regalo di “bida eterno.” (Marko 10:30) Sea asina bon di habri bo Beibel na Juan 3:16 i 17:3, i lesa loke Hesus a bisa ku nos tin ku hasi pa haña bida eterno. E hendenan ku ta bin na remarke pa e maravioso regalo ei di Dios den e binidero Paradeis riba tera lo gosa di hopi bendishon. Ban wak awor den Beibel kiko e bendishonnan ei lo ta.

17, 18. Kon nos por ta sigur ku lo tin pas i siguridat tur kaminda riba tera?

 17 Maldat, guera, krímen i violensia lo no t’ei mas. “E malbado lo no t’ei mas . . . Ma e humildenan lo heredá e tera.” (Salmo 37:10, 11) Lo tin pas pasobra ‘Dios lo hasi gueranan stòp te na e fin di tera.’ (Salmo 46:⁠9; Isaias 2:⁠4) E ora ei ‘e hustu lo floresé, i lo tin abundansia di pas te ora ku no tin luna mas,’ i esei ta nifiká pas pa semper!—Salmo 72:7.

18 Adoradónan di Yehova lo biba den siguridat. Tanten ku e israelitanan den tempu bíbliko a obedesé Dios, nan a biba den siguridat. (Levítiko 25:18, 19) Lo ta un kos maravioso di por disfrutá di un siguridat similar den Paradeis!—Isaias 32:18; Mikeas 4:4.

19. Dikon nos sa ku lo tin kuminda na abundansia den Dios su mundu nobo?

19 Lo no tin skarsedat di kuminda. E salmista a kanta: “Lo tin abundansia di maishi den e tera, riba kabes di e serunan.” (Salmo 72:16) Yehova Dios lo bendishoná su sirbidónan hustu, i ‘tera lo duna su fruta.’—Salmo 67:6.

20. Dikon nos por tin sigur ku henter e tera lo bira un paradeis?

20 Henter e tera lo bira un paradeis. Lo tin kasnan nobo i hòfinan bunita riba terenonan ku un tempu hende pekaminoso a destruí. (Isaias 65:21-24; Revelashon 11:18) Segun ku tempu ta pasa, partinan di tera ku ya hende a dominá lo sigui ekspandé te ora ku henter e planeta ta mes bunita i produktivo ku hòfi di Edén. I Dios sigur lo ‘habri su man, i satisfasé e deseo di tur ser bibu.’—Salmo 145:16.

21. Kiko ta mustra ku lo tin pas entre hende ku bestia?

21 Lo tin pas entre hende ku bestia. Bestianan salbahe i doméstiko lo kome huntu. Asta un mucha chikí lo no  tin miedu di bestianan ku awor ta peligroso.—Isaias 11:6-9; 65:25.

22. Kiko lo pasa ku malesa?

22 Malesa lo disparsé. Komo Gobernante di Dios su Reino selestial, Hesus lo kura hende na un eskala hopi mas grandi ku tempu e tabata riba tera. (Mateo 9:35; Marko 1:40-42; Juan 5:5-9) E ora ei “ningun habitante lo no bisa: ‘Mi ta malu.’”—Isaias 33:24; 35:5, 6.

23. Dikon e resurekshon lo alegrá nos kurason?

23 Sernan kerí morto lo resusitá ku e speransa di no muri nunka. Tur e mortonan ku ta den Dios su memoria lo ser resusitá. De echo, “lo tin un resurekshon di tantu e hustunan komo e malbadonan.”​—Echonan 24:15; Juan 5:28, 29.

24. Kiko bo ta pensa di biba den Paradeis riba tera?

24 Ki un futuro maravioso ta spera e hendenan ku skohe pa siña tokante nos Magnífiko Kreadó, Yehova Dios, i sirbié! Ta na e binidero Paradeis Hesus a referí ora ku el a primintí e malechor ku a muri banda di dje: “Lo bo ta serka mi den Paraiso.” (Lukas 23:43) Ta masha importante anto pa nos siña mas tokante Hesukristu, pa medio di ken tur e bendishonnan aki lo bira posibel.