Bai na kontenido

Bai na kontenido

 BEIBEL TA KAMBIA BIDA DI HENDE

Mi A Siña Ku Yehova Ta Miserikòrdioso i Kla pa Pordoná

Mi A Siña Ku Yehova Ta Miserikòrdioso i Kla pa Pordoná
  • NASÍ NA AÑA: 1954

  • PAIS NATAL: CANADA

  • SU PASADO: ESTAFADÓ, BISIÁ NA WEGA DI PLAKA

MI PASADO:

Mi a krese den un bario pober den e stat di Montreal. Nos ta ocho ruman i ami ta esun di mas chikí. Tempu mi tabatin apénas seis luna, mi tata a fayesé i a laga mi mama ku tur responsabilidat di kas.

For di tempu mi tabata mucha, mi bida di tur dia tabata drei rònt di droga, wega di plaka, violensia i anda ku kriminal. Ku dies aña, mi a kuminsá hasi rospondi pa prostituta i hende ku ilegalmente tabata fia otronan plaka ku interes haltu. Mi tabata gaña hopi, i mi tabata gusta manipulá i estafá hende na tur manera posibel. Esei tabata manera un droga pa mi.

Ku mi 14 aña, ya kaba mi tabatin masha astusia. Por ehèmpel, mi tabata kumpra un kantidat grandi di oloshi, armbant i renchi pasá den awa di oro. Mi tabata graba ‘14 karat’ riba nan pa hasi komo si fuera nan ta di oro i bende nan riba kaya i den lugá di parker di sentronan komersial. Asina fásil mi tabata gana bòshi di plaka. Un biaha mi a gana 10.000 dòler kanades riba ún dia!

Tempu ku mi tabatin 15 aña, nan a kita mi for di skol reformatorio i mi no tabatin kaminda pa kue. Mi tabata drumi riba kaya, den parke òf serka algun amigu ku a laga mi keda na nan kas.

Debí ku mi tabata estafá hende, kada bes polis tabata interogá mi. Ma nunka mi no a kai será pasobra mi no tabata bende merkansia hòrtá. Pero mi a haña mi ta paga butnan haltu pa froude, estafa i bendementu di merkansia sin pèrmit. Sin ningun klase di miedu, mi tabata asta kobra esnan ku tabata debe e hendenan ku tabata fia otronan plaka ku interes haltu. Hopi biaha mi tabata kana armá pasobra e trabou ei tabata peligroso. Tambe mi a yega di traha den krímen organisá.

BEIBEL A KAMBIA MI BIDA:

Dia mi a tende di Beibel pa promé biaha, mi tabatin 17 aña. Mi tabata biba ku mi mucha muhé ora ku el a kuminsá studia Beibel ku Testigunan di Yehova. Pero, mi no tabata di akuerdo ku e normanan moral  di Beibel. P’esei mi a bai lag’é i mi a bai biba huntu ku un otro mucha muhé ku mi tabata sali kuné.

E momento desisivo a yega ora ku e di dos mucha muhé akí tambe a kuminsá studia Beibel ku Testigunan di Yehova. El a hasi algun kambio den su bida, i mi a keda impreshoná ku su karakter a bira mas suave i ku e tabatin mas pasenshi. Un dia mi a haña invitashon pa bishitá e Salòn di Reino di Testigunan di Yehova, anto mi a bai. Einan mi a topa ku hende amabel i desente ku a duna mi un kaluroso bon biní. Ki un kontraste ku e mundu ku mi tabata biba aden! Mi famia no tabata wòri ku mi mashá ni mi no tabata haña kariño tempu mi tabata mucha. Pues e kariño ku mi a haña serka e Testigunan di Yehova tabata nèt loke mi tabata anhelá p’e. Ora ku nan a ofresé mi un kurso di Beibel, mi a aseptá mesora.

Loke mi a siña di Beibel probablemente a skapa mi bida. Wega di plaka a hinka mi den un debe di mas ku 50.000 dòler, i p’esei ami ku dos otro ladron a plania pa hòrta basta plaka. Pero mi ta masha kontentu ku mi no a djòin nan, ya ku e dos ladronnan si a sigui ku e plan, i komo resultado, un di nan a kai será i e otro a ser asesiná.

Segun ku mi a sigui ku mi kurso di Beibel, mi a mira ku mi mester a hasi hopi kambio den mi bida. Por ehèmpel, mi a siña ku Beibel ta bisa na 1 Korintionan 6:10 ku “ni ladron, ni hende golos, ni buraché, ni hende ku ta kana zundra, ni hende ku ta chantagiá otronan lo no risibí e Reino di Dios.” Ora mi a lesa e versíkulo ei, mi wowonan a yena ku awa pasobra mi a ripará kon grave mi situashon tabata. Mi a realisá ku mi mester a kambia mi bida por kompleto. (Romanonan 12:2) Mi tabata violento i agresivo, i henter mi bida tabata basá riba mentira.

Pero den mi kurso di Beibel mi a siña tambe ku Yehova ta miserikòrdioso i kla pa pordoná. (Isaías 1:18) Mi a hasi hopi orashon pa roga Yehova pa yuda mi kambia mi bida. Ku yudansa di Yehova, tiki tiki mi a logra kambia mi personalidat. Un paso importante ku mi a dal tabata ora ku ami ku mi namorada a kasa.

Awe mi ta na bida debí ku mi ta apliká prinsipio di Beibel

Ku 24 aña di edat, mi tabata kasá i tabatin tres yu kaba. Pues, awor mi mester a buska un trabou onesto. Pero mi no tabatin masha skol ni eksperensia di trabou. P’esei mi a bolbe hasi orashon ferviente na Yehova i a bai buska un trabou. Na e entrevistanan mi tabata bisa e doñonan di trabou ku mi kier a kambia mi bida i gana mi pan na un manera onesto. Tin biaha mi tabata asta bisa nan ku mi tabata sigui un kurso di Beibel i ku mi kier a bira un mihó siudadano. Hopi di nan a nenga di duna mi trabou. Finalmente, despues ku mi a papia abiertamente di mi pasado turbulento na un otro entrevista, e persona ku a entrevistá mi a bisa mi: “Mi no sa dikon pero tin algu ta bisa mi ku mi mester duna bo e trabou.” Mi tin sigur ku esei tabata e kontesta pa mi orashonnan. Ku tempu, ami ku mi kasá a batisá komo Testigu di Yehova.

E BENEFISIONAN:

Awe mi ta na bida debí ku mi ta apliká prinsipio di Beibel i ta biba na armonia ku nan. Mi tin un bida di famia felis i mi ta biba ku un konsenshi limpi pasobra mi ta konvensí ku Yehova a pordoná mi.

Mi tin 14 aña kaba ta dediká un promedio di 70 ora pa luna na prediká e bon notisia i yuda otro hende siña tokante Beibel. I resientemente mi kasá a djòin mi. Anto durante e último 30 añanan, mi tabatin e goso di yuda 22 di mi koleganan di trabou kuminsá sirbi Yehova. Te ainda mi ta bai sentronan komersial, pero no pa estafá hende manera ántes. Hopi biaha ku mi bai mi ta probechá papia ku otro hende tokante e speransa di biba den un futuro mundu nobo kaminda hende no ta estafá otro mas.—Salmo 37:10, 11.