1 Huan 3:1-24

3  Mira ki gran amor e Tata a mustra na nos: el a permití nos ser yamá yu di Dios; i ta esei nos ta tambe. Ta p’esei mundu no konosé nos, pasobra mundu no konos’é.  Rumannan stimá, awor akí nos ta yu di Dios, pero no a keda revelá ainda kiko nos lo ta den futuro. Nos sa sí ku ora Dios keda manifestá, nos lo ta meskos kuné, pasobra nos lo mir’é manera e ta realmente.  I ken ku tin e speransa akí den dje ta purifiká su mes, meskos ku é ta puru.  Ken ku ta praktiká piká ta praktiká maldat tambe, i p’esei piká ta kibramentu di lei.  Ademas, boso sa ku Hesus a keda manifestá pa kita nos pikánan, i den dje no tin piká.  Ken ku ta keda den union kuné no ta praktiká piká; hende ku ta praktiká piká no a mir’é ni konos’é.  Yunan stimá, no laga ningun hende gaña boso; esun ku ta praktiká hustisia ta hustu, meskos ku Hesus ta hustu.  Esun ku ta praktiká piká ta bini di Diabel, pasobra Diabel ta pekando for di kuminsamentu. Pa e motibu akí e Yu di Dios a keda manifestá: pa destruí e obranan di Diabel.  Ken ku a nase di Dios no ta praktiká piká, pasobra su spiritu santu* ta keda den e persona ei, i e no por praktiká piká, pasobra el a nase di Dios. 10  Na esaki ta bisto ken ta e yunan di Dios i ken ta e yunan di Diabel: ken ku no ta praktiká hustisia no ta bini di Dios; esun ku no ta stima su ruman tampoko. 11  Pasobra esaki ta e mensahe ku boso a tende na kuminsamentu: nos mester stima otro. 12  Nos no mester ta manera Kain, kende a bini di e Malbado* i a mata su ruman. I pa ki motibu el a mat’é? Pasobra Kain su obranan tabata malu, pero esnan di su ruman tabata hustu. 13  Rumannan, no keda straño ku mundu ta odia boso. 14  Nos tabata komo si fuera morto, pero awor nos ta na bida, pasobra nos ta stima nos rumannan. Esun ku no ta stima su ruman ta keda den e gara di morto. 15  Ken ku ta odia su ruman ta un asesino,* i boso sa ku ningun asesino no ta haña bida eterno. 16  Pa medio di esaki nos a siña kiko ta amor: Hesus a entregá su alma* pa nos; i nos ta obligá di entregá nos alma pa nos rumannan. 17  Pero kon esun ku tin e rekursonan di e mundu akí pa sostené bida i ta mira su ruman den nesesidat, ma ta sera su kurason p’e,* por bisa ku e tin amor pa Dios? 18  Yunan stimá, nos no mester stima ku palabra òf ku boka so, ma ku echo i ku sinseridat. 19  Asina nos lo sa ku nos ta pertenesé na e bèrdat, i nos lo ta konvensí den nos kurason ku Dios ta stima nos. 20  Asta si nos kurason ta kondená nos, kòrda ku Dios ta mas grandi ku nos kurason i sa tur kos. 21  Rumannan stimá, si nos kurason no ta kondená nos, nos por papia ku Dios ku frankesa; 22  i kiko ku nos pidié nos ta haña, pasobra nos ta kumpli ku su mandamentunan i ta hasi loke ta agradabel den su bista. 23  Sí, esaki ta su mandamentu: tene fe den e nòmber di su Yu Hesukristu i stima otro, manera el a manda nos. 24  Ademas, esun ku ta kumpli ku su mandamentunan ta keda den union kuné, i é den union ku e persona ei. Pa medio di e spiritu ku el a duna nos, nos sa ku e ta keda den union ku nos.

Nota na pia di página

Lit.: “simia.” Es desir, simia ku por reprodusí òf duna fruta.
Esta, Satanas.
Òf: “matadó.”
Òf: “bida.”
Òf: “ta nenga di mustra kompashon na dje.”