Bou di inspirashon, apòstel Pablo a splika ku tin biaha hende muhé kristian tin ku tapa kabes ora nan ta rindi sirbishi na Yehova. Ta den ki situashon nan tin ku hasié i dikon? Laga nos analisá 1 Korintionan 11:3-16, kaminda e apòstel a duna nos algun instrukshon ku nos tin mester pa por aktua di un forma ku ta onra Dios. Pablo a menshoná tres faktor ku nos tin ku tene kuenta kuné: (1) e aktividatnan ku ta rekerí pa un ruman muhé tapa su kabes, (2) e situashonnan den kua e mester hasi esei i (3) e motibunan ku e tin pa apliká e norma akí.

E aktividatnan. Pablo a menshoná dos: hasi orashon i profetisá. (Versíkulo 4 i 5) Manera nos sa, hasimentu di orashon ta un forma di adorá Yehova. I den nos tempu, profetisamentu ta referí na nos obra di duna siñansa bíbliko. Akaso Pablo ke men ku un muhé mester tapa su kabes ki ora ku e ta hasi orashon òf siña hende e bèrdat di Beibel? Nò. Esei ta dependé di e di dos faktor: e situashonnan den kua e aktividatnan ei ta tuma lugá.

E situashonnan. E palabranan di Pablo ta indiká dos situashon òf área di aktividat: den famia i den kongregashon. El a skirbi: “Kabes di muhé ta hòmber . . . Tur muhé ku ta hasi orashon òf profetisá sin tapa kabes ta brongosá su kabes.” (Versíkulo 35) Den famia, Yehova a nombra e esposo komo kabes di e muhé. Pero kiko si e muhé ta atendé responsabilidat ku Yehova a asigná na su esposo? Si e ta atendé nan  sin duna e debido rekonosementu na e outoridat di su esposo, e ta brongosá su esposo. Konsiderá un par di ehèmpel. Si e tin ku dirigí un estudio di Beibel den presensia di su esposo, e ta tapa su kabes pa mustra rèspèt pa e outoridat di su esposo. Anto lo e hasi esei, sea ku e esposo ta batisá òf nò, pasobra e esposo ta kabes di e famia. * Kiko si e muhé mester hasi orashon òf studia Beibel ku un hende den presensia di su yu menor di edat ku ta batisá? Aunke e yu no ta kabes di e famia, tòg e mama lo tapa su kabes. Dikon? Pa mustra rèspèt pa e outoridat ku Dios ta duna hende hòmber batisá den e kongregashon kristian.

Pablo ta menshoná e di dos situashon, esta, den kongregashon, ora el a skirbi: “Si un hende ke diskutí riba esaki pa e por sigui un otro kustumber, ni nos ni e kongregashonnan di Dios no tin otro kustumber.” (Versíkulo 16) Den e kongregashon kristian, Yehova a duna hende hòmber batisá outoridat komo kabes. (1 Timoteo 2:11-14; Hebreonan 13:17) P’esei ta hòmber so ta ser nombrá komo ansiano i sirbidó ministerial pa karga e responsabilidat di kuida Su tou. (Echonan 20:28) Pero, de bes en kuando, sirkunstansianan ta pone ku un muhé kristian tin ku atendé un tarea ku normalmente ta un ruman hòmber batisá i kapas tin ku hasi. Por ehèmpel, kisas e tin ku dirigí un reunion pa sirbishi di vèlt pasobra no tin un ruman hòmber batisá i kapas. Òf e tin ku dirigí den presensia di un ruman hòmber batisá un estudio bíbliko establesí. Komo ku den e kasonan ei e aktividatnan ta en realidat un ekstenshon di e programa di siñansa di e kongregashon kristian, e ruman muhé lo tapa su kabes pa mustra ku e ta rekonosé ku e ta hasiendo un tarea ku normalmente ta un ruman hòmber lo mester hasi.

Di otro banda, tin hopi faseta di nos adorashon den kua un ruman muhé no tin ku tapa kabes. Por ehèmpel, e no tin nodi di hasié ora e ta komentá na reunion, ta prediká di kas pa  kas ku su kasá òf ku un otro ruman hòmber batisá, òf ora e ta hasi orashon òf studia ku su yunan ku no ta batisá. Klaru ku por lanta mas pregunta den un sierto kaso. Si e ruman muhé no sa sigur kiko pa hasi, e por investigá e asuntu mas aleu. * Pero si e keda ku duda i si su konsenshi ta motiv’é pa tapa su kabes, no tin nada malu den esei, manera e plachi ta mustra.

E motibunan. Den versíkulo 10, nos ta haña dos motibu pakiko un muhé kristian lo ke kumpli ku e rekisito akí: “Muhé mester tin un señal di sumishon riba su kabes, pa motibu di e angelnan.” Nos ta dedusí e promé motibu for di e ekspreshon “un señal di sumishon.” Kon nos mester komprondé e ekspreshon akí? Wèl, ora un ruman muhé tapa su kabes, esei ta un señal ku e ta rekonosé e outoridat ku Yehova a duna hende hòmber batisá den kongregashon. Esei pues ta un manera ku e ruman muhé ta ekspresá su amor pa Yehova Dios i su lealtat na dje. E di dos motibu nos ta haña den e palabranan “pa motibu di e angelnan.” Ki efekto un muhé ku tapa su kabes por tin riba e spiritunan poderoso ei?

E angelnan ta interesá pa wak si tur miembro di e organisashon di Yehova, tantu den shelu komo riba tera, ta mustra rèspèt pa Su outoridat. Bon mirá, nan ta benefisiá di e ehèmpel di obedensia di hende imperfekto. Kon ku bai bin, e angelnan tambe mester ta sumiso na Yehova su areglo, algu ku basta angel a faya kuné den pasado. (Hudas 6) Awe, e angelnan ta haña un magnífiko ehèmpel di sumishon kada biaha ku un ruman muhé someté su mes boluntariamente na e outoridat di un ruman hòmber batisá den kongregashon, asta  si e ruman muhé tin mas eksperensia, konosementu òf inteligensia ku e ruman hòmber. Den algun kaso e ruman muhé ta un kristian ungí ku despues lo bira parti di e grupo di heredero ku lo reina huntu ku Kristu den shelu, den un posishon mas haltu ku e angelnan. Pues, ruman muhénan tin un privilegio úniko! Nan komportashon leal i sumiso ta duna miónes di angel un berdadero ehèmpel di humildat i obedensia.

^ par. 3 Un esposa kristian normalmente no ta hasi orashon na bos haltu den presensia di su kasá kreyente, a ménos ku tin sirkunstansianan eksepshonal, por ehèmpel, si e esposo a pèrdè su abla pa motibu di enfermedat.

^ par. 2 Pa mas informashon, wak E Toren di Vigilansia di 15 di yüli 2002, página 26-27, i La Atalaya di 15 di yüli 1977, página 445-448.