Huan 17:1-26

17  Ora Hesus a kaba di papia e kosnan akí, el a hisa su kara na shelu i bisa: “Tata, e ora a yega; glorifiká bo yu, pa bo yu por glorifiká bo,  pa asina, meskos ku bo a dun’é outoridat riba tur hende, e por duna tur esnan ku bo a dun’é bida eterno.  Pa haña bida eterno, nan tin ku siña konosé bo,* e úniko Dios berdadero, i esun ku bo a manda, Hesukristu.  Mi a glorifiká bo riba tera i a kaba ku e trabou ku bo a duna mi pa hasi.  Pues awor, Tata, duna mi gloria banda di bo, e mesun gloria ku mi tabatin banda di bo promé ku mundu* a eksistí.  Mi a hasi bo nòmber konosí na e hendenan ku tabata den mundu i ku bo a duna mi. Nan tabata di bo, i bo a duna mi nan, i nan a kumpli ku bo palabra.  Awor nan a haña sa ku tur loke bo a duna mi ta bini di bo;  pasobra mi a duna nan e palabranan ku bo a duna mi, i nan a aseptá nan i di bèrdat a haña sa ku mi a bini komo bo representante, i nan a kere ku ta abo a manda mi.  Mi ta pidi bo pa nan; mi no ta pidi bo pa mundu, ma pa esnan ku bo a duna mi; pasobra di bo nan ta, 10  i tur loke ta di mi ta di bo, i di bo ta di mi, i mi a ser glorifiká meimei di nan. 11  Ademas, mi ta bini serka bo i no ta keda den mundu mas; ma nan sí ta keda den mundu. Tata Santu, protehá nan pa motibu di bo nòmber ku bo a duna mi,* pa nan por ta ún meskos ku nos ta ún. 12  Tempu mi tabata huntu ku nan, mi tabata protehá nan pa motibu di bo nòmber ku bo a duna mi; i mi a warda nan, i ningun di nan no a bai pèrdí, ku eksepshon di e yu di destrukshon, pa asina e skritura por kumpli. 13  Ma awor mi ta bini serka bo, i mi ta papia e kosnan akí miéntras ku mi ta den mundu ainda pa nan di bèrdat por sinti mi goso. 14  Mi a duna nan bo palabra, ma mundu a odia nan, pasobra nan no ta parti di mundu, meskos ku ami no ta parti di mundu. 15  Mi no ta pidi bo pa saka nan for di mundu, ma pa bo protehá nan pa motibu di e Malbado.* 16  Nan no ta parti di mundu, meskos ku ami no ta parti di mundu. 17  Santifiká nan pa medio di e bèrdat; bo palabra ta e bèrdat. 18  Meskos ku bo a manda mi den mundu, ami tambe a manda nan den mundu. 19  I mi ta santifiká mi mes pa nan, pa nan tambe por ser santifiká pa medio di e bèrdat. 20  Mi no ta pidi bo pa esakinan so, ma tambe pa esnan ku pone fe den mi pa medio di nan palabra; 21  pa nan tur por ta ún,* meskos ku abo, Tata, ta den union ku mi i ami ta den union ku bo, pa nan tambe por ta den union ku nos, pa asina mundu por kere ku ta abo a manda mi. 22  Ademas, mi a duna nan e gloria ku bo a duna mi, ya nan por ta ún meskos ku nos ta ún. 23  Ami ta den union ku nan, i abo ta den union ku mi, ya nan por ta realmente uní, pa asina mundu por sa ku ta abo a manda mi i ku bo ta stima nan meskos ku bo ta stima mi. 24  Tata, mi ke pa esnan ku bo a duna mi tambe por ta kaminda mi ta, pa nan por mira e gloria ku bo a duna mi, pasobra bo a stima mi promé ku a funda* mundu. 25  Tata hustu, en bèrdat mundu no konosé bo; ma ami sí konosé bo, i esakinan sa ku ta abo a manda mi. 26  I mi a hasi bo nòmber konosí na nan i lo mi sigui hasié konosí, pa nan por demostrá e amor ku bo a stima mi kuné i pa mi por ta den union ku nan.”

Nota na pia di página

E verbo griego ta indiká un akshon kontinuo.
Òf: “rasa humano.” Na griego: kósmos. Wak “mundu” den Apèndiks 16.
E nòmber “Hesus” ta nifiká “Yehova ta salbashon.”
Esta, Satanas.
Òf: “ta den union.”
Wak nota riba 1Pe 1:20.