2 Korintionan 9:1-15

9  Awor bon, enkuanto e yudansa ku ta pa e santunan, mi no tin nodi di skirbi boso,  pasobra mi sa ku boso ta dispuesto pa yuda. I ta en konekshon ku esei mi ta gaba boso serka e rumannan di Masedonia, bisando “ku ta hasi un aña kaba ku Akaya ta kla pa yuda.” I boso zelo a stimulá mayoria di nan.  Pero mi ta manda e rumannan, pa asina loke nos a gaba di boso no resultá di ta enbano den e kaso akí, sino ku boso di bèrdat por ta kla, manera mi a bisa di boso.  Sino ora e rumannan di Masedonia bini huntu ku mi i haña ku boso no ta kla, nos kara—pa no bisa di boso—lo keda tur na bèrgwensa, pa motibu di e konfiansa ku nos tabatin den boso.  P’esei, mi a haña ta nesesario pa animá e rumannan pa bai serka boso promé ku mi i asina prepará di antemano e regalo generoso ku boso a primintí. Anto ora nos yega, e regalo akí lo ta kla i esei lo demostrá ku boso no ta dun’é fòrsá, sino generosamente.  Pero, relashoná ku esaki, esun ku ta sembra na un manera pichiri, lo kosechá tambe na un manera pichiri; i esun ku ta sembra na abundansia, lo kosechá tambe na abundansia.  Laga kada hende hasi manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.  Ademas, Dios por sòru pa boso haña tur su bondat inmeresí na abundansia, a fin ku semper boso por tin sufisiente di tur loke boso mester, i tambe na abundansia pa hasi tur bon obra.  (Manera ta pará skirbí: “El a kana parti tur kaminda i a duna na e pobernan; su hustisia ta sigui pa semper.” 10  Awor bon, esun ku ta duna un abundansia di simia na e sembradó i tambe pan pa hende kome lo duna boso simia na abundansia pa boso sembra i lo yuda boso obranan hustu produsí un kosecha riku.) 11  Dios ta enrikesé boso den tur kos pa boso por ta generoso den tur sorto di manera. I pa medio di nos esfuerso, e generosidat ei ta pone hende ekspresá gradisimentu na Dios. 12  Pasobra e sirbishi akí ku nos ta efektuá no ta solamente pa perkurá bon pa e nesesidatnan di e santunan, sino tambe pa pone hopi hende ekspresá gradisimentu na Dios. 13  Pa motibu di e prueba ku e sirbishi akí ta duna, nan ta glorifiká Dios pasobra boso ta sumiso den boso trabou di deklará públikamente e bon notisia tokante Kristu, i pasobra boso ta generoso den boso kontribushon pa nan i pa tur; 14  i nan ta supliká Dios pa boso i asina demostrá nan kariño pa boso pa motibu di e bondat inmeresí ekstraordinario ku Dios a mustra na boso. 15  Nos ta gradisí Dios pa su regalo ku nos no por deskribí ku palabra.

Nota na pia di página