Hebreonan 3:1-19

3  P’esei, rumannan santu, boso ku a risibí e yamada selestial, konsiderá ku sumo atenshon e apòstel i sumo saserdote ku nos ta rekonosé públikamente: Hesus.  E tabata fiel na Dios, kende a nombr’é, meskos ku Moises tambe tabata fiel na Dios segun ku el a sirbi den Su kas.*  Pero Hesus ta digno di mas gloria ku Moises, ya ku esun ku ta traha e kas tin mas onor ku e kas.*  Naturalmente, ta hende a traha tur kas, ma esun ku a traha tur kos ta Dios.  I Moises tabata un fiel sirbidó den e kas. Su sirbishi tabata un testimonio di e kosnan ku lo a keda revelá despues.  Pero Kristu tabata fiel komo Yu enkargá ku e kas di Dios. Nos ta e kas ei, basta nos tene firmemente te na final na nos frankesa di papia* i na e speransa ku nos ta broma kuné.  P’esei, manera spiritu santu ta bisa: “Awe, si boso skucha su stèm,  no hasi boso kurason duru manera tempu boso antepasadonan a provoká mi na rabia amargo, riba e dia di prueba den desierto,  ora nan a pone mi na prueba i a provoká mi, apesar ku nan a mira mi obranan 40 aña largu. 10  Ta p’esei mi a haña asko di e generashon ei i a bisa: ‘Semper nan ta desviá den nan kurason, i nan no a siña konosé mi kamindanan.’ 11  P’esei, den mi rabia mi a hura: ‘Nan lo no drenta den mi sosiegu.’” 12  Tene kuidou, rumannan, pa ningun di boso no haña un mal kurason, un kurason sin fe, pa motibu ku boso a alehá for di e Dios bibu. 13  Pero miéntras ku ainda tin un tempu ku por ser yamá “Awe,” sigui animá otro tur dia, pa ningun di boso no laga e poder engañoso di piká hasi boso kurason duru. 14  Pasobra en realidat nos lo partisipá den loke Kristu ta partisipando solamente si nos tene firmemente te na final na e konfiansa ku nos tabatin na kuminsamentu. 15  Manera e Skritura ta bisa: “Awe, si boso skucha su stèm, no hasi boso kurason duru manera tempu boso antepasadonan a provoká mi na rabia amargo.” 16  Ken tabata esnan ku a tende i tòg a provoká Dios na rabia amargo? De echo, no tabata tur esnan ku a sali for di Egipto bou di guia di Moises? 17  Ademas, ku ken Dios tabata disgustá 40 aña largu? No tabata ku esnan ku a peka, kende nan kadaver a keda bentá den desierto? 18  I ta na ken el a hura ku nan lo no drenta den su sosiegu? No ta na esnan ku tabata desobediente? 19  Pues, nos ta mira ku nan no por a drenta pa motibu di nan falta di fe.

Nota na pia di página

Esta, e kongregashon di Dios.
Òf: “ku esun ku ta sirbi den e kas.”
Wak “papia ku frankesa” den Apèndiks 16.