Bai na kontenido

Bai na kontenido

 BEIBEL TA KAMBIA BIDA DI HENDE

Por Fin Mi A Haña Kontesta pa Mi Preguntanan!

Por Fin Mi A Haña Kontesta pa Mi Preguntanan!
  • NASÍ NA AÑA: 1987

  • PAIS NATAL: AZERBEIDJAN

  • SU PASADO: TATA MÒSLEM I MAMA HUDIU

MI PASADO:

Mi a nase na Baku, Azerbeidjan. Nos ta dos ruman i ami ta esun di mas chikí. Mi tata tabata mòslem, i mi mama tabata hudiu. Nan tabata stima otro mashá i tabata respetá otro su kreensianan. Mama tabata apoyá Tata ora e tabata yuna durante e fiesta di Ramadan, i Tata a apoyá Mama ora e tabata selebrá e Pasku Hudiu. Na nos kas, nos tabatin Koran, Torá i Beibel.

Mi tabata konsiderá mi mes mòslem. Nunka mi a duda ku Dios ta eksistí, pero tabatin algun kos ku mi no tabata komprondé. Mi tabata puntra mi mes: ‘Dikon Dios a krea hende? Ki sentido tin pa un hende sufri henter su bida i despues ser tormentá den fièrnu pa semper?’ Hende ta bisa ku tur kos ku sosodé ta boluntat di Dios. P’esei mi tabata puntra mi mes: ‘Akaso nos ta djis marioneta den man di Dios? Dios ta gusta mira hende sufri?’

Tempu mi tabatin 12 aña di edat, mi a kuminsá resa namaz, e sinku orashonnan ritual ku mòslemnan ta hasi diariamente. Den e époka ei, mi tata a manda ami ku mi ruman muhé un skol hudiu. Ei, nos a siña hebreo i e tradishonnan di Torá. Tur dia, promé ku lès kuminsá, nos mester a hasi orashon segun tradishon hudiu. Pues, mainta mi tabata resa namaz na kas i na skol mi tabata partisipá den orashonnan hudiu.

Mi tabatin hopi pregunta, i mi tabatin masha gana di haña kontesta lógiko pa nan. Bes tras bes, mi tabata puntra e rabinan na skol: “Dikon Dios a krea hende? Kiko Dios ta pensa di mi tata, ku ta mòslem? Dikon e ta ser konsiderá un hende impuru siendo ku e ta bon hende? Dikon Dios a kre’é anto?” Ma e poko kontestanan ku mi tabata haña no tabata lógiko ni konvinsente.

BEIBEL A KAMBIA MI BIDA:

Na aña 2002, algu a sosodé ku a pone mi pèrdè fe den Dios. Ta asina ku un siman despues ku nos a bai biba na Alemania, mi tata a haña un atake  selebral i a kai den koma. Pa hopi aña, mi a resa pidi Dios kuida salú di mi famia. I komo ku mi tabata konvensí ku ta e Todopoderoso so tin poder riba bida i morto, tur dia mi tabata rog’é pa e yuda mi tata. Mi tabata pensa: ‘Ta fásil pa Dios kumpli ku e deseo di un mucha chikitu.’ I mi tabatin sigur ku lo e skucha mi súplikanan. Pero mi tata a muri.

Mi a pensa ku Dios no tabata interesá den nos, i mi a keda hopi kibrá. Mi a kuminsá pensa ku sea mi no tabata hasi orashon bon òf Dios no ta eksistí. Mi tabata asina konfundí ku mi no por a ni resa namaz mas. E otro religionnan no tabata atraé mi, pues mi a yega na e konklushon ku Dios no ta eksistí.

Seis luna despues, Testigunan di Yehova a yama na nos porta. Komo ku nos no tabata gusta religionnan ku ta kere den Kristu, ami ku mi ruman muhé kier a mustra nan na un manera respetuoso ku nan ta siña hende loke ta robes. Nos a puntra nan: “Dikon kristiannan ta adorá Hesus, krus, Maria i otro ídolonan siendo ku e Dies Mandamentunan ta prohibí esei?” E Testigunan a mustra nos prueba konvinsente for di Beibel ku kristiannan berdadero no tin mag di adorá ídolo i ku nos mester hasi orashon solamente na Dios. Mi a keda babuká.

Nos a puntra nan: “Awor, kiko di e doktrina di Trinidat? Si Hesus ta Dios, kon e por a biba riba tera i ser matá?” Nan a bolbe usa Beibel pa kontestá nos preguntanan i a splika nos ku Hesus no ta Dios ni igual ku Dios. Nan a bisa tambe ku ta pa e motibu ei nan no ta kere den Trinidat. Esei a sorprendé mi mashá, i mi a pensa: ‘E kristiannan akí sí ta straño.’

Pero, ainda mi tabata ke sa dikon hende ta muri i dikon Dios ta permití sufrimentu. E Testigunan a mustra mi e buki Conocimentu Cu Ta Hiba na Bida Eterno, * ku ta kontené kapítulonan ku lo a kontestá mi preguntanan. Mesora nan a kuminsá studia Beibel ku mi.

Durante kada seshon di estudio, mi tabata haña kontesta lógiko basá riba Beibel. Mi a haña sa ku Dios su nòmber ta Yehova i ku su kualidat prinsipal ta amor. (Salmo 83:18; 1 Huan 4:8) Ademas, el a krea hende pa nan tambe disfrutá di bida. Mi a bin komprondé ku, aunke Dios ta permití inhustisia, e ta odia inhustisia i ku pronto lo e eliminá esaki pa semper. Mi a siña ku e rebelion di Adam ku Eva a trese konsekuensianan teribel pa humanidat. (Romanonan 5:12) Un di e konsekuensianan ei ta morto di nos sernan kerí, manera esun di mi tata. Pero, den e binidero mundu nobo lo no tin sufrimentu mas, i Dios lo resusitá hende ku a muri.—Echonan 24:15.

Sí, Beibel a kontestá tur mi preguntanan, i mi a bolbe kuminsá kere den Dios. Segun ku mi a siña konosé Testigunan di Yehova mas mihó, mi a realisá ku ta rònt mundu nan ta trata otro manera ruman. E union ku ta reina entre nan i nan amor pa otro a impreshoná mi. (Huan 13:34, 35) Mi a siña asina tantu kos tokante Yehova ku mi tambe kier a sirbié. P’esei, mi a disidí di bira Testigu di Yehova, i mi a batisá dia 8 di yanüari 2005.

E BENEFISIONAN:

E bèrdatnan di Beibel, ku ta lógiko, konvinsente i fidedigno, a yuda mi kambia mi manera di mira bida i duna mi pas mental. Danki na e resurekshon ku e Palabra di Dios ta primintí, mi tin e speransa di mira mi tata atrobe; esei ta duna mi gran goso i konsuelo.—Huan 5:28, 29.

Mi tin seis aña felismente kasá ku Jonathan, kende tambe ta un Testigu. Nos tur dos a siña ku e Palabra di Dios ta lógiko i fásil pa komprondé i ku e ta un tesoro presioso. P’esei, nos ta gusta papia ku otro hende tokante nos fe i nos speransa maravioso. Awor mi sa ku Testigunan di Yehova no ta kristiannan “straño,” ma kristiannan berdadero.

^ par. 15 Publiká pa Testigunan di Yehova, pero e no ta disponibel mas.