Bai na kontenido

Bai na kontenido

 BEIBEL TA KAMBIA BIDA DI HENDE

E Kontestanan Kla i Lógiko di Beibel A Impreshoná Mi

E Kontestanan Kla i Lógiko di Beibel A Impreshoná Mi
  • NASÍ NA AÑA: 1948

  • PAIS NATAL: HUNGRIA

  • SU PASADO: MI TABATA BUSKA KONTESTA PA E PREGUNTANAN IMPORTANTE DI BIDA

MI PASADO:

Mi a nase na Székesfehérvár, Hungria, un stat ku tin un historia largu di mas ku 1.000 aña. Lamentablemente, ainda e sikatrisnan ku Segundo Guera Mundial a laga atras den e stat ei ta bibu den mi mente.

Mi a lanta serka mi welanan parti di mama. Mi tin grato rekuerdo di nan, spesialmente mi wela Elisabeth. El a inkulká den mi un fe firme den Dios. For di tempu mi tabatin tres aña di edat, tur anochi mi tabata ripití huntu kuné e orashon di Nos Tata. Pero ta te ora mi tabatin kasi 30 aña mi a bin komprondé e nifikashon di e orashon ei.

Mi welanan a kria mi, pasobra mi mayornan tabata traha di dia i anochi ku e speransa di por a spar sufisiente pa kumpra un bon kas. Pero kada pasa un djasabra henter e famia tabata bini huntu pa un komementu. Mi tabata anhelá e okashonnan ei.

Na 1958, e soño di mi mayornan a bira realidat; nan a logra kumpra un kas ku nos tur tres por a biba aden. Por fin mi por a biba huntu ku nan i mi tabata felis i kontentu! Sinembargo, e alegria ei no a dura mashá; apénas seis luna despues mi tata a muri di kanser.

Mi a keda hopi kibrá. Mi ta kòrda kon mi tabata resa pidi Dios: “Mi a roga bo pa laga papi keda na bida. Mi tin mester di dje. Dikon bo no a kontestá mi?” Mi tabatin masha gana di sa unda mi tata tabata. Mi tabata puntra mi mes: ‘Ta shelu el a bai? Òf el a stòp di eksistí pa semper?’ Mi tabata envidiá otro mucha ku sí tabatin nan tata.

Pa hopi aña mi tabata bai santana kasi tur dia. Mi tabata hinka rudia na su graf i resa: “Dios, por fabor, mi ke sa unda mi tata ta.” Tambe mi tabata pidi Dios yuda mi komprondé e nifikashon di bida.

Tempu mi tabatin 13 aña mi a disidí di siña aleman. Mi a pensa ku den e literatura ekstenso di e idioma aleman kisas mi por a haña kontesta pa mi preguntanan.  Na 1967, mi a bai studia den e stat Jena ku e tempu ei tabata parti di Ost Alemania. Mi tabata masha interesá den literatura di filósofonan aleman, spesialmente e bukinan ku ta papia tokante nifikashon di bida. Aunke mi a haña algun idea interesante, ningun no a laga mi ègt satisfecho. P’esei mi a sigui pidi Dios yuda mi haña kontesta pa mi preguntanan.

BEIBEL A KAMBIA MI BIDA:

Na 1970, mi a bai bèk Hungria kaminda mi a konosé Rose, ku kende mi a kasa despues. Na e tempu ei, Hungria tabata un pais komunista. P’esei, djis despues ku nos a kasa, nos a hui bai Austria ku e meta di emigrá pa Sydney, Australia, kaminda mi tio tabata biba.

No a dura muchu ku mi a haña trabou na Austria. Un dia, un kolega di trabou a bisa mi ku mi por haña kontesta pa tur mi preguntanan den Beibel, i el a duna mi algun buki ku ta bai over di Beibel. Mi’n pèrdè pa gana; mesora mi a lesa nan i tabata ke siña mas. P’esei, mi a skirbi e editornan di e bukinan, Testigunan di Yehova, pa pidi mas literatura.

Nèt riba e dia ku nos a hasi ún aña kasá, un Testigu hóben di Austria a bishitá ami ku Rose. El a trese e literatura ku mi a manda pidi i a ofresé pa studia Beibel ku mi, lokual mi a aseptá. Mi tabata asina ansioso pa siña di Beibel ku nos tabata studia dos biaha pa siman. Anto kada estudio tabata dura rònt di 4 ora!

Loke e Testigunan a siña mi for di Beibel a fasiná mi. Ora nan a mustra mi e nòmber di Dios, Yehova, den mi Beibel húngaro, mi no por a kere mi bista. Den tur e 27 añanan ku mi tabata bai misa ni ún biaha mi no a tende e nòmber ei ser menshoná. E kontestanan kla i lógiko di Beibel a impreshoná mi. Por ehèmpel, mi a siña ku e mortonan no ta konsiente di nada, komo si fuera den un soño profundo. (Eklesiástes 9:5, 10; Huan 11:11-15) Mi a haña sa tambe tokante e promesa ku Beibel ta duna ku lo bai tin un tera nobo kaminda “lo no tin morto mas.” (Revelashon 21:3, 4) Anto awor mi tin e speransa di mira mi tata bèk, pasobra den e tera nobo ei “lo bai tin un resurekshon.”—Echonan 24:15.

Rose a djòin mi den e estudio di Beibel, i nos a progresá asina lihé ku nos a kaba e buki di estudio den apénas dos luna! Nos tabata bai tur e reunionnan di Testigunan di Yehova na nan Salòn di Reino, i e amor, bondat i union ku ta reina entre nan a impreshoná nos mashá.—Huan 13:34, 35.

Na 1976 nos a haña pèrmit pa drenta Australia. Nos a tuma kontakto mesora ku Testigunan di Yehova aya. Nan a laga nos sinti nos na kas entre nan, i na 1978 nos a batisá komo Testigu.

E BENEFISIONAN:

Por fin mi a haña kontesta riba e preguntanan ku tabata molestiá mi pa asina tantu tempu. Mi a hala serka Yehova Dios i asina mi a haña e mihó Tata ku ta eksistí. (Santiago 4:8) I e speransa di mira mi tata biológiko atrobe den e mundu nobo ku Dios a primintí ta di gran balor pa mi.—Huan 5:28, 29.

Na 1989 nos a disidí di bai Hungria bèk pa nos por kompartí nos kreensianan ku amigu, famia i otro hende. Nos tabatin e privilegio di studia Beibel ku sientos di hende. Mas ku 70 di nan a kuminsá sirbi Yehova huntu ku nos, inkluso mi mama stimá.

Pa 17 aña largu mi a resa pidi Dios pa haña kontesta pa mi preguntanan. Entretantu, 39 aña a pasa kaba i te ainda mi ta resa na Dios. Pero por fin mi por bisa: “Danki, mi Tata stimá den shelu pa a kontestá e orashonnan ku mi tabata hasi for di chikitu.”