Riba 21 di mei 2025, e Korte Supremo di Sri Lanka a tuma un desishon históriko pa ku libertat religioso den e pais. Despues di 11 aña, Korte a yega na e desishon ku e polisnan a aktua robes dor di a arestá kuater di nos ruman muhénan ku tabata prediká pasífikamente. Pa vários motibu, e veredikto positivo aki tabata un viktoria legal importante pa e pueblo di Yehova na Sri Lanka. Por ehèmpel, e veredikto a hasi kla, ku di akuerdo ku lei di Sri Lanka, Testigunan di Yehova tin e derecho pa kompartí nan fe ku otro hende na un manera pasífiko. Ademas, e veredikto ta sirbi komo un ehèmpel tokante rèspèt pa libertat religioso pa henter e parti di mundu ei.

Na òktober 2014, kuater ruman muhé tabata prediká den e pueblito di Kirama, den parti zùit di Sri Lanka. Diripiente, un multitut rabiá a purba di stòp e ruman muhénan di prediká. Ora polis a yega, en bes di plama e multitut, nan a detené e kuater ruman muhénan akí, aunke ku nan no a falta ku lei. Outoridatnan a laga e ruman muhénan pasa henter un anochi den prizòn sin ku tabatin ningun akusashon kontra nan, i a pone e ruman muhénan aki den sèl huntu ku kriminalnan violento. Sinembargo, durante e periodo difísil ei, e ruman muhénan a keda trankil i tabata hasi orashon na Yehova. E siguiente dia, nan a laga e ruman muhénan sali liber.

Na novèmber 2014, ku tabata un luna despues, e hues lokal a sera e kaso sin hasi ningun prosedimentu hudisial. Sinembargo, e kuater ruman muhénan tabata konvensí ku nan derecho humano a ser violá, i p’esei nan a disidí di entregá un keho na e Komité di Derechonan Humano i tambe na e Korte Supremo di Sri Lanka. Finalmente, na mei 2025, e desishon di Korte tabata ku e polisnan a aktua robes dor di a arestá e ruman muhénan. Tambe, Korte a ordená e hefe di polis lokal i e gobièrnu pa paga kada ruman muhé un kompensashon finansiero. Despues di e desishon di Korte Supremo, un dje ruman muhénan ku yama Malkanthi a bisa: “E sentensia akí no tabata djis un viktoria pa nos kuater. Realmente, e viktoria aki a konfirmá e derecho ku tur nos rumannan na Sri Lanka tin pa por adorá Yehova pasífikamente. Dios su promesa na Isaías 54:17, esta ku ‘niun arma ku ser trahá pa hasi bo daño lo no tin éksito’ a bira mas real pa mi awor ku promé!”

Nos ta alegrá huntu ku nos rumannan na Sri Lanka pa e veredikto positivo akí. E veredikto akí a konfirmá ku nos rumannan tin e derecho di sigui “hiba un bida trankil i ketu ku pleno deboshon na Dios.”—1 Timoteo 2:2.