“No tin nada mihó pa hende, ku . . . mira e bon ku tin den tur su trabou.”—EKLESIÁSTES 3:12, 13.

1-3. (a) Kiko hopi hende ta pensa di nan trabou? (b) Beibel ta animá nos pa nos tin ki punto di bista di trabou, i kua preguntanan nos lo analisá den e kapítulo akí?

PA HOPI hende awe, trabou ta un kastigu. Nan no tin niun tiki plaser den dje. Dia aden dia afó, nan tin ku traha oranan largu, hasiendo algu ku nan no ta ni gusta. Ku un aktitut asina, no ta fásil pa nan mustra interes den nan trabou, te pa nan haña satisfakshon den dje. Kiko por motivá hende asina pa kambia nan aktitut?

2 Beibel ta animá nos pa nos tin un punto di bista positivo di trabou duru. E ta bisa ku trabou i e fruta ku esei ta produsí ta un bendishon. Sálomon a skirbi: “No tin nada mihó pa hende, ku . . . kome i bebe i mira e bon ku tin den tur su trabou—esaki ta e regalo di Dios.” (Eklesiástes 3:12, 13) Yehova stima nos i semper ta deseá lo mihó pa nos. P’esei tambe e ke pa nos haña satisfakshon den nos trabou i disfrutá di e fruta di nos labor. Nos lo keda den su amor si nos siña mira trabou manera e ta mir’é i laga su prinsipionan guia nos.—Eklesiástes 2:24; 5:18.

3 Den e kapítulo akí nos lo analisá kuater pregunta: Kon nos por mira e benefisionan di nos trabou? Ki tipo di trabou no ta pa kristiannan berdadero? Kon nos por balansá nos trabou ku aktividatnan relashoná ku nos adorashon? I kua ta e trabou di mas importante ku nos  mester hasi? Pero promé, laga nos konsiderá e ehèmpel di e dos mihó trahadornan den universo: Yehova Dios i Hesukristu.

E TRAHADOR SUPREMO I E TRAHADOR EKSPERTO

4, 5. Kon Beibel ta indiká ku Yehova ta un trahador masha diligente?

4 Yehova ta e Trahador Supremo. Génesis 1:1 ta bisa: “Na prinsipio Dios a krea e shelunan i tera.” Ora Dios a terminá su trabou di kreashon relashoná ku nos planeta Tera, el a deklará ku “tur kos tabata masha bon.” (Génesis 1:31) Ku otro palabra, e tabata plenamente satisfecho ku tur su trabou. No tin duda ku Yehova, “e Dios felis,” a sinti un gran goso di por ta un trahador asina produktivo.—1 Timoteo 1:11.

5 Yehova ta masha diligente i nunka e no a stòp di traha. Hopi tempu despues ku su trabou di kreashon relashoná ku nos tera a terminá, Hesus a bisa: “Mi Tata ta traha te ainda, i ami tambe ta sigui traha.” (Huan 5:17) Kiko e Tata tabata hasi? El a keda masha aktivo kuidando i guiando humanidat for di shelu. Tambe el a produsí “un kreashon nobo,” esta, kristiannan ungí pa spiritu santu, kendenan lo bai reina huntu ku Hesus den shelu. (2 Korintionan 5:17) Ademas, el a sigui traha pa kumpli ku su propósito pa humanidat, esta, pa esnan ku stim’é por haña bida eterno den un mundu nobo. (Romanonan 6:23) Yehova lo mester ta masha kontentu ku e resultado di su trabou: Miónes di hende a reakshoná na un manera positivo riba e mensahe di Reino, el a hala nan serka dje i nan a hasi kambio den nan bida pa keda den su amor.—Huan 6:44.

6, 7. Dikon nos por bisa ku Hesus tin hopi tempu ta traha diligentemente?

6 Hesus ta un trahador diligente pa hopi tempu kaba.  Promé ku el a bini na tera komo hende, e tabata e “trahador eksperto” pa medio di ken Yehova a krea tur kos, “tantu den shelu komo riba tera.” (Proverbionan 8:22-31; Kolosensenan 1:15-17) I ora e tabata riba tera, el a sigui traha duru. For di mucha el a siña un fishi den ramo di konstrukshon i a bira konosí komo “e karpinté.” * (Marko 6:3) E fishi ei a enserá trabou pisá i a rekerí bon abilidat. Kòrda ku den e tempu ei no tabatin fábrika ni depósito di palu ni hèrmèntnan eléktriko. Bo por imaginá bo kon Hesus tabata sali bai buska palu? Kisas e mes mester a kap e palu promé i despues lastr’é hiba kaminda e tabata traha. Bo por mir’é ta traha un kas, ta prepará i pega e biganan di e dak, ta traha porta i asta algun muebel? Sin duda, Hesus tabata sa di eksperensia ki satisfakshon bo ta sinti ora bo traha duru i hasi un bon trabou.

7 Hesus tabata masha diligente tambe den su sirbishi. Durante tres aña i mei, el a okupá su mes intensamente ku e trabou masha importante akí. E kier a alkansá mas tantu hende posibel. Pues, el a probechá bon di su dianan: e tabata lanta mainta trempan i keda traha te anochi lat. (Lukas 21:37, 38; Huan 3:2) El a “biaha di stat pa stat i di pueblito pa pueblito, predikando i anunsiando e bon notisia di e Reino di Dios.” (Lukas 8:1) Hesus a kana literalmente sientos di kilometer den kaminda di tera pa hiba e mensahe di e bon notisia na e hendenan.

8, 9. Kon Hesus a mira e benefisionan di su trabou?

8 Hesus a mira e fruta di su trabou duru? Klaru ku sí! El a sembra asina tantu simia di e bèrdat di Reino ku el a bai laga kunukunan kla pa kosechá atras. E trabou di Dios a duna Hesus asina tantu forsa i energia ku e tabata  dispuesto pa keda sin kome pa e por a kaba e trabou ei. (Huan 4:31-38) Ki un gran satisfakshon lo e mester a sinti ora ku na final di su sirbishi riba tera e por a bisa su Tata: “Mi a glorifiká bo riba tera i a kaba ku e trabou ku bo a duna mi pa hasi.”—Huan 17:4.

9 Un kos ta sigur, Yehova i Hesus ta e mihó ehèmpel di personanan ku a mira e benefisionan di nan trabou duru. Nos amor pa nan ta motivá nos pa “imitá Dios” i pa “sigui [Hesus] su pasonan fielmente.” (Efesionan 5:1; 1 Pedro 2:21) Pues, ban analisá kon nos por mira e benefisionan di nos trabou duru.

KON NOS POR MIRA E BENEFISIONAN DI NOS TRABOU?

Si bo apliká prinsipio di Beibel, lo bo por mira e benefisionan di bo trabou duru

10, 11. Kiko por yuda nos kultivá un aktitut positivo pa ku nos trabou?

10 Aktividatnan laboral tin nan debido lugá den bida di tur kristian berdadero. Nos ke sinti nos satisfecho i, te na sierto grado, kontentu ku nos trabou. Pero esaki por ta masha difísil si nos tin un trabou ku nos no ta gusta. Den un situashon asina, kon tòg nos por mira e benefisionan di nos trabou?

11 Kultivá un aktitut positivo. Kisas nos no por kambia nos sirkunstansianan, pero semper nos por kambia nos aktitut. Un kos ku por yuda nos kultivá un aktitut positivo ta di meditá riba e punto di bista di Dios. Por ehèmpel, si bo ta un kabes di kas, pensa riba esaki: Maske kon laf òf insignifikante bo trabou por parse, e ta permití bo kubri e nesesidatnan di bo famia, i esei no ta un ko’i kèns den bista di Dios. Su Palabra ta bisa ku esun ku no ta perkurá pa su famia “ta pió ku un persona sin fe.” (1 Timoteo 5:8) Pues, bo trabou ta un medio pa logra un meta, ya ku e ta permití bo kumpli ku un responsabilidat ku  Dios a duna bo. Ora bo ta komprondé esei, bo por haña un grado di satisfakshon i motivashon ku kisas bo koleganan no tin.

12. Dikon ta bale la pena pa nos ta diligente i onesto na trabou?

12 Ser diligente i onesto. Nos por haña hopi benefisio si nos ta diligente i ta siña hasi nos trabou bon. Doñonan di trabou hopi biaha ta apresiá trahadó ku ta diligente i ábil. (Proverbionan 12:24; 22:29) Ademas, nos mester ta onesto na trabou, i esei ta enserá no hòrta plaka, material ni tempu di nos doño di trabou. (Efesionan 4:28) Manera  nos a mira den e kapítulo anterior, ta bale la pena ora nos ta onrado. Nos por gana e konfiansa di nos hefenan. I asta si nan no ripará ku nos ta un bon trahadó, nos por tin e satisfakshon di “tin un konsenshi limpi” i di sa ku nos ta agradá nos Dios stimá.—Hebreonan 13:18; Kolosensenan 3:22-24.

13. Ki resultado nos bon ehèmpel na trabou por tin?

13 Rekonosé ku nos komportashon por duna gloria na Dios. Ora nos tin un komportashon ehemplar na trabou, un komportashon ku ta pega na e normanan kristian haltu, otro hende lo nota esaki sigur. Di e manera ei nos “por dòrna e siñansa di nos Salbador, Dios.” (Tito 2:9, 10) Pues, nos bon komportashon por duna realse na nos forma di adorashon i hasié mas atraktivo pa otro hende. Djis imaginá kon lo bo sinti bo si un kolega reakshoná na un manera positivo riba e bèrdat pa motibu di bo bon ehèmpel na trabou! I mas importante ainda: no tin nada mas dushi ku sa ku bo bon komportashon ta hasi Yehova su kurason kontentu i ta dun’é gloria.—Proverbionan 27:11; 1 Pedro 2:12.

USA NOS KAPASIDAT DI KOMPRONDÉ ORA DI SKOHE TRABOU

14-16. Kua ta e dos preguntanan klave ku nos tin ku hasi nos mes ora di tuma un desishon tokante trabou?

14 Beibel no ta duna instrukshon detayá pa loke ta trata kua trabou ta aseptabel òf kua nò. Pero esei no ke men ku nos por aseptá kualke trabou, sin importá kiko e ta. E Skritura por yuda nos skohe trabou onrado i produktivo ku ta agradá Dios i evitá trabou ku ta desagrad’é. (Proverbionan 2:6) Tin dos pregunta klave ku nos tin ku hasi nos mes ora di tuma un desishon tokante trabou.

15 E trabou akí ta konsistí di un aktividat ku Beibel ta kondená? E Palabra di Dios klaramente ta kondená hòrtamentu,  gañamentu i trahamentu di imágen di dios falsu. (Éksodo 20:4; Echonan 15:29; Efesionan 4:28; Revelashon 21:8) Pues, nos lo rechasá kualke trabou ku ta pidi nos hasi e tipo di kosnan ei. Nos amor pa Yehova no ta permití nos aseptá un trabou ku ta pone nos bai kontra e mandamentunan di Dios.—1 Huan 5:3.

16 E trabou akí lo pone mi apoyá òf bira kómplise di un práktika ku ta malu? Laga nos wak un ehèmpel. E trabou  di resepshonista, riba su mes, no tin nada malu kuné. Pero kiko si un kristian haña e oferta pa traha resepshonista na un banko di sanger? Ta bèrdat ku lo e no partisipá direktamente den saka sanger for di hende pa hasi transfushon. Ma e trabou ku e ta hasi tur dia einan ta kontribuí sí na e proseso di tuma i duna sanger pa transfushon, un práktika ku ta bai kontra e Palabra di Dios. (Echonan 15:29) Amor pa Yehova ta pone ku nos no ke tin nada di haber ku loke e Skritura ta kondená.

17. (a) Menshoná algun faktor ku ta bon pa nos evaluá relashoná ku trabou? (Wak e  kuadro na página 177.) (b) Kon nos konsenshi por yuda nos tuma un desishon ku ta agradá Dios?

17 Nos lo por tuma bon desishon den asuntu di trabou si nos analisá kuidadosamente e kontesta riba e dos preguntanan klave di paragraf 15 i 16. Pero tin algun faktor mas ku ta bon pa nos evaluá relashoná ku trabou. *  Nos no por ferwagt ku e esklabo fiel ta establesé regla pa delaster un situashon ku lo por surgi. Aki ta kaminda nos mes mester usa nos kapasidat di komprondé. Manera nos a siña den Kapítulo 2, nos mester eduká i entrená nos konsenshi. Nos ta hasi esei ora nos ta studia e Palabra di Dios i analisá kon pa aplik’é den nos bida diario. Asina nos ta entrená nos “kapasidat di komprondé,” i nos konsenshi lo por yuda nos tuma un desishon ku ta agradá Dios i ku ta laga nos keda den su amor.—Hebreonan 5:14.

MANTENÉ UN PUNTO DI BISTA BALANSÁ DI TRABOU

18. Dikon no ta fásil pa mantené nos balansa spiritual?

18 Nos ta bibando den e “último dianan” ku su “tempunan krítiko, difísil pa trata kuné.” No ta fásil pa nos mantené un balansa spiritual, esta, pa tuma desishonnan ku semper lo yuda nos keda ku e aprobashon di Yehova. (2 Timoteo 3:1) Ta un reto pa haña trabou i keda kuné. Komo kristian berdadero, nos sa e importansia di traha duru pa perkurá pa nos famia. Pero si nos no tene kuidou, nos por laga e preshon di trabou òf e manera di pensa materialista di mundu stroba nos aktividatnan spiritual. (1 Timoteo 6:9, 10) Laga nos wak kon nos por mantené nos balansa i “hasi sigur kiko ta e kosnan mas importante.”—Filipensenan 1:10.

19. Dikon Yehova meresé nos pleno konfiansa, i kiko e konfiansa ei ta yuda nos evitá?

19 Pone bo pleno konfiansa den Yehova. (Proverbionan 3:5, 6) E meresé tal konfiansa? Mas ku klaru, ya ku e ta interesá den nos. (1 Pedro 5:7) E konosé nos nesesidatnan  mihó ku nos mes, i su man no ta muchu kòrtiku. (Salmo 37:25) P’esei ta bon pa nos hasi kaso di e rekordatorio akí ku su Palabra ta duna nos: “Laga boso manera di biba ta liber di amor pa plaka, i keda kontentu ku loke boso tin. Pasobra Dios a bisa: ‘Hamas lo mi bandoná bo, i hamas lo mi laga bo desampará.’” (Hebreonan 13:5) Hopi ruman ku ta den sirbishi di tempu kompleto por konfirmá ku  Dios semper ta perkurá pa e nesesidatnan di bida. Si nos ta konfia plenamente den Yehova, nos lo no ta demasiado preokupá tokante kon pa perkurá pa nos famia. (Mateo 6:25-32) Nos lo no permití nos trabou pone nos neglishá e predikashon di e bon notisia, nos baimentu di reunion i otro aktividatnan spiritual.—Mateo 24:14; Hebreonan 10:24, 25.

20. Kiko ke men tene un wowo simpel, i kon nos por hasi esei?

20 Tene bo wowo simpel. (Mateo 6:22, 23) Un wowo simpel ta nifiká ku nos no ta hasi nos bida kompliká. E wowo simpel di un kristian ta enfoká riba un solo meta: hasi e boluntat di Dios. Si nos bista spiritual ta bon enfoká, nos lo no ta opseshoná pa haña un trabou ku ta paga hopi plaka òf pa haña un bida di luho. Tampoko nos lo ta koriendo tur ora bai tras di e último nobedatnan ku medionan di publisidat ke laga nos kere ta indispensabel pa nos ta felis. Kon bo por tene bo wowo simpel? No hinka bo kurpa den debe innesesario. No pròp bo bida ku yen di kos material ku ta eksigí demasiado tempu i atenshon. I manera Beibel ta bisa, keda kontentu ku ‘kuminda, paña i un dak riba bo kabes.’ (1 Timoteo 6:8) Pues, purba simplifiká bo bida mas tantu posibel.

21. Dikon nos mester fiha prioridat, i kiko mester ta na promé lugá den nos bida?

21 Pone kosnan spiritual semper na promé lugá. Komo ku nos tin un kantidat limitá di tempu pa dia, nos tin ku fiha prioridat. Si no, kosnan ménos importante lo kita tur nos tempu balioso i nos lo neglishá e kosnan mas importante. Kiko mester ta na promé lugá den nos bida? Hopi hende ta pone énfasis riba sigui un estudio avansá pa nan por traha un bon karera den e mundu akí. Ma Hesus a urgi su siguidónan pa “sigui buska . . . promé e Reino.” (Mateo 6:33) Pues, komo kristian berdadero, nos ta pone e Reino di Dios na promé lugá den nos bida. Nos manera di biba,  esta, nos desishonnan, metanan i aktividatnan mester demostrá ku e Reino i e boluntat di Dios ta mas importante pa nos ku kos material i aktividatnan di mundu.

TRAHA DURU DEN SIRBISHI DI VÈLT

Nos ta demostrá nos amor pa Yehova ora nos ta pone e predikashon na promé lugá den nos bida

22, 23. (a) Kiko ta e trabou prinsipal di kristiannan berdadero, i kon nos por demostrá ku e ta importante pa nos? (Wak e  kuadro na página 180.) (b) Kiko ta bo determinashon relashoná ku trabou?

22 Komo sirbidó di Dios, nos sa ku e fin ta hopi serka i p’esei nos ta sigui konsentrá riba e trabou prinsipal di kristiannan berdadero: e trabou di prediká i hasi disipel. (Mateo 24:14; 28:19, 20) Meskos ku nos Gran Ehèmpel, Hesus, nos ke ta intensamente okupá ku e trabou akí ku por salba bida. Kon nos por demostrá ku e trabou akí ta importante pa nos? Mayor parti di e pueblo di Dios ta partisipá di henter nan alma den e predikashon komo publikadó di kongregashon. Algun ruman a organisá nan bida di tal manera ku nan por sirbi komo pionero òf misionero. I hopi mayor ta animá nan yunan pa drenta den e sirbishi di tempu kompleto, ya ku nan ta mira e importansia di pone meta spiritual. E rumannan akí ku ta proklamá e Reino yen di entusiasmo ta mira e benefisionan di nan trabou duru den sirbishi? Klaru ku sí! Ora nos ta sirbi Yehova di henter nos alma, nos por ta sigur ku nos lo disfrutá di un bida yen di goso, satisfakshon i bendishon.—Proverbionan 10:22.

23 Hopi di nos ta pasa oranan largu na trabou pa nos por perkurá materialmente pa nos famia. Kòrda ku Yehova ke pa nos mira e benefisionan di nos trabou duru. Nos por haña satisfakshon den nos trabou si nos sòru pa nos aktitut i komportashon ta na armonia ku su punto di bista i prinsipionan. Pero sea determiná pa no laga e trabou pa gana nos pan di kada dia kita nos atenshon for di nos aktividat prinsipal: proklamashon di e bon notisia di e Reino di Dios. Di e manera ei nos ta duna prueba ku nos ta stima Yehova i nos lo keda den su amor.

^ par. 6 Ekspertonan ta bisa ku e palabra griego tradusí “karpinté” tabata “un ekspreshon general ku a referí na un hende ku tabata traha ku palu, sea ku el a traha kas, muebel òf kualke otro tipo di opheto.”

^ par. 17 Pa un análisis mas detayá di e faktornan ku nos mester tene kuenta kuné, wak E Toren di Vigilansia di 15 di aprel 1999, página 28-30, i La Atalaya di 15 di novèmber 1982, página 26.