KRUS ta un símbolo ku miónes di hende ta stima i respetá. The Encyclopædia Britannica ta yama krus “e símbolo prinsipal di e religion kristian.” Apesar di esei, kristiannan berdadero no ta usa krus den adorashon. Dikon nò?

Un motibu importante ta ku Hesukristu no a muri na krus. E palabra griego generalmente tradusí komo “krus” ta stau·rós. E ta nifiká básikamente “un palu òf staka règt.” The Companion Bible ta trese dilanti: “[Stau·rós] nunka a nifiká dos pida palu poné krusá riba otro na ningun ángulo . . . No tin nada den e griego di e [Tèstamènt Nobo] ku ta indiká sikiera indirektamente na dos pida palu.”

Tin un otro palabra tambe ku Beibel ta usa pa e instrumento  riba kua Hesus a muri. Esei ta e palabra griego xý·lon. (Galationan 3:13) E palabra aki simplemente ta nifiká “palu” òf “un stòki, garoti òf palu di mata.”

E buki Das Kreuz und die Kreuzigung (Krus i Krusifikashon), di Hermann Fulda, a splika dikon hopi bes hende a usa un simpel staka pa ehekushon, bisando: “No ta tur kaminda ku nan a skohe pa un ehekushon públiko tabatin palu disponibel. P’esei nan tabata hinka un simpel biga den suela. Na esaki nan tabata mara òf klaba e malechornan ku nan mannan hisá ariba i hopi bes tabata mara òf klaba nan pianan tambe.”

Sin embargo, e prueba mas konvinsente di tur ta bin di e Palabra di Dios. Apòstel Pablo ta bisa: “Kristu a redimí nos di e maldishon di Lei, birando un maldishon pa nos—pasobra ta pará skirbí: ‘Maldishoná ta tur esnan ku ta kologá na un palu [òf, “un staka”].’” (Galationan 3:13) Aki Pablo ta sita Deuteronomio 21:22 i 23, ku na hebreo ta referí bon kla na un staka, no un krus. Ademas, siendo ku ta e medio ei di ehekushon a hasi e persona “un maldishon,” lo no ta korekto pa kristiannan dekorá nan kas ku imágennan di Kristu kologá na staka.

No tin ningun evidensia ku durante e promé 300 añanan despues di Kristu su morto, hende ku tabata bisa ku nan ta kristian a usa krus den adorashon. Sin embargo, den siglo 4 e emperador pagano Constantino a kombertí na kristianismo apóstata i a promové krus komo e símbolo di kristianismo. Sea kual sea tabata e motibunan di Constantino, krus no tabatin nada keber ku Hesukristu. De echo, krus ta di orígen pagano. New Catholic Encyclopedia ta atmití: “Nos ta haña krus tantu den kulturanan pre-kristian komo no-kristian.” Vários otro outoridat a konektá krus ku adorashon di naturalesa i ritonan seksual pagano.

Dikon anto nan a promové e símbolo pagano aki? Aparentemente, pa hasié mas fásil pa paganonan aseptá “kristianismo.” Sin embargo, Beibel klaramente ta kondená deboshon na kualke símbolo pagano. (2 Korintionan 6:14-18) Tambe e Skritura ta prohibí tur forma di adorashon di imágen, esta, idolatria.  (Eksodo 20:4, 5; 1 Korintionan 10:14) P’esei ku hopi bon motibu anto kristiannan berdadero no ta usa krus den adorashon. *

^ par. 5 Pa un konsiderashon mas detayá di krus, wak página 91-5 di e buki Rasonamentu for di e Skritura na spañó, publiká dor di Testigunan di Yehova.