1 Korintionan 6:1-20

6  Kon por ta ku ora un di boso tin un desakuerdo ku un otro ruman, boso ta tribi di bai korte dilanti di hende inhustu i no dilanti di e santunan?  Òf boso no sa ku ta e santunan lo husga mundu? Anto si boso ta bai husga mundu, boso no ta sufisiente kapas pa husga asuntunan di muchu ménos importansia?  Boso no sa ku nos lo husga angel? Anto sigur nos lo mester ta kapas pa husga e asuntunan di e bida akí.  P’esei, si di bèrdat boso tin e asuntunan di e bida akí pa husga, ta hende ku e kongregashon ta desaprobá boso ta apuntá komo hues?  Mi ta bisa esaki pa boso por sinti bèrgwensa. No tin ni ún hòmber sabí entre boso ku lo por husga entre su rumannan?  Na lugá di esei, ruman ta hiba ruman korte, anto pa kolmo dilanti di hende ku no ta kreyente!  En realidat, e solo echo ku boso tin kaso hudisial kontra otro ya kaba ta un derota kompleto pa boso. Pakiko boso no ta dispuesto pa soportá inhustisia? Pakiko boso no ta dispuesto pa soportá ora hende estafá boso?  Ma al kontrario, boso mes ta kometé inhustisia i estafa, i pa kolmo kontra boso mes rumannan.  Boso no sa ku hende inhustu lo no risibí* e Reino di Dios? No gaña boso mes.* Ni fornikadó, ni adoradó di dios falsu,* ni hende ku ta kometé adulterio, ni hòmber ku ta someté nan mes na aktonan innatural, ni hòmber ku ta drumi ku hòmber, 10  ni ladron, ni hende golos, ni buraché, ni hende ku ta kana zundra, ni hende ku ta chantagiá otronan lo no risibí e Reino di Dios. 11  Ma esei ta loke algun di boso tabata. Pero Dios a hasi boso limpi, i el a santifiká boso i a deklará boso hustu den nòmber di nos Señor Hesukristu huntu ku Su spiritu. 12  Tur kos ta permití pa mi; ma no ta tur kos ta kumbiní. Tur kos ta permití pa mi; ma lo mi no laga nada dominá mi. 13  Kuminda ta pa stoma i stoma pa kuminda; pero Dios lo kaba ku tur dos. Awor e kurpa no ta pa fornikashon, sino pa Señor; i Señor ta sòru pa e kurpa. 14  Pero meskos ku Dios a lanta Señor for di morto, asina lo e lanta nos tambe pa medio di su poder. 15  Boso no sa ku boso kurpa ta parti di e kurpa di Kristu? Akaso mi mester kita e partinan di e kurpa di Kristu i hasi nan parti di e kurpa di un prostituta? Apsolutamente ku nò! 16  Boso no sa ku esun ku uni su mes ku un prostituta ta ún kurpa kuné? Pasobra Dios ta bisa: “Nan dos lo ta ún karni.” 17  Pero esun ku uni su mes ku Señor ta ún spiritu kuné. 18  Hui di fornikashon. Ningun otro piká ku un hende kometé no ta afektá su kurpa direktamente, pero esun ku ta praktiká fornikashon ta peka kontra su mes kurpa. 19  Boso no sa ku boso kurpa ta tèmpel di e spiritu santu ku ta den boso i ku boso a risibí di Dios? Ademas, boso no ta pertenesé na boso mes: 20  Dios a kumpra boso pa un preis haltu. Di tur manera, usa boso kurpa pa glorifiká Dios.

Nota na pia di página

Lit.: “heredá.”
Òf: “no sea gañá.”
Lit.: “imágen.”