Bai na kontenido

Bai na kontenido

 APÈNDIKS

Kon pa Vense Masturbashon

Kon pa Vense Masturbashon

Masturbashon ta un bisio ku ta perhudiká un hende su spiritualidat, pasobra e ta hasié egoista i ta korumpí su mente. * Ku tempu, esnan ku ta praktik’é ta kuminsá mira otro hende komo puru opheto seksual, djis un medio pa satisfasé nan deseo. Pa nan, sèks no tin nada di haber ku amor, i nan ta redusié na un funshon outomátiko di e kurpa ku ta djis duna plaser momentánio i aliviá tenshon seksual. Pero e alivio ei ta temporal. Bon mirá, en bes di masturbashon mata e inklinashonnan di e kurpa ‘pa loke ta fornikashon, impuresa i apetit seksual’ inapropiá, e ta stimulá nan.—Kolosensenan 3:5.

Apòstel Pablo a skirbi: “Rumannan stimá, laga nos limpia nos mes di tur impuresa di karni i di spiritu i, den temor di Dios, perfekshoná nos santidat mas ainda.” (2 Korintionan 7:1) Si bo tin un lucha pa apliká e palabranan ei, no entregá. Yehova semper ta “kla pa pordoná” i pa yuda bo. (Salmo 86:5; Lukas 11:9-13) E echo ku bo ta sinti remordimentu i ta hasi esfuerso pa superá e bisio akí ta indiká ku bo tin un bon aktitut, apesar ku de bes en kuando bo por sufri un rekaida. Ademas, “kòrda ku Dios ta mas grandi ku nos kurason i sa tur  kos.” (1 Huan 3:20) Ora e ta wak nos, e no ta konsentrá riba nos pikánan, sino riba henter nos personalidat. Komo ku e sa tur kos di nos, e por skucha nos ku kompashon ora nos ta rog’é sinseramente pa tene miserikòrdia di nos. P’esei, sigui akudí na Dios den orashon sinsero i humilde, manera un yu ku ta bai serka su tata ora e ta den problema. Yehova sigur lo bendishoná bo ku un konsenshi limpi. (Salmo 51:1-12, 17; Isaías 1:18) Pero ta klaru ku bo tin ku aktua na armonia ku bo orashon i tuma e medidanan nesesario. Por ehèmpel, lo bo tin ku hasi bo bèst pa evitá tur forma di pornografia i mal kompania. *

Si bo so no por superá bo problema ku masturbashon, papia e ora ei ku un di bo mayornan kristian òf ku un ruman maduro di kongregashon ku ta mustra interes personal den bo. *Proverbionan 1:8, 9; 1 Tesalonisensenan 5:14; Tito 2:3-5.

^ par. 1 Masturbashon ta e práktika di karisiá òf frega e órganonan seksual, loke normalmente ta hiba na kulminashon seksual (orgasmo).

^ par. 2 Un medida práktiko pa kontrolá uso di kòmpiuter ta di pon’é na un lugá den kas kaminda tur hende por mir’é. Algun kristian a instalá programanan di kòmpiuter ku ta filtra material indeseabel. Sinembargo, no tin ningun programa di kòmpiuter kompletamente konfiabel.

^ par. 1 Pa mas sugerensia tokante kon pa vense masturbashon, wak e artíkulo “Loke Hóbennan Sa Puntra . . . Kon Mi Por Superá e Kustumber Akí?” den e ¡Despertad! di novèmber 2006; wak tambe e buki Loke hovenan sa puntra—Contesta práctica, Volúmen 1, página 205-211.