Bai na kontenido

Bai na kontenido

 KAPÍTULO 8

Dios Ta Stima Hende Limpi

Dios Ta Stima Hende Limpi

“Na e hende puru [òf limpi] bo ta mustra bo mes puru [òf limpi].”—SALMO 18:26.

1-3. (a) Dikon un mama ta sòru pa su yu ta limpi i na òrdu? (b) Dikon Yehova ke pa su sirbidónan ta limpi, i kiko ta motivá nos pa keda limpi?

UN MAMA ta preparando su yu pa sali. E ta hasi sigur ku e yu a baña i ku su pañanan ta limpi i na òrdu. E sa ku un bon higiena ta masha importante pa salú di su yu. Ademas, e sa ku e aparensia di su yu ta determiná kiko hende lo pensa di nan komo mayor.

2 Yehova, nos Tata selestial, ke pa su sirbidónan ta limpi. Su Palabra ta bisa: “Na e hende puru [òf limpi] bo ta mustra bo mes puru [òf limpi].” * (Salmo 18:26) Dikon Yehova ta insistí riba esaki? Di promé, pasobra e ta stima nos i  e sa ku limpiesa ta bon pa nos mes. Di dos, pasobra e impreshon ku nos komo su Testigunan ta duna otro hende ta determiná si hende lo pensa bon di dje. Sí, nos aparensia limpi i nos bon kondukta lo trese gloria, no reproche, pa Yehova i su nòmber santu.—Ezekiel 36:22; 1 Pedro 2:12.

3 Kiko ta motivá nos pa keda limpi? Pa kuminsá, nos sa ku Dios ta stima hende limpi. Ademas, nos ta stim’é i p’esei nos ke onr’é ku e manera ku nos ta biba. Tambe nos ke keda den su amor. Pues, laga nos analisá algun aspekto di limpiesa òf puresa: dikon e ta nesesario, kiko e ta enserá i kon nos por keda limpi. Esaki por yuda nos mira den ki áreanan kisas nos tin ku mehorá.

DIKON NOS MESTER KEDA LIMPI?

4, 5. (a) Kiko ta e motibu prinsipal dikon nos mester keda limpi? (b) Kon kreashon ta demostrá ku limpiesa ta importante pa Yehova?

4 E motibu prinsipal dikon nos mester keda limpi ta pasobra nos ta adorá un Dios ku ta puru, limpi i santu den tur sentido. (Levítiko 11:44, 45) Yehova ta siña nos pa medio di su ehèmpel. P’esei, su Palabra ta animá nos pa “imitá Dios.”—Efesionan 5:1.

5 Yehova su puresa, meskos ku hopi di su kualidatnan i su manera di aktua, ta bisto den kreashon. (Romanonan 1:20) Por ehèmpel, el a traha planeta Tera komo hende su hogar i a diseñá medionan pa tene e kas ei limpi. El a establesé sierto siklo ekológiko ku ta purifiká nos airu i nos awa. Ademas, el a krea sierto mikrobio ku ta fungi manera un departamento di limpiesa; nan ta transformá desperdisio den supstansia inofensivo. Nan ta hasi nan trabou asina efikas ku sientífikonan ta usa algun di e mikrobionan hambrá ei pa limpia derame di petroli i otro polushon kousá pa golosidat i egoismo humano. Pues, ta bisto ku pa Yehova, Esun ku “a traha tera,” limpiesa ta di sumo importansia. (Yeremías 10:12) Asina mester ta pa nos tambe.

6, 7. Kon e Lei di Moises a mustra bon kla ku tur sirbidó di Yehova mester keda limpi?

 6 Un otro motibu pakiko nos mester keda limpi ta pasobra Yehova, nos Señor Soberano, ta eksigí limpiesa di su sirbidónan. Bou di e Lei ku Yehova a duna Israel, limpiesa i adorashon tabata inseparabel. E Lei a bisa spesífikamente ku riba Dia di Ekspiashon e sumo saserdote mester a baña, no ún, sino dos biaha! (Levítiko 16:4, 23, 24) Saserdotenan mester a laba nan man ku pia promé ku nan ofresé sakrifisio na Yehova. (Éksodo 30:17-21; 2 Krónikanan 4:6) E Lei a menshoná tambe rònt di 70 situashon ku a hasi un israelita físikamente impuru òf impuru pa seremonia religioso. Un israelita den tal kondishon no tabatin mag di partisipá den ningun aspekto di adorashon; si el a hasié tòg, den algun kaso e por a haña kastigu di morto. (Levítiko 15:31) Pero e Lei a establesé un prosedura di purifikashon ku a inkluí ku e persona mester a baña su kurpa i laba su paña. Ken ku a nenga di hasi esei mester a “wòrdu kòrtá kitá for di meimei di e asamblea.”—Numbernan 19:17-20.

7 Aunke nos no ta bou di e Lei di Moises, e ta duna nos un idea di kiko Dios ta pensa di sierto asuntu. Ta bisto ku e Lei a enfatisá ku limpiesa tabata un kondishon indispensabel pa hende ku ta adorá Dios. Yehova no a kambia. (Malakías 3:6) Nos adorashon ta aseptabel p’e solamente si e ta “limpi i sin mancha.” (Santiago 1:27) Pues, ta bon pa nos analisá kiko presis esaki ta enserá.

KIKO KEDA LIMPI DEN BISTA DI DIOS TA ENSERÁ?

8. Den ki área Yehova ta ferwagt pa nos keda puru?

8 Den Beibel, limpiesa no ta limitá na kosnan físiko. Mas bien, Beibel ta indiká ku pa nos ta limpi den bista di Dios, nos mester ta puru den tur aspekto di nos bida. Bon mirá, Yehova ta ferwagt pa nos demostrá kuater tipo di puresa: spiritual (òf, den adorashon), moral, mental i físiko. Laga nos konsiderá kiko kada un ta enserá.

9, 10. Kiko adorashon limpi ta enserá, i kiko kristian berdadero ta evitá?

 9 Adorashon limpi. Esaki ta nifiká ku nos no ta meskla religion berdadero ku religion falsu. Ora e israelitanan a sali for di Babilonia pa regresá Herúsalèm, nan tabatin ku obedesé e siguiente mandato di Dios: “Bai for di einan, no mishi ku nada impuru . . . purifiká boso mes.” (Isaías 52:11) E israelitanan a bai bèk prinsipalmente pa restorá e adorashon di Yehova. Pues, e adorashon ei mester tabata limpi, sin nada ku a desonrá Dios, manera e siñansa-, práktika- i kustumbernan di religion babilóniko.

10 Awe, nos komo kristian berdadero mester tene kuidou pa nos no kontaminá nos mes ku adorashon falsu. (1 Korintionan 10:21) E influensia di religion falsu a plama asina tantu ku nos tin ku paga masha tinu pa e no afektá nos. Den hopi pais, vários tradishon, rito i aktividat di tur dia ta konektá ku doktrina pagano, por ehèmpel, ku e idea ku nos alma ta keda na bida despues ku nos muri. (Eklesiástes 9:5, 6, 10) Sinembargo, kristiannan berdadero no ke partisipá den ningun kustumber ligá ku kreensia religioso falsu. * P’esei, nos lo no laga hende preshoná nos pa bai kontra e normanan di Beibel pa adorashon limpi.—Echonan 5:29.

11. Kiko puresa moral ta enserá, i dikon ta masha importante pa nos keda limpi den e aspekto akí?

11 Puresa moral. Pa nos keda limpi den sentido moral, nos mester evitá, entre otro, tur tipo di inmoralidat seksual. (Efesionan 5:5) Esaki ta masha importante. Manera nos lo mira den e siguiente kapítulo di e buki akí, nos mester “hui di fornikashon” pa nos por keda den e amor di Dios. Hende ku ta kometé fornikashon i no ta arepentí “lo no risibí e Reino di Dios.” (1 Korintionan 6:9, 10, 18) Den bista di Dios, hende asina ta “impuru i repugnante.” Si nan  no purifiká nan mes den sentido moral, “nan pago lo ta . . . e di dos morto.”—Revelashon 21:8.

12, 13. Ki efekto loke un hende ta pensa tin riba loke e ta hasi, i kon nos por keda mentalmente limpi?

12 Puresa mental. Loke un hende ta pensa ta pon’é aktua. Si nos permití mal pensamentu saka rais den nos mente i kurason, tardi òf trempan nos lo kometé un akto impuru. (Mateo 5:28; 15:18-20) Pero si nos yena nos mente ku pensamentu limpi i positivo, esei lo motivá nos pa keda komportá nos mes na un manera limpi. (Filipensenan 4:8) Kon nos por keda mentalmente limpi? Pa kuminsá, nos tin ku rechasá tur forma di dibertishon ku por susha nos mente. * Ademas, nos por yena nos mente ku pensamentu limpi si nos ta studia e Palabra di Dios tur dia.—Salmo 19:8, 9.

13 Pues, pa nos keda den e amor di Dios, ta masha importante pa nos mantené puresa spiritual (òf, den adorashon), moral i mental. Otro kapítulo di e buki akí lo analisá e tres tiponan di puresa akí mas aleu. Pero, laga nos ban analisá awor e di kuater tipo: puresa físiko.

KON NOS POR KEDA FÍSIKAMENTE PURU?

14. Dikon puresa físiko no ta djis un asuntu personal?

14 Ta masha importante pa nos tene nos kurpa i e ambiente rònt di nos limpi. Pero tin hende ta pensa ku esei ta un asuntu personal i ku ningun hende no tin derecho di mete den esei. Pero un sirbidó di Yehova no mag di pensa asina nunka. Manera nos a menshoná kaba, puresa físiko ta importante pa Yehova, no solamente pasobra esei ta bon pa nos mes, sino tambe pasobra nos limpiesa ta determiná kiko hende ta pensa di dje. Kòrda riba e ilustrashon di e mucha den e promé paragraf. Si tur ora bai bo ta mira e mucha ei tur sushi òf kon ku ta bistí, lo bo no kuminsá puntra bo mes ta ki sorto di hende su mayornan ta? Asina  tambe, nos lo no ke pa nada di nos aparensia òf di nos manera di biba trese reproche riba nos Tata selestial òf rebahá e mensahe ku nos ta prediká. E Palabra di Dios ta animá nos pa nos tin e mesun aktitut ku Pablo. El a skirbi: “Nos no ke hasi nada ku ta duna otro hende motibu pa trompeká, pa hende no kritiká nos sirbishi; ma den tur sentido nos ta rekomendá nos mes komo sirbidó di Dios.” (2 Korintionan 6:3, 4) Pues, kon nos por keda puru òf limpi den sentido físiko?

15, 16. Kiko ta algun bon kustumber di higiena, i den ki kondishon nos pañanan mester ta?

15 Nos higiena personal i aparensia. Aunke kultura i kondishon di bida di kada pais ta diferente, nos tur, por lo general, tin sufisiente awa i habon pa baña regularmente i pa sòru ku nos i nos yunan ta limpi. Un bon kustumber di higiena ta pa laba man ku awa ku habon, sea promé ku kome  òf atendé ku kuminda, òf despues di bai tualèt òf despues di limpia kurpa di un bebi òf kambia su bruki. Labamentu di man ku awa ku habon por prevení malesa i asta salba bida. E por stroba vírùs i bakteria di plama, i asina ta prevení ku hende ta haña malesa ku ta kousa diarea. Den paisnan kaminda kasnan no tin berpùt ni sistema di riolering, kisas nos por dera nos sushi, manera nan tabata hasi den Israel di antigwedat.—Deuteronomio 23:12, 13.

16 Tambe nos tin ku laba nos pañanan ku regularidat pa nan ta limpi i presentabel. Pa un kristian, e kos mas importante no ta ku nan mester ta paña karu òf di último moda, sino limpi, na òrdu i modesto. (1 Timoteo 2:9, 10) Na unda ku nos ta, nos ke pa nos aparensia “dòrna e siñansa di nos Salbador, Dios.”—Tito 2:10.

17. Dikon nos kas i nos pertenensianan mester ta limpi i presentabel?

17 Nos kas i pertenensianan. Podisé nos kas no ta grandi ni luhoso, pero sí e mester ta mas limpi i presentabel posibel. Meskos mester ta e kaso ku nos outo, foral si nos ta us’é pa bai reunion i sirbishi di vèlt. Nos mester hasi nos bèst pa e ta limpi, paden i pafó. No lubidá ku ora nos kas i nos pertenensianan ta limpi, esei riba su mes kaba ta duna un bon testimonio. Al fin i al kabo, nos ta siña hende ku Yehova ta un Dios limpi, ku pronto lo e “kaba ku esnan ku ta kaba ku e tera” i ku su Reino lo transformá nos kas terenal den un paradeis. (Revelashon 11:18; Lukas 23:43) Pues, nos lo ke pa hende mira na e aparensia di nos kas i di nos pertenensianan ku for di awor nos ta desaroyando bon kustumber di limpiesa ku lo pas den e mundu nobo benidero.

Limpiesa físiko ta enserá tene nos kurpa i nos pertenensianan limpi

18. Kon nos por mustra rèspèt pa nos Salòn di Reino?

18 Nos lugá di adorashon. Nos amor pa Yehova ta motivá nos pa mustra rèspèt pa nos Salòn di Reino, e lugá sentral pa adorá e Dios berdadero den nos área. Ora hende nobo bishitá nos salòn, nos ke pa nan haña un bon impreshon di nos lugá di reuní. Pues, pa e salòn por keda den  bon estado ta nesesario pa nos tin un programa di limpiesa i di mantenshon regular. Nos ta mustra rèspèt pa nos Salòn di Reino ora nos ta hasi loke nos por pa manten’é. Ta un privilegio ku nos por ofresé nos tempu pa yuda limpia, “restorá i drecha” nos lugá di adorashon. (2 Krónikanan 34:10) E mesun prinsipionan ta apliká ora nos ta reuní na un Salòn di Asamblea òf kualke otro lugá pa asamblea òf kongreso.

EVITÁ TUR KOS KU POR HASI NOS IMPURU

19. Pa mantené puresa físiko, kiko mas nos tin ku evitá, i kon Beibel ta yuda nos den esaki?

19 Kiko mas puresa físiko ta enserá? Nos tin ku evitá tur práktika ku ta kontaminá nos kurpa, manera humamentu, bebementu di mas i uso no-médiko di supstansianan ku ta kousa adikshon òf ku ta kambia bo estado di ánimo òf bo kapasidat di pensa. Beibel no ta menshoná spesífikamente tur bisio i práktika impuru i repugnante ku ta komun den e mundu awe, pero e ta kontené sí algun prinsipio ku por yuda nos komprondé kiko Yehova ta pensa di e kosnan ei. Unabes nos sa kiko ta Yehova su punto di bista, nos amor p’e ta motivá nos pa sigui e kaminda ku tin su aprobashon. Laga nos konsiderá sinku prinsipio bíbliko.

20, 21. Yehova ke pa nos ta liber di ki tipo di práktika, i ki bon motibu nos tin pa hasi esei?

20 “Komo ku nos tin e promesanan akí, rumannan stimá, laga nos limpia nos mes di tur impuresa di karni i di spiritu i, den temor di Dios, perfekshoná nos santidat mas ainda.” (2 Korintionan 7:1) Yehova ke pa nos ta liber di práktikanan ku ta kontaminá nos “karni” (es desir, nos kurpa) i ku tin un mal influensia riba nos “spiritu” (es desir, nos aktitut òf manera di pensa). P’esei nos tin ku evitá tur loke ta kousa adikshon i ku ta perhudiká nos salú mental i físiko.

21 Beibel ta duna nos un bon motibu pa “limpia nos mes di tur impuresa.” Tuma nota ku 2 Korintionan 7:1 ta  kuminsá ku e palabranan: “Komo ku nos tin e promesanan akí.” Kua promesanan? Manera e versíkulonan mas promé ta bisa, Yehova a primintí: “Lo mi risibí boso. I lo mi ta un tata pa boso.” (2 Korintionan 6:17, 18) Figurá bo! Yehova ta primintí ku lo e kuida bo i stima bo manera un tata ta stima su yunan. Pero Yehova lo kumpli ku e promesanan akí bou di ún kondishon: bo mester evitá “tur impuresa di karni i di spiritu.” Pues, lo ta masha bobo si nos mester laga kualke bisio ku ta repugnante den bista di Yehova stroba nos di por tin un relashon asina presioso i será kuné!

22-25. Menshoná algun prinsipio bíbliko ku por yuda nos evitá bisio- i práktikanan impuru.

22 “Stima Yehova bo Dios ku henter bo kurason, ku henter bo alma i ku henter bo mente.” (Mateo 22:37) Hesus a splika ku e mandamentu akí ta esun di mas grandi. (Mateo 22:38) Yehova meresé pa nos stim’é ku henter nos kurason, alma i mente. Pero pa nos por hasi esei, nos tin ku evitá práktikanan ku por hasi nos bida mas kòrtiku òf ku por afektá e kapasidat di pensa ku Dios a duna nos.

23 [Yehova] ta duna tur hende bida, rosea i tur kos.” (Echonan 17:24, 25) Komo ku bida ta un regalo di nos Dios stimá, nos ta trata bida ku masha rèspèt. Pues, nos ta evitá tur práktika ku ta perhudiká nos salú, ya ku nos sa ku e kosnan ei ta indiká un gran falta di rèspèt pa e regalo di bida.—Salmo 36:9.

24 “Stima bo próhimo meskos ku bo mes.” (Mateo 22:39) Hopi biaha, e persona ku tin un bisio òf ku ta sigui un práktika impuru no ta perhudiká su mes so, sino tambe hende rònt di dje. Por ehèmpel, huma di sigaria ta afektá tur hende ku ta rònt di e humadó. Un persona ku ta perhudiká e hendenan rònt di dje ta kibra e lei di Dios ku ta manda nos stima nos próhimo, i a la bes e ta demostrá ku en realidat e no ta stima Dios.—1 Huan 4:20, 21.

25 “Sigui rekordá e rumannan pa nan ta sumiso, obediente  na gobièrnu i outoridat.” (Tito 3:1) Den hopi pais, uso i poseshon di droga ta ilegal. Pues, komo kristian berdadero, nos ta sòru pa nos no tin droga den nos poder ni usa droga.—Romanonan 13:1

26. (a) Kiko nos tin ku hasi pa nos keda den e amor di Dios? (b) Dikon no tin nada mas mihó ku hiba un bida limpi den bista di Dios?

26 Pa keda den e amor di Dios, nos mester ta limpi, no den un òf dos aspekto so, sino den tur aspekto di nos bida. No ta fásil pa legumai un bisio òf práktika impuru i keda leu for di dje, pero e ta posibel sí. * De echo, no tin nada mas mihó ku hiba un bida limpi, ya ku Yehova semper ta siña nos pa nos mes bon. (Isaías 48:17) Es mas, si nos hasié, nos por tin e satisfakshon di sa ku nos manera di biba ta duna un bon testimonio di e Dios ku nos ta stima, i asina nos ta keda den su amor.

^ par. 2 E palabra hebreo tradusí “puru” ta transmití no solamente e idea di ser limpi den sentido físiko, sino tambe den sentido moral i den asuntu di adorashon.

^ par. 26 Wak e kuadro “ Mi Ta Lucha pa Hasi Loke Ta Korekto?” na página 94, i e kuadro “ Pa Dios Tur Kos Ta Posibel” riba e página akí.

^ par. 67 A kambia su nòmber.