3 DI MEI 2022
NOTISIA INTERNASHONAL
“Sigui Fortalesé Bo Amistat ku Yehova”
Programa Spesial pa Animá Nos Rumannan na Ukrania i Polonia
Dia 26 di aprel 2022, Ruman Mark Sanderson, un miembro di Kuerpo Gobernante di Testigunan di Yehova, a yega Polonia. El a bai Polonia pa animá e rumannan ku a ser afektá pa motibu di e guera na Ukrania.
Algun ruman na Polonia ta hasi trabou tékniko tras di kortina na e Salòn di Asamblea
Tur kongregashon na Polonia i Ukrania a ser invitá pa un programa spesial ku a tuma lugá dia 30 di aprel 2022. Na Polonia, e rumannan di Ukrania ku ta refugiado i e rumannan ku a yuda ku trabou di ousilio a ser invitá pa asistí na e programa na e Salòn di Asamblea na Warshaw. Na tur, inkluso e personanan ku tabata konektá via sistema di konferensia di vidio, tabatin 250.000 persona ku a wak e programa na Polonia i Ukrania.
“Ruman Sanderson a bisa: “Nos rumannan na tur parti di mundu ta pensa riba boso i ta resa pa boso. Na nos sede mundial, tur dia e rumannan ta pidi Yehova pa yuda nos rumannan na Rusia i Ukrania. Na e reunionnan di Kuerpo Gobernante tambe nos ta pidi pa Yehova yuda nos rumannan na Rusia i Ukrania.” Ruman Sanderson a konfirmá e rumannan: “E difikultatnan ku boso ta pasando aden no ke men ku boso a pèrdè Yehova su bendishon. E ta mira boso; e ta stima boso, i e ta serka di hende ku ta pasa den difikultat.”
Un grupo di ruman ku a evakuá Mariupol, Ukrania, ta wak e programa spesial
Ruman Sanderson a sigui bisa: “Sigui fortalesé boso amistat ku Yehova. Nos meta no ta djis pa logra yega na final di e difikultatnan, pero na final nos meta mester ta pa nos fe ta mas fuerte i pa nos tin un amistat mas será ku Yehova. Esei ta e lès ku Yehova ke siña nos.”
Serhiy, un ansiano na e stat Odessa, Ukrania, a bisa: “E último siman akí mi no por a drumi bon, pasobra mi ta sinti mi hopi preokupá, tristu i insigur. Sinembargo, [e programa spesial] a konvensé mi mas ainda ku Yehova no solamente ta interesá den su pueblo komo grupo, pero ku e ta interesá den kada un di nos individualmente.”
Tatiana ta un ruman muhé di Kiev ku ta refugiado. El a bisa: “Awe, m’a ègt sinti ku Yehova ta masha interesá den mi. Ta komo si fuera Yehova a brasa mi pa mustra mi kuantu e ta stimá mi. Ni maske unda nos bai, Yehova semper ta ku nos.”
Nos ta stima nos rumannan mashá, i nos tin sigur ku e programa spesial a konvensé nos rumannan mas ainda di Yehova su amor leal pa su pueblo.—Salmo 136:1.
