Bai na kontenido

Bai na kontenido

 KAPÍTULO DOS

Beibel—Un Buki for di Dios

Beibel—Un Buki for di Dios
  • Den ki maneranan Beibel ta distinto for di tur otro buki?

  • Kon Beibel por yuda bo enfrentá problemanan personal ku éksito?

  • Dikon bo por konfia e profesianan ku tin pará skirbí den Beibel?

1, 2. Den ki maneranan Beibel ta un regalo emoshonante di Dios?

BO POR kòrda un biaha ku bo a yega di haña un regalo masha spesial serka un bon amigu òf amiga? Probablemente, esei no solamente a emoshoná bo sino ku tambe bo a sinti bo hopi felis. De echo, un regalo ta bisa bo algu di e dunadó, esta, ku e ta apresiá bo amistat. Sin duda bo a gradisí bo amigu òf amiga pa su regalo ku ta un muestra di atenshon.

2 Beibel ta un regalo for di Dios, un regalo pa kua nos por ta hopi gradisidu. E buki úniko aki ta revelá kosnan ku di otro manera nos lo no a sa nunka. Por ehèmpel, e ta konta nos tokante kreashon di e shelunan yen di strea, di tera i di e promé hòmber i muhé. Den Beibel tin prinsipionan konfiabel pa yuda nos enfrentá e problemanan i preokupashonnan di bida ku éksito. Beibel ta splika kon Dios lo kumpli ku su propósito i trese mihó kondishonnan riba tera. Beibel sí ta un regalo hopi emoshonante!

3. Kiko e echo ku Yehova a sòru pa nos haña e Beibel ta bisa nos di Yehova, i dikon esaki ta konmové nos?

3 Ademas Beibel ta un regalo ku ta konmové nos, pasobra e ta revelá algu tokante Esun ku a dun’é, Yehova Dios.  E echo ku el a sòru pa nos haña un buki asina ta prueba ku e ke pa nos siña konos’é bon. Sí, Beibel por yuda bo hala serka Yehova.

4. Kiko ta impreshoná bo tokante e distribushon di Beibel?

4 Si bo tin un Beibel, bo no ta e úniko. Hende a publiká e Beibel—sea kompletu òf en parte—den mas ku 2.300 idioma, pues e ta disponibel pa mas ku 90 porshento di e poblashon di mundu. Komo promedio, mas ku un mion Beibel ta keda distribuí tur siman! Hende a produsí míles di miónes di Beibel, sea kompletu òf en parte. Un kos ta sigur, no tin ningun otro buki manera Beibel.

E “Tradukshon di Mundu Nobo di e Santu Skritura” ta disponibel na hopi idioma

5. Den ki manera Beibel ta “inspirá pa Dios”?

5 Ademas, Beibel “ta inspirá pa Dios.” (2 Timoteo 3:16) Den ki manera? Beibel mes ta kontestá: “Hòmbernan santu di Dios a papia, inspirá dor di spiritu santu.” (2 Pedro 1:21) Pa ilustrá esaki: Un komersiante kisas ta laga un sekretaria skirbi un karta. Den e karta tin pensamentu i instrukshon di e komersiante. P’esei realmente ta su karta, no di e sekretaria. Di mesun manera, Beibel ta kontené Dios su mensahe, no di e hòmbernan ku a skirbié. Pues, di bèrdat  henter e Beibel ta “e palabra di Dios.”​—1 Tesalonisensenan 2:13.

ARMONIOSO I EKSAKTO

6, 7. Dikon e armonia ku tin entre e diferente partinan di Beibel ta hopi remarkabel?

6 Beibel a keda skirbí durante un periodo di 1.600 aña. Su eskritornan a biba na diferente tempu for di otro i a bin for di tur gremio. Algun tabata kunukero, piskadó i wardadó di karné. Otronan tabata profeta, hues i rei. Lukas, un di e eskritornan di Evangelio, tabata dòkter. Apesar ku e eskritornan di Beibel a bin di vários antesedente, tur parti di Beibel ta armonisá òf kuadra ku otro for di kuminsamentu te final. *

7 E promé buki di Beibel ta konta nos kon e problemanan di humanidat a kuminsá. E último buki ta mustra ku henter e tera lo bira un hòfi, un paradeis. Tur e informashon ku tin den Beibel ta abarká míles di aña di historia i kada parti di un manera òf otro ta yuda nos komprondé kiko ta Dios su propósito i kon lo e kumpli. E armonia ku tin entre e diferente partinan di Beibel ta impreshonante, pero ta esei ta loke nos ta ferwagt di un buki ku ta bin di Dios.

8. Duna algun ehèmpel ku ta mustra ku Beibel ta eksakto den asuntunan sientífiko.

8 Beibel ta eksakto den asuntunan sientífiko. E tin asta informashon ku tabata hopi avansá pa su tempu. Por ehèmpel, den e buki di Levítiko tabatin leinan pa antiguo Israel tokante karentena i higiena, miéntras ku e nashonnan rònt di nan no tabata sa nada di e asuntunan ei. Na un tempu ku hende tabatin ideanan robes tokante e forma di nos planeta tera, Beibel a referí na dje komo un sírkulo. (Isaias 40:22) Ku eksaktitut Beibel a bisa ku tera ‘ta kologá riba nada.’ (Jòb  26:7) Klaru ku Beibel no ta un buki pa studia siensia. Pero ora e ta menshoná asuntunan sientífiko, e ta eksakto. Esaki ta loke nos lo a ferwagt di un buki for di Dios, no ta asina?

9. (a) Den ki maneranan Beibel ta mustra ku su historianan ta eksakto i konfiabel? (b) Kiko e onestidat di e eskritornan bíbliko ta bisa bo di Beibel?

9 Beibel su historianan tambe ta eksakto i konfiabel. Su relatonan ta spesífiko. Nan ta inkluí no solamente e nòmber di sierto personanan sino tambe nan liña di desendensia. * Na kontraste ku otro historiadónan, kende hopi bes no a menshoná e derotanan di nan propio pueblo, eskritornan bíbliko sí tabata onesto. Asta nan a skirbí nan propio fayonan i e fayonan di nan nashon. Por ehèmpel, den e buki bíbliko di Numbernan, e eskritor Moisés ta atmití e eror serio ku el a kometé pa kua el a haña un bon skual. (Numbernan 20:2-12) Tal onestidat ta masha skars den otro relatonan históriko, pero nos ta hañ’é den Beibel pasobra e ta un buki for di Dios.

UN BUKI DI SABIDURIA PRÁKTIKO

10. Dikon no ta un sorpresa ku Beibel ta un buki práktiko?

10 Komo ku Beibel ta inspirá pa Dios, e ta “útil pa siñansa, pa reprendementu, pa korekshon.” (2 Timoteo 3:16) Sí, Beibel ta un buki práktiko. E ta reflehá un komprondementu profundo di hende su naturalesa. Pero esei no ta un sorpresa, pasobra Beibel su Outor, Yehova Dios, ta e Kreadó. E ta komprondé nos manera di pensa i nos emoshonnan mas mihó ku nos mes. Ademas, Yehova sa kiko nos mester pa nos ta felis. E sa tambe ki rumbo den bida nos mester evitá.

11, 12. (a) Riba ki tópiko Hesus a papia den su Sermon Riba Seru? (b) Ki otro asuntunan práktiko Beibel ta konsiderá, i dikon su konseho ta semper bai balioso?

11 Tuma por ehèmpel Hesus su spich ku nan ta yama e  Sermon Riba Seru ku ta pará skirbí na Mateo kapítulo 5 te ku 7. E spich aki tabata maestral. E ta un bon ehèmpel kon pa siña hende. Den dje Hesus a papia riba vários tópiko, entre otro, e manera pa haña berdadero felisidat, kon pa resolvé desakuerdo, kon pa hasi orashon i kon pa tin e punto di bista korekto di kosnan material. E palabranan di Hesus ta mesun poderoso i práktiko awe ku nan tabata tempu ku el a papia nan.

 12 Algun prinsipio di Beibel ta trata ku bida di famia, kustumber di trabou i relashon ku otro hende. E prinsipionan di Beibel ta konta pa tur hende, i su konseho semper ta probechoso. Loke Dios a bisa via profeta Isaias ta resumí e sabiduria ku nos ta haña den Beibel: “Ami ta SEÑOR bo Dios, kende ta siña bo, pa bo prosperá.”—Isaias 48:17.

UN BUKI DI PROFESIA

E eskritor bíbliko Isaias a predisí e kaida di Babilonia

13. Ki detayenan Yehova a inspirá profeta Isaias pa skirbi tokante Babilonia?

13 Den Beibel tin kantidat di profesia, di kua hopi a kumpli kaba. Konsiderá un ehèmpel. Mediante profeta Isaias (ku a biba den siglo 8 promé ku nos era), Yehova a profetisá ku e stat di Babilonia lo a ser destruí. (Isaias 13:19; 14:22, 23) El a duna detayenan spesífiko kon esaki lo a sosodé. Ehérsitonan invasor lo a seka e riu di Babilonia i marcha drenta den e stat sin ku nan tin ku bringa. Esei no ta tur kos. Isaias su profesia asta a menshoná nòmber di e rei ku lo a konkistá Babilonia: Siro.—Isaias 44:27–45:2.

14, 15. Kon algun detaye di Isaias su profesia tokante Babilonia a kumpli?

14 Un 200 aña despues—riba e anochi di 5 pa 6 di òktober di aña 539 promé ku nos era—un ehérsito a kamper serka di Babilonia. Ken tabata su komandante? Un rei di Persia ku yama Siro. Pues, esenario tabata kla pa e kumplimentu di un profesia asombroso tuma lugá. Pero e ehérsito di Siro lo a invadí Babilonia sin un bataya, manera Beibel a predisí?

15 E babilonionan tabatin un fiesta e anochi ei i a sinti nan mes sigur tras di e murayanan masivo di nan stat. Miéntras tantu, Siro na un manera sabí a desviá e awa di e riu ku tabata kore dor di e stat. No a dura hopi ku e awa a baha sufisiente pa su hòmbernan por a pasa dor di e riu i yega na e murayanan di e stat. Pero kon e ehérsito di Siro  lo por a drenta paden di e murayanan di Babilonia? Pa un òf otro motibu, e anochi ei e sòldánan a deskuidá i a laga e portanan di e stat habrí!

16. (a) Kiko Isaias a predisí tokante e resultado final di Babilonia? (b) Kon Isaias su profesia tokante e desolashon di Babilonia a kumpli?

16 Beibel a predisí tokante Babilonia: “Di generashon pa generashon nunka mas e lo wòrdu habitá ni poblá; ni arabir lo no arma su tènt ayanan, ni wardadó di karné lo no pone su tou di karné drumi ayanan.” (Isaias 13:20) E profesia aki a hasi mas ku predisí kaida di e stat. El a mustra ku Babilonia lo a keda permanentemente desolá. Bo por mira evidensia di e kumplimentu di e palabranan aki. E sitio inhabitá di antiguo Babilonia—ku ta keda un 80 kilometer zùit di Bagdad, Irak—ta prueba ku loke Yehova a papia mediante Isaias a kumpli: “Lo mi barié ku e basora di destrukshon.”—Isaias 14:22, 23. *

Ruinanan di Babilonia

17. Kon e kumplimentu di profesia bíbliko ta hasi bo fe mas fuerte?

 17 Bo fe ta bira mas fuerte ora ku bo konsiderá kon Beibel ta un buki di profesia konfiabel, no ta bèrdat? De echo, si Yehova Dios a kumpli ku su promesanan di pasado, nos tin tur motibu pa ta sigur ku lo e kumpli tambe ku su promesa di transformá e tera den un paradeis. (Numbernan 23:⁠19) Sí, nos tin “e speransa di bida eterno, ku Dios, kende no por gaña, a primintí hopi siglonan pasá.”—Tito 1:2. *

“E PALABRA DI DIOS TA BIBU”

18. Ki deklarashon potente apòstel kristian Pablo a hasi tokante “e palabra di Dios”?

18 For di loke nos a konsiderá den e kapítulo aki, ta  bisto ku Beibel ta realmente un buki úniko. Sin embargo, su balor ta bai muchu mas leu ku e armonia ku tin entre su diferente partinan, su eksaktitut sientífiko i históriko, su sabiduria práktiko i su profesianan konfiabel. Apòstel kristian Pablo a skirbi: “E palabra di Dios ta bibu i aktivo i mas skèrpi ku kualkier spada di dos filo, i ta penetrá te na e divishon di alma i spiritu, i di skarnir i tuti, i ta kapas pa husga e pensamentunan i intenshonnan di kurason.”—Hebreonan 4:12.

19, 20. (a) Kon Beibel por yuda bo eksaminá bo mes? (b) Kon bo por mustra bo gratitut pa Dios su regalo úniko, esta, Beibel?

19 Lesamentu di e “palabra” òf mensahe di Dios den Beibel por kambia nos bida. E por yuda nos hasi un bon eksaminashon di nos mes. Kisas nos ta bisa ku nos ta stima Dios, pero e manera ku nos ta reakshoná riba loke su Palabra inspirá—Beibel—ta siña, lo revelá nos berdadero pensamentunan, asta e berdadero intenshonnan di nos kurason.

20 Beibel ta realmente un buki for di Dios. E ta un buki ku nos mester lesa, studia i stima. Mustra bo gratitut pa e regalo divino aki dor di sigui analisá su kontenido. Segun ku bo ta hasi esei, lo bo haña un komprondementu profundo di Dios su propósito pa humanidat. Den e siguiente kapítulo nos lo trata kiko presis e propósito ei ta i kon lo e ser realisá.

^ par. 6 Ounke tin hende ta bisa ku sierto partinan di Beibel ta kontradisí otro, e deklarashonnan ei ta infundá. Wak kapítulo 7 di e buki E Bijbel—e Palabra di Dios of e palabra di hende? publiká dor di Testigunan di Yehova.

^ par. 9 Por ehèmpel, tuma nota di e liña di desendensia detayá di Hesus ku tin na Lukas 3:23-38.

^ par. 16 Pa mas informashon riba profesia bíbliko, wak página 27-9 di e foyeto Un Buki pa Tur Hende, publiká dor di Testigunan di Yehova.

^ par. 17 E destrukshon di Babilonia ta djis un ehèmpel di profesia di Beibel ku a kumpli. Otro ehèmpelnan ta, entre otro, e destrukshon di Tiro i di Nínive. (Ezekiel 26:1-5; Sofonias 2:13-15) Ademas, e profesia di Daniel a predisí ku un seri di imperio mundial lo a bin na poder despues di Babilonia. Esakinan a inkluí Medo-Persia i Gresia. (Daniel 8:5-7, 20-22) Wak e artíkulo di Apèndiks “Hesukristu—E Mesias Primintí,” pa un konsiderashon di e tantísimo profesianan Mesiániko ku a kumpli den Hesukristu.