1 Pedro 5:1-14

5  P’esei, komo ku mi tambe ta un ansiano, testigu di e sufrimentu di Kristu i asta partisipante den e gloria ku lo keda revelá, mi ta hasi e apelashon akí na e ansianonan entre boso:  Pastoriá* e tou di Dios ku ta bou di boso kuido, no obligá, sino di buena gana; no pa amor pa ganashi desonesto, sino ku entusiasmo;  no manera hende ku ta manda riba esnan ku ta propiedat di Dios, sino mas bien, bira ehèmpel pa e tou.  I ora e wardadó prinsipal keda manifestá, boso lo risibí e korona di gloria ku no ta marchitá.  Meskos tambe, hòmbernan mas yòn, sea sumiso na e ansianonan.* Boso tur, den boso trato ku otro, bisti humildat, pasobra Dios ta oponé hende orguyoso, ma e ta duna bondat inmeresí na hende humilde.  Humiá boso mes anto bou di e man poderoso di Dios, pa e por halsa boso na e debido tempu,  miéntras ku boso ta tira tur boso inkietut* riba dje, pasobra e ta interesá den boso.  Mantené boso sano huisio i sea alerta. Boso atversario, Diabel, ta kana rònt manera un leon ku ta grita, buskando ken e por habraká.  Sinembargo, tuma boso posishon kontra dje, firme den fe, sabiendo ku rònt mundu henter e hermandat ta soportá e mesun tipo di sufrimentu. 10  Pero despues ku boso a sufri pa un poko tempu, e Dios di tur bondat inmeresí, kende a yama boso na su gloria eterno den union ku Kristu, mes lo terminá boso formashon; lo e hasi boso firme, lo e hasi boso fuerte. 11  Na dje ta pertenesé poder pa semper. Amèn. 12  Pa medio di Silvano,* ku mi ta konsiderá un ruman fiel, mi a skirbi boso un par di palabra pa animá boso i duna boso un testimonio sinsero ku esaki ta e berdadero bondat inmeresí di Dios. Para firme den esaki. 13  Esun* ku ta na Babilonia, skohí meskos ku boso, i tambe Marko, mi yu, ta manda kumindamentu pa boso. 14  Kumindá otro ku un sunchi di amor. Pas sea ku boso tur ku ta den union ku Kristu.

Nota na pia di página

Òf: “kuida manera un wardadó di karné.”
Òf: “hòmbernan di mas edat.”
Òf: “preokupashonnan.”
Òf: “Sílas.”
E pronòmber griego akí ta referí na un hende muhé i evidentemente ta representá e kongregashon na Babilonia.