Bai na kontenido

Bai na kontenido

 TÓPIKO PRINSIPAL | TESTIGUNAN DI YEHOVA

Testigunan di Yehova—Ki Tipo di Hende Nan Ta?

Testigunan di Yehova—Ki Tipo di Hende Nan Ta?

Nos ta un organisashon internashonal independiente ku no ta afiliá na ningun otro organisashon religioso. Aunke nos sede mundial ta na Merka, e gran mayoria di Testigu di Yehova ta biba na otro pais. Nos ta mas o ménos ocho mion Testigu, den mas ku 230 pais, ku ta siña hende loke Beibel ta bisa. Nos ta hasi esei pa kumpli ku loke Hesus a bisa, esta, ku “e bon notisia akí di e Reino lo ser prediká den henter e Tera habitá, komo testimonio pa tur nashon.”—Mateo 24:14.

Sin importá unda nos ta biba, nos ta obedesé lei di e pais kaminda nos ta biba. Pero nos ta keda neutral den asuntunan polítiko. Nos ta neutral pasobra nos ta sigui loke Hesus a bisa tur kristian, esta, pa “no ta parti di mundu.” Pues, nos no ta mete den asuntunan polítiko ni apoyá guera. (Huan 15:19; 17:16) Durante Segundo Guera Mundial nan a enkarselá, torturá i asta mata Testigunan di Yehova pasobra nan kier a keda neutral. Un eks-obispu aleman a bisa: “Nan ta e úniko personanan ku por bisa ku nan a nenga di kumpli ku servisio militar pa motibu di nan konsenshi durante e Terser Reich.”

“[Testigunan di Yehova] tin normanan moral hopi haltu. Nos lo por duna e tipo di hendenan ei, ku no ta egoista, e puestonan di mas haltu den polítika, pero nan lo no aseptá esei nunka. . . . Nan ta respetá outoridat di gobièrnu, pero nan ta kere ku ta e Reino di Dios so por solushoná tur e problemanan di humanidat.”—Korant Nová Svoboda, Repúblika Cheko

Pero no ta pasobra nos no ta parti di mundu nos ta isolá nos mes for di otro hende. Ora Hesus a hasi orashon na Dios, el a hasi e siguiente petishon pa su siguidónan: “Mi no ta pidi bo pa saka nan for di mundu.” (Huan 17:15) P’esei bo por mira nos ta traha, hasi kompra i bai skol manera tur otro hende.