Yehova Dios a krea miónes di angel hopi promé ku el a krea hende. (Yòb 38:4, 7) E angelnan akí ta kriaturanan selestial poderoso ku ta traha pa Dios. Tin biaha Dios ta manda nan pa guia i protehá su sirbidónan riba tera. (Salmo 91:10, 11) Awe, e angelnan ta yuda hende benefisiá di e bon notisia ku e siguidónan di Hesus ta prediká.—Lesa Revelashon 14:6, 7.

Nos tin mag di hasi orashon na e angelnan pa pidi nan yuda nos? Nò. Orashon ta un akto di adorashon ku Dios so meresé. (Revelashon 19:10) Ya ku e angelnan ta sirbidónan di Dios, nan ta sigui solamente su instrukshonnan i no e petishonnan di hende. P’esei, semper nos mester hasi orashon únikamente na Dios mediante Hesus.—Lesa Salmo 103:20, 21; Mateo 26:53.

Meskos ku hende, Dios a krea e angelnan ku boluntat liber i nan por skohe pa hasi bon òf malu. Lamentablemente, hopi angel a rebeldiá kontra Dios. (2 Pedro 2:4) E promé tabata Satanas. Tambe tabatin otro angel ku a djòin e den su rebelion. Despues, Dios a saka Satanas i su demoñonan for di shelu i a tira nan riba tera.—Revelashon 12:7-9.

E oumento drástiko di maldat i violensia desde 1914 ta mustra ku pronto Dios lo kaba ku Satanas i su demoñonan. Despues Dios lo kombertí e tera akí den un paradeis.—Lesa Revelashon 12:12; 21:3, 4.