Lukas 7:1-50

7  Ora Hesus a kaba di papia tur loke e tabatin di bisa e hendenan, el a drenta Kapernaum.  Awor bon, un ofisial di ehérsito tabatin un esklabo ku e tabata stima mashá; e esklabo tabata hopi malu i serka di muri.  Ora e ofisial a tende di Hesus, el a manda algun ansiano di e hudiunan serka dje pa pidié bin kura su esklabo.  Anto esnan ku a bini serka Hesus a suplik’é masha hopi mes i a bis’é: “E meresé bo yudansa,  pasobra e ta stima nos nashon, i ta é a laga traha e snoa pa nos.”  Di manera ku Hesus a bai ku nan. Ma ora e no tabata muchu leu for di e kas, e ofisial di ehérsito ya a manda algun amigu pa bis’é: “Señor, no molestiá, pasobra mi no ta digno pa laga bo bini bou di mi dak.  P’esei mi no a konsiderá mi mes digno di bini serka bo. Pero djis papia un palabra i mi sirbidó lo kura.  Pasobra mi tambe ta un hòmber ku ta kai bou di outoridat di otro hende, i mi tin sòldá bou di mi mando. I mi ta bisa esun akí: ‘Bai!’ i e ta bai, i un otro: ‘Bini!’ i e ta bini, i na mi esklabo: ‘Hasi esaki!’ i e ta hasié.”  Wèl, ora Hesus a tende e kosnan akí, el a keda masha asombrá i a bira bisa e multitut ku tabata siguié: “Kere mi: Ni den Israel mi no a haña un fe asina grandi.” 10  I ora esnan ku a ser mandá a bai kas bèk, nan a haña e esklabo bon di salú. 11  Djis despues di esaki, el a biaha bai un stat ku yama Nain, kompañá pa su disipelnan i un gran kantidat di hende. 12  Nèt ora el a yega na porta di e stat, nan tabata karga un morto pa bai dera; e tabata e úniko yu di su mama, kende tabata biuda. Un grupo basta grandi di hende di e stat tabata kompañá e mama. 13  I ora Señor a mira e mama, el a haña duele di dje i a bis’é: “No yora mas.” 14  Anto el a bai na e kama di morto i a mishi kuné, i e kargadónan a para ketu. Anto el a bisa: “Yònkuman, mi ta bisa bo: Lanta ariba!” 15  I e morto a lanta sinta i a kuminsá papia, i Hesus a entreg’é na su mama. 16  Anto miedu a poderá di nan tur, i nan a kuminsá glorifiká Dios, bisando: “Un gran profeta a lanta meimei di nos,” i “Dios a dirigí su atenshon na su pueblo.” 17  I e notisia akí tokante Hesus a plama den henter Hudea i den tur e áreanan ei banda. 18  Awor, e disipelnan di Huan a kont’é tur e kosnan akí. 19  Di manera ku Huan a yama dos di su disipelnan i a manda nan serka Señor pa puntr’é: “Ta abo ta Esun Ku Ta Bini, òf nos tin ku spera un otro?” 20  Ora e hòmbernan a yega serka Hesus, nan a bis’é: “Huan Boutista a manda nos serka bo pa puntra bo: ‘Ta abo ta Esun Ku Ta Bini, òf nos tin ku spera un otro?’” 21  E ora ei, Hesus a kura malesa i enfermedat doloroso di hopi hende; i el a saka demoño i a laga hopi hende siegu haña nan bista. 22  Anto el a kontestá e dos disipelnan: “Bai konta Huan loke boso a mira i tende: Siegu ta mira, koho ta kana bon, leproso ta kura, surdu ta tende, morto ta lanta i hende pober ta tende e bon notisia. 23  I felis ta esun ku no a trompeká en konekshon ku mi.”* 24  Ora e mensaheronan di Huan a bai, Hesus a bisa e multitut tokante Huan: “Kiko boso a sali bai wak den desierto? Un kaña ku bientu ta sagudí? 25  Sí, ta kiko boso a sali bai wak? Un hòmber bistí na paña fini i karu? Wèl, ta den palasio real boso ta haña hende ku ta bisti paña masha bunita i ku ta biba den luho. 26  Realmente, ta kiko boso a sali bai wak anto? Un profeta? Sí, mi ta bisa boso, e ta un profeta, i asta mas ku un profeta! 27  Esaki ta esun di ken ta pará skirbí: ‘Wak! Mi ta manda mi mensahero pa e bai bo dilanti, i lo e prepará bo kaminda.’ 28  Mi ta bisa boso: Di tur hende ku a nase di muhé, no tin ningun mas grandi ku Huan; ma esun ku ta mas chikitu den e Reino di Dios ta mas grandi kuné.” 29  (I ora henter e pueblo i e kobradónan di belasting a tende esaki, nan a rekonosé ku Dios ta hustu, ya ku nan a ser batisá ku e boutismo di Huan. 30  Ma e fariseonan i esnan vèrsá den Lei no a hasi kaso di e konseho ku Dios a duna nan, ya ku nan no a laga Huan batisá nan.) 31  Hesus a sigui bisa: “Ku ken anto lo mi kompará e hendenan di e generashon akí, i manera ken nan ta? 32  Nan ta manera mucha chikitu ku ta sinta den plasa i ku ta yama otro i bisa: ‘Nos a toka flùit pa boso, ma boso no a baila; nos a kanta kantika di morto, ma boso no a yora.’ 33  Asina tambe, Huan Boutista a bini i no a kome pan ni bebe biña, ma boso a laga sa: ‘E tin demoño.’ 34  E Yu di hende sí a bini ta kome i bebe, ma boso a laga sa: ‘Wak! Un hòmber haragan i bisiá na biña, amigu di kobradó di belasting i pekadó!’ 35  Ma sabiduria ta demostrá pa medio di tur su obranan* ku e ta hustu.” 36  Awor bon, un di e fariseonan tabata blo pidié pa bin kome serka dje. P’esei el a drenta kas di e fariseo i a sinta kome na mesa. 37  I a sosodé ku un muhé ku tabata konosí den e stat komo pekadó a haña sa ku Hesus tabata kome den kas di e fariseo. El a bini ku un bòter di alabaster di zeta perfumá 38  i a bai para tras di Hesus i a kuminsá yora. Anto el a muha Hesus su pianan ku su lágrimanan i a seka nan ku su kabei. Tambe el a sunchi su pianan tiernamente i hunta nan ku e zeta perfumá. 39  Ora e fariseo ku a invit’é a mira esaki, el a bisa den su mes: “Si e hòmber akí ta un profeta, lo e tabata sa ta ken i ki sorto di muhé ta mishi kuné, ku ta un pekadó e ta.” 40  Ma sabiendo kiko e tabata pensa, Hesus a bis’é: “Simon, mi tin un kos di bisa bo.” Simon a kontest’é: “Papia numa, Maestro!” 41  “Dos hòmber tabata debe un fiadó di plaka; un tabata debe 500 denario,* pero e otro 50. 42  Komo ku nan no tabatin moda di pag’é bèk, el a pordoná tur dos nan debe libremente. P’esei, kua di nan dos lo stim’é mas?” 43  Simon a kontest’é: “Mi ta suponé ku ta esun ku tabatin e debe mas grandi.” Anto Hesus a bis’é: “Bo a kontestá korektamente.” 44  Anto el a bira wak e muhé i a bisa Simon: “Bo ta mira e muhé akí? Mi a drenta bo kas; abo no a duna mi awa pa laba mi pianan. Ma e muhé akí a muha mi pianan ku su lágrimanan i seka nan ku su kabei. 45  Abo no a kumindá mi ku un sunchi; ma for di ora ku mi a drenta, e muhé akí no a stòp di sunchi mi pianan tiernamente. 46  Abo no a hunta mi kabes ku zeta, ma e muhé akí a hunta mi pianan ku zeta perfumá. 47  P’esei, mi ta bisa bo, maske su pikánan ta hopi, nan ta ser pordoná, pasobra el a mustra hopi amor, ma esun ku ta ser pordoná pa tiki piká ta mustra tiki amor.” 48  Anto el a bisa e muhé: “Bo pikánan ta pordoná.” 49  E ora ei e hendenan ku tabata sintá na mesa huntu kuné a kuminsá bisa den nan mes: “Ta ken e hòmber akí ta ku asta piká e ta pordoná?” 50  Ma el a bisa e muhé: “Bo fe a salba bo; bai na pas.”

Nota na pia di página

Òf: “esun ku no a haña motibu pa duda den mi.”
Lit.: “yunan.”
Wak “denario” den Apèndiks 16.