1 Timoteo 1:1-20

1  Esaki ta un karta ku ami Pablo, apòstel di Kristu Hesus riba òrdu di Dios, nos Salbador, i di Kristu Hesus, nos speransa,  ta skirbi na Timoteo, un berdadero yu den fe: Bondat inmeresí, miserikòrdia i pas di Dios, e Tata, i di Kristu Hesus, nos Señor, sea ku bo.  Meskos ku mi a animá bo pa keda na Efeso ora mi tabata kla pa sigui mi kaminda pa Masedonia,* asina mi ta bolbe animá bo pa keda einan, ya bo por duna òrdu na sierto personanan pa nan no siña hende otro doktrina  ni presta atenshon na kuenta falsu ni na lista di antepasado. E kosnan ei no ta yuda ku nada; nan ta lanta pregunta inútil pa investigashon en bes di perkurá loke ta bini di Dios pa fortifiká fe.  Realmente, meta di e instrukshon akí ta pa nos tin amor ku ta sali for di un kurason limpi, di un bon konsenshi i di fe sin hipokresia.  Algun persona a desviá for di e kosnan akí i a kuminsá papia kos sin sentido.  Nan ke ta maestro di lei, ma nan no ta komprondé ni e kosnan ku nan ta papia ni e kosnan ku nan ta insistí asina tantu riba dje.  Awor, nos sa ku e Lei ta bon, basta ku un hende aplik’é korektamente,*  realisando ku no ta pa hende hustu ta dekretá lei, sino pa esnan sin lei i rebelde, ku ta malbado i pekadó, desleal* i ku ta rechasá loke ta santu; sí, ta pa esnan ku ta mata tata, mama i otro hende, 10  pa fornikadó, hòmber ku ta drumi ku hòmber, sekuestradó, gañadó, esnan ku ta hasi huramentu falsu i pa tur otro kos ku ta kontra e siñansa sano. 11  E siñansa sano akí ta kuadra ku e glorioso bon notisia di e Dios felis ku e mes a konfia na mi. 12  Mi ta gradisidu na Kristu Hesus, nos Señor, kende a duna mi poder, pasobra el a konsiderá mi fiel i p’esei a asigná mi na su sirbishi, 13  aunke ántes mi tabata un blasfemadó, un persiguidó i un hòmber arogante i ònbeskòp. Sinembargo, el a mustra miserikòrdia na mi, pasobra mi a aktua den ignoransia i sin fe. 14  Pero mi a risibí e bondat inmeresí di nos Señor na gran abundansia, i tambe fe i amor ku ta pa medio di Kristu Hesus. 15  E deklarashon akí ta konfiabel i ta meresé pleno aseptashon: Kristu Hesus a bini na mundu pa salba pekadó. I di esakinan, ami ta esun di mas notabel. 16  Sinembargo, el a mustra miserikòrdia na mi pa asina pa medio di mi, komo e kaso di mas notabel, Kristu Hesus lo por a demostrá tur su pasenshi komo un ehèmpel pa esnan ku lo pone nan fe den dje pa haña bida eterno. 17  Awor bon, na e Rei di eternidat—indestruktibel, invisibel i e úniko Dios—sea onor i gloria pa tur eternidat. Amèn. 18  Mi ta enkargá bo ku e instrukshonnan akí, Timoteo, mi yu, na armonia ku loke a ser profetisá en konekshon ku bo, ya asina pa medio di esakinan bo por sigui bringa e guera ekselente, 19  miéntras ku bo ta mantené bo fe i un bon konsenshi, lokual algun a benta un banda i asina pone nan fe noufragá. 20  Himeneo i Aleksander ta entre esakinan, i mi a entregá nan na Satanas* pa e disiplina siña nan pa no blasfemá.

Nota na pia di página

Wak nota riba Ech 16:9.
Òf: “legítimamente.”
Òf: “sin bondat amoroso.”
Esta, a ekspulsá nan for di e kongregashon.