Bo ta pensa meskos ku e hendenan menshoná aki riba? Kisas bo ke lesa Beibel wèl, pero tin algu ta stroba bo. Pa hopi hende, e idea di lesa Beibel ta parse algu difísil. Pero kiko si bo haña sa ku Beibel por yuda bo haña mas felisidat i satisfakshon den bida? Anto kiko si bo haña sa ku tin algun kos ku bo por hasi pa bo lesamentu di Beibel bira mas interesante? Lo bo ta dispuesto pa wak kiko Beibel por ofresé bo?

Ban wak kiko algun hende ku a saka benefisio for di nan lesamentu di Beibel a bisa.

Ezekiel, kende tin 20 i piku aña, a bisa: “Den pasado, mi tabata manera un hende ku ta stür outo sin un destinashon spesífiko. Pero ora mi a kuminsá lesa Beibel, mi bida a haña un propósito. E ta kontené konseho práktiko ku mi por usa tur dia.”

Frieda, kende tambe tin 20 i piku aña, ta konta: “Mi tabata un hende ku ta rabia basta lihé. Pero lesamentu di Beibel a yuda mi kontrolá mi mes. Esei a drecha mi karakter, i awor mi tin mas amigu.”

Eunice, un señora di 50 i piku aña, ta bisa tokante Beibel: “E ta yuda mi bira un mihó persona i ta yuda mi kambia mi mal hábitonan.”

E hendenan akí i miónes di otro hende a siña ku lesamentu di Beibel por yuda bo disfrutá mas di bida. (Isaías 48:17, 18) Entre otro, e por yuda bo (1) tuma bon desishon, (2) haña bon amigu, (3) dil ku strès i (4) mas importante ainda, yuda bo siña e bèrdat tokante Dios. E konsehonan den Beibel ta bini di Dios; pues si bo apliká nan, kos no por bai robes. Dios nunka no ta duna mal konseho.

E kos prinsipal ta pa bo kuminsá lesa Beibel. Ki sugerensianan práktiko por yuda bo kuminsá lesa Beibel i disfrutá di dje?